Génesis 21
21
Isaco nasitërinsoꞌ
1Shaꞌhuitërinso chachin, Siniorori Sara catahuarin. 2Ina nohuanton napoin quëran cayorin huachi. Tahuëri nanihuachina, quëmapiaꞌhuaya huairin. Inasoꞌ, Apraan mashoya nicaquë huarëꞌ huiꞌnahuaninso huaꞌhuatërin. Yosëri shaꞌhuitërinso tahuëriꞌsa chachin, huiꞌnin nasitërin. 3Saꞌinquë chachin huiꞌnahuaninso nasitohuachina, Isaco itërin. 4Yosë camaitërinso chachin posa tahuëritohuachina, marca acotërin. 5Apraan pasa piꞌipitasoꞌ, huiꞌnin Isaco itërinsoꞌ, nasitarin. 6Naporoꞌ Sara yonquirin: “Yosë catahuarinco niꞌton, capa cancantato, tëhuarahuë. Aꞌnapitantaꞌ, huaꞌhuanahuëso nitotohuachinaꞌ, yaꞌipiya quëran capa cancantatona tëhuaponaꞌ. 7Co huaꞌhuanaꞌpicohuë niꞌto, co inso tëranta Apraan nontaton: ‘Tëhuënchachin Saraquë huiꞌnahuanaran,’ co ichitonhuëꞌ. Inaso nipirinhuëꞌ, máshoya niponahuëꞌ, huiꞌnahuanin huachi,” tënin.
Acara, Ismairo, inapita Apraani aꞌparinsoꞌ
8Isacoaꞌhuaya oshaquëran soꞌsohuachina, aꞌshini aꞌpotërin. Aꞌpotërinso tahuëri, capa cancantacaiso marëꞌ Apraan panca pita ninin. 9Capa cancantapirinahuëꞌ, Sarasoꞌ co noyahuëꞌ cancantërin. Cosona huaꞌhuini Isaco monaton yaꞌnipitarin niꞌnin. 10Napoaton Apraan shaꞌhuitërin: “¡Cosonasoꞌ, huaꞌhuinë chachin, aꞌpaquë paꞌin! Isacoso huaꞌhuahuë chachin niꞌton, co nohuantërahuëꞌ quëma maꞌshanënpita cosona huaꞌhuionta quëtacasoꞌ,” itërin. 11Ina natanaton, Apraan panca sëtërin. Huiꞌnin niꞌton, sëtëyarin. 12Sëtopirinhuëꞌ, Yosëri itërin: “Ama huiꞌnapi marëꞌ sëtëquësohuëꞌ. Co cosonanën marëꞌ tëranta sëtacaso yaꞌhuërinhuëꞌ. Maꞌsona Sara nohuantërinso niquëꞌ. Isaco quëran pipipisopita, noya noya catahuararahuë. Inapita mini yonquiato nani shaꞌhuitëranquën nisapasoꞌ. 13Cosona huaꞌhuionta catahuarahuë. Ca nohuanto, shinpita panca nacion ocoiaponaꞌ. Huiꞌnan chachin anta niꞌton, catahuarahuë,” itërin.
14Tahuëririnquë tashiramiachin Apraansoꞌ, Acara quëtacaso marëꞌ cosharo manin. Aꞌnara shaꞌhuëtë morsaquë iꞌsha taꞌpanahuaton, quëtërin. Huiꞌnionta Ismairo itërinsoꞌ, aꞌpaantërin quëpacaso marëꞌ. Inahuaso paꞌpachinara, Piirsipa inotëro parti chihuëatonaꞌ, topinan paꞌsápi. 15Iꞌsha shaꞌhuëtë morsaquë yaꞌhuërinsoꞌ, taꞌquipi. Taꞌquihuachinara Acarasoꞌ, naraaꞌhuaya tashinantërianaquë huaꞌhuin acorahuaton, patërin. 16Aquëmiachin paꞌsahuaton, huënsëconin. Ama huaꞌhuin chimininso nicacaso marëhuëꞌ, inaquë huënsëconin. Huënsëhuachina, huiꞌnapiso naꞌnërin huachi.
