Апостолхнень тевсна 10
10
Пётр и Корнилий
1Кесарияса эрясь ломань, лемоцоль Корнилий. Сон ульсь сядонь оцюнякс полкса, кона лемневсь Италияннекс. 2Сонцьке, кудэряензовок ульсть коень ванфты ломатть и Шкаень мяль ваныхть. Сон лама лездсь ашуфненди и фалу озондсь Шкайти. 3Весть шить, вейхксоце частть малава, ульсь тейнза няйфкс, коса сон лац няезе Азорть ангелоц, кона сувась тейнза и мярьгсь: «Корнилий!» 4Сон эводезь варжакстсь ангелть лангс и мярьгсь: «Мезе, Азор?» Ангелсь мярьгсь: «Озондомаце и пара тефне пачкодсть Шкайти, и Сон мяляфты колгат. 5А тяни кучт ломатть Иоппияв и тертьк ширезт Симононь, конань лемнесазь нинге Пёторкс; 6сон инжиендай кедень тиить Симононь пяле, конань кудоц оцюведть трваса. Сон азы тейть валхт, конатнень вельде идеват тонць и марнек кудце». 7Кодак мархтонза корхтай ангелсь тусь, Корнилий серьгядсь кафта покодихть и тевонь якафты ушманонц, кона ульсь коень ванфты ломанькс, 8азондозе тейст семботь и кучезень Иоппияв.
9Омбоце шиня сят ки лангсотольхть и нежетькшнесть Иоппиять малас. Тяка пингть, котоце частть маласа, Пётр кеподсь кудбряв озондома. 10Сонь пяк вачсь пекоц и ёрась ярхцамс. Мзярс анокласть ярхцамбяль, сон няйсь няйфкс. 11Сон няезе, кода панжевсь менельсь, и кати-мезе кели котфонь кодяма, кона сотнефоль ниле ужеда, кармась валгома алу. 12Тя котфть лангса ульсть модалангонь кодама повсь жуватат, вирьбаксянь жуватат, куйхть-ёзмолдыхть и менелень нармотть. 13И сон кульсь тейнза корхтай вайгяль: «Стяк, Пётр! Печкить и ярхцак!» 14Но Пётр каршезонза мярьгсь: «Мон аф карман, Азор. Мон мзярдонга ашень ярхцсе мезьдонга туткоткста и аф аруда». 15Вайгяльсь омбоцеда пшкядсь тейнза: «Аф тейть лемнемс туткотксокс сянь, мезть Шкайсь тиезе арукс!» 16Тяфта тиевсь колмоксть и котфсь эстокиге меки кепотьфоль менели.
17Мзярда Пётр нинге абонкшнесь эсь потмованза, мезень колга корхтась ся няйфкссь, ортатнень ваксс лоткасть Корнилиень ломаненза, конатненди няфтезь Симононь кудонц. 18Синь кайгиста кизефтезь: тяса инжиендай Симон, кона лемневи Пёторкс? 19Пётр нинге арьсекшнесь няйфксть колга, мзярда Ваймопожфсь мярьгсь тейнза: «Колма ломатть вешендихть эсот. 20Тяза явожкшне мяльце, тяникиге валк и архт мархтост. Тя Мон кучине синь». 21Пётр валгсь алу и мярьгсь Корнилиень пяльде кучф ломаттненди: «Мон ся, кинь вешенттяда. Мезенди саде?» 22Синь корхтайхть: «Корнилий сядонь оцюнясь кучемазь минь. Сон коень ванфты и Шкайда пели ломань, конань пара лувксс путнесазь сембе еврейхне. Иняру ангелсь кошардозе Корнилиень тердемс тонь кудозонза и кулхцондомс тонь, мезе азат». 23Пётр пара мяльса васьфтезень синь и тердезень кудботму. Омбоце шиня сон срхкась и тусь мархтост. Пёторонь мархта срхкась нинге мзярошка Иоппиянь кемай ялгада. 24Шида меле синь ульсть ни Кесарияса. Корнилий учезень синь, кочкамок сембе мала ломанензон и ялганзон. 25Мзярда Пётр сувась, Корнилий мольсь каршезонза, сюконясь и прась инголенза плманжа лангс. 26Пётр кеподезе сонь и мярьгсь: «Стяк! Мон аньцек ломанян». 27Мархтонза корхнезь, Пётр сувась куду и няезе: пуромсь лама ломань. 28Сон мярьгсь тейст: «Тинь содасасть: еврейхненди койснон коре аф мярьгондеви корхнемс лия тналонь ломань мархта али сувсемс пялонза. Но Шкайсь кошардомань монь – киньге ломаттнень ёткста аф лемнемс туткотксокс али аф арукс. 29Вов мес, мзярда кучеде инксон, мон сань каршек валфтома. А тяни азость, кодама тевонь кувалма тердемасть».
