Génesis 20
20
Apraan Apimiricorë naporinsoꞌ
1Apraansoꞌ, piyapinënpitarë chachin yaꞌhuëapi quëran pipipi. Pipirahuatonaꞌ, Niquipi parti paantapi. Quiraro ninanoquë canconahuatonaꞌ, inaquë yaꞌhuëcaiso marëꞌ quëparitopi. Ina ninanosoꞌ, Catisë ninano quëran Shor parti ira paꞌninsoꞌ huáncana quëparitërin. 2Apraanso inaquë yaꞌhuapon pochin, Sara saꞌin nipirinhuëꞌ: “Oshihuë,” toconin. Napoaton Quiraro copirno Apimirico itopisori yamanin. Camaitohuachina, macacaso marëꞌ Sara quëpatopi. 3Napoaponahuëꞌ, naporo tashi chachin Yosëri huëꞌënquë pënënin: “Quëmaso chiminaran. Sanapi mananso soꞌyahuan niꞌton, chiminamaso yaꞌhuërin,” itërin. 4Apimiricosoꞌ, co Sara ichihuëꞌëshátërarinhuëꞌ. Napoaton Sinioro itapon: “Sinioro co manta onporahuë niꞌton, co tëpaancoso yaꞌhuërinhuëꞌ. 5Coꞌta Apraan chachin naporin: ‘Oshihuë,’ tënin. Sarantaꞌ: ‘Yoꞌyohuë,’ tënin. Cato chachin napopi niꞌton, co nitotatohuë manahuë,” itërin. 6Napotohuachina, Yosërinta huëꞌënquë chachin aꞌpaniantarin: “Tëhuënchachin co nitotatonhuëꞌ naporan. Napoaton ca nohuanto co ichihuëꞌëranhuëꞌ. Carinquën yaꞌcopiranquën ama oshahuanaton tëhuëtancoso marëhuëꞌ. 7Iporaso nipirinhuëꞌ, soꞌin chachin quëtaantaquëꞌ. Inaso pënëntonaꞌpi niꞌton, quëma marëꞌ nontarinco. Ama chiminamaso marëhuëꞌ, nontarinco. Coꞌsoꞌ quëtaantahuatanhuëꞌ, saꞌan, huiꞌnanpita, inapitarëꞌquën chachin, taꞌhuantaran,” itërin huëꞌënquë.
8Tahuërianpitohuachina, Apimiricoso huënsëintarahuaton, piyapinënpita amatërin. Huëꞌpachinara, yaꞌipi huaꞌnarinso shaꞌhuitërin. Natanahuatonaꞌ, piyapinënpitaso paꞌpi paꞌyanpi. 9Ina quëran Apraan amatahuaton, itapon:
—¡Maꞌhuantacha nitapirancoihuë paya! ¡Caso co maquë tëranta tëhuëtëranquënhuëꞌ! Quëmaso nipirinhuëꞌ, napotatoncoi panca yaaoshahuanpirancoihuëꞌ. Ca aoshahuanatonco, quëmopinëhuëpita, piyapinëhuëpita, inapita, naꞌinchitonhuëꞌ. ¡Co naporëhuëꞌ! 10-11¿Maꞌta yonquiaton, napotopirancohuëꞌ? itërin. Napotohuachina, Apraani itapon:
—Isëquësoꞌ, co manta Yosë natëpihuëꞌ. Saꞌahuë matiinacoso marëꞌ tëpaponaco casoꞌ, taꞌto naporahuë. 12Naporahuaton Sarasoꞌ, oshihuë antaꞌ. Ina tataquëranchin nipiraihuëꞌ, mamahuëi quëransoꞌ, nisha ninai. Napoaton cari manahuë. 13Yosë chachin, tatahuë yaꞌhuërin quëran pipicasoꞌ camaihuachincora, saꞌahuë shaꞌhuitërahuë: “Insëquë tëranta paꞌnëhuaquë: ‘Inaso yoꞌyo masho,’ tëquë taꞌa, itërahuë,” tënin Apraan.
14Ina natanahuaton, Apimiricoso saꞌin quëtaantarin. Naporahuaton, ohuicaroꞌsaꞌ, ohuacaroꞌsaꞌ, inapita quëtërin. Piyapinënpita camaicaso marëntaꞌ: Quëmapiꞌsaꞌ, sanapiꞌsaꞌ, inapita quëtërin. 15Ina quëtahuaton, itërin:
—Niꞌquë iya, noꞌpanëhuëso pancana, insëquëso costaranquë yaꞌhuëquëꞌ, itërin. 16Sarantaꞌ, itapon:
—Niꞌquë imoya, yoꞌyo masho huaranca coriqui prata quëran nininsoꞌ quëtërahuë. Yaꞌipiya quëran co tëhuëransohuëꞌ nitotacaiso marëꞌ ina nápo quëtarahuë. Co insonta pinoinquënso yaꞌhuërinhuëꞌ. 17Ina quëran Apraan, Yosë nontërin Apimirico marëꞌ. Ina saꞌin, cosonanënpita, inapita marëntaꞌ, Yosë nontërin. Nontohuachina, Yosëri anoyatërin. Naquëranchin huaꞌhuasha yaꞌhuëtaantacaiso marëꞌ anoyatërin. 18Siniorori nani Apimirico yaꞌhuërinquë, sanapiꞌsa anaꞌintopirinhuëꞌ. Ama huaꞌhuanacaiso marëhuëꞌ, Sara naꞌin quëran napotopirinhuëꞌ. Napoaton Apraani Yosë nontërin inari anoyatacaso marëꞌ. Napohuachina, Yosëri Apimirico saꞌin, piyapinënpita saꞌinaꞌ, inapita anoyatërin. Huaꞌhuasha yaꞌhuëtaantacaiso marëꞌ anoyatërin.
Currently Selected:
Génesis 20: cbt
Tõsta esile
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.