17Yosëri, huiꞌnapi naꞌnërinsoꞌ natanin. Napoaton Yosë anquëninëni, inápa quëran përasahuaton nontërin: “¿Maꞌta Acara onporan? ¡Ama paꞌyanquësohuëꞌ! Yosëri, huiꞌnapi naꞌnërinsoꞌ natanin. 18Manóton paꞌsahuaton, macontaquëꞌ. Ama patëquësohuëꞌ. Ca nohuanto, huaꞌhuan quëran panca nacion pipipon,” itërin. 19Naporoꞌ Yosë nohuanton, Acara aꞌna posoquë iꞌsha quënanin. Inaquë paꞌsahuaton, shaꞌhuëtë morsaquë manin. Ina masahuaton, huaꞌhuin oꞌshitonin.
20-21Yosëri, huiꞌnapi catahuarin niꞌton, nóya aꞌshinin. Paran inotëro parti yaꞌhuëpi. Míso pëꞌchinantërin. Oshaquëran aꞌshini Iquipito sanapi yoniton, acoantërin.
Apimirico Apraanë anoyatopisoꞌ
22Naporo tahuëriꞌsa pochin Apimirico paꞌnin Apraan nontapon. Huicororëꞌ paꞌnin. Inasoꞌ, Apimirico sontaronënpita camairinsoꞌ. Inaquë Apimiricori Apraan itapon:
—Tëhuënchachin quëmasoꞌ nani maꞌsha nipatana, Yosë catahuarinquënso niꞌnai. 23Napoaton isëquë chachin Yoscoarëꞌ taꞌton shaꞌhuitoco: Ama huiꞌnahuëpita, shihuëpita, ama ca tërantaꞌ, maꞌsha onpotancoso marëhuëꞌ, shaꞌhuitoco. Carinquënso nosoroatënquën co maꞌsha onpotëranquënhuëꞌ. Inapochachin quëmanta noya niꞌcoi. Aꞌnapita yaꞌhuëhuanoꞌsantaꞌ, noya niꞌcamaso marëꞌ Yoscoarëꞌ taꞌton shaꞌhuitoco, itërin. 24Napotohuachina Apraan tapon:
—Yoscoarëꞌ co maꞌsha onpotaranquëmahuëꞌ, itërin.
25Napoaponahuëꞌ, Apraani itaantapon:
—Carinquëmasoꞌ, noya yonquirapiranquëmaꞌ. Quëma piyapinënpitaso nipirinhuëꞌ, aꞌnara poso ihuaraiso matërinacoi, itërin. 26Ina natanahuaton, Apimiricori itapon:
—Co shaꞌhuitërancohuëꞌ niꞌton, ipora huarëꞌ namaso natanahuë. Inpitaso inapotomarinquën. Co caso nitotërahuëꞌ, itërin. 27Napotohuachina, naporo tahuëri cato chachin, noya ninitona yaꞌhuëcaiso marëꞌ anoyatopi. Yoscoarëꞌ taꞌtonaꞌ, anoyatopi. Ina quëran anoyatopiso yonquicaiso marëꞌ Apraani ohuicaroꞌsaꞌ, ohuacaroꞌsaꞌ, inapita manin. Masahuaton Apimirico quëtërin. 28Naporahuaton canchisë ohuica nanoyan nipisopita huëntonën quëran nisha acoarin. 29-30Nisha acoasoꞌ, Apimiricori itapon:
—¿Maꞌmarëta canchisë ohuicaroꞌsa nisha acoaran? itërin.
—Isopita canchisë ohuica, quëtaranquën: “Tëhuënchachin Apraani ina poso ninin,” taꞌcamaso marëꞌ quëtaranquën, itërin. 31Napoaton ina roꞌtësoꞌ, Piirsipa itopi. Inaquë cato chachin Yoscoarëꞌ taꞌtonaꞌ, anoyatopi niꞌton, ina pochin nohuitopi. 32Nani anoyatohuachina Apimiricosoꞌ, Huicororë chachin huiristinoꞌsa noꞌpanën parti paantapi.
33Nani paꞌpachinara, Apraanso inaranchin Sinioro chinotërin. Inasoꞌ: “Yosë yaꞌhuëmiatërinsoꞌ,” itopi antaꞌ. Inaquë chinotaton, aꞌnara tamarisco nara shaꞌnin. Nani shaꞌhuirahuë chachin ina noꞌpasoꞌ, Piirsipa itopi. 34Huaꞌqui Apraan huiristinoꞌsa noꞌpanënaquë, yacapatërin.
Currently Selected:
Génesis 21: cbt
Tõsta esile
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.