30Эста Корнилий азозе: «Ниле шида инголе мон поставань тяниень пингти, и вейхксоце частста озондонь кудсон. Апак учт няйса: инголен ащи пиндолды щамса аля 31и корхтай тейне: "Корнилий, тонь озондомаце кульф, и Шкайсь мяляфты ашуфненди лездомацень колга. 32Сяс, кучт ломатть Иоппияв и тертьк пялот Симононь, кона лемневи Пёторкс; сон инжиендай кедень тиить Симононь ширеса, конань кудоц оцюведть трваса. Сон сай и корхтай мархтот". 33Мон эстокиге кучень мельгат, и тон лац тиеть, мес сать. Вов минь сембе пуромоме Шкайть инголе, мяленьке кулемс эздот, мезе кошардсь азомс Шкайсь».
Пёторонь корхтамац Корнилиень кудса
34Пётр мярьгсь: «Вов тяни мон афкукс шарьхкодень, Шкайсь фкакс лувсыне сембе ломаттнень. 35Эрь тналонь ломанць, кона ванондсы Азорть мяленц и тиенди видеста, тушенды Сонь мялезонза. 36Шкайсь кучсь Израилень ломаттненди вал, пачфтезе Пара кулять сетьмошить колга, кона максови Иисус Христость вельде, тя Сон сембе ломаттнень Азорсна. 37Тинь содасасть, мезе тиевсь марнек Иудеять келес, ушедомок Галилеяста, сяда меле, кода Иоанн тердсь ломаттнень шарфтомс Шкайти и кстиндась эсост. 38Тинь кулесть, кода Назаретонь Иисусть Шкайсь вадезе Иняру Ваймопожфса и вийса, содасасть, кода Сон якась сембе вастова, тиендсь цебярь и пчкафнезень сембонь, кие ульсь идемэвозть кядяла, сяс мес мархтонзоль Шкайсь. 39И минь – семботь няеськ, мезе Сон тись Иудеянь масторса и Иерусалимса, и тянь колга азонттама. Сонь шавозь, эськодезь шуфтонь крёзс, 40но колмоце шиня Шкайсь вельмафтозе Сонь кулофста и макссь Тейнза няфнемс пря, 41но аф сембе ломаттненди, а аньцек ся няихненди-азондыхненди, конатнень Сонць кочказень, лиякс мярьгомс – тейнек, конат кулофста вельмамдонза меле мархтонза ярхцаме, симоме. 42Сон кошардомазь минь кандомс ломаттненди Пара кулять и азондомс няйфть: Сон Ся, кинь Шкайсь путозе Судьякс шистотненди и кулофненди. 43Сембе пророкне азондыхть колганза: эрти, кие кемай Тейнза, максови пежень нолдама Сонь лемонц вельде».
Лия тналонь ломаттненди максовсь Иняру Ваймопожфсь
44Пётр нинге корхтась и апак учт сембонь лангс, кие кулхцондозе валонц, валгсь Иняру Ваймопожфсь. 45Еврейхнень ёткста кемайхне, конат састь Пёторонь мархта, прасть дивас, мес Шкайсь валозе Иняру Ваймопожфть лия тналонь ломаттнень лангска. 46Вдь синь кулезь, кода сят корхтасть эрь кодама кяльса и шназь Шкайть инь оцюшинц. Эста Пётр мярьгсь: 47«Ня ломаттненди максовсь Иняру Ваймопожфсь, кода миндейневок. Кали тяни киндивок перяви кисна ведьса кстиндафтомати?» 48И сон кошардозень синь кстиндафтомс пря Иисус Христосонь лемса. Тяда меле синь эняльдсть Пёторонди лядомс ширесост мзярошка шис.
Currently Selected:
Апостолхнень тевсна 10: ОС16
Tõsta esile
Share
Kopeeri
Want to have your highlights saved across all your devices? Sign up or sign in
Библиянь ётафтома институтсь, 2016