Апостолхнень тевсна 11
11
Иерусалимса Пётр азондсы, мезьса ащи тевсь
1Иудеяса эряй апостолхне и сембе кемайхне кулезь: лия тналоннетневок сувафтозь седиезост Шкаень валть. 2Мзярда Пётр сась Иерусалиму, сят кит лувозь эрявиксокс киськопень керомать, кармасть сонь апрякамонза. 3Корхтасть: «Тон якать киськопень аф керфненди и нльне ярхцать мархтост!»
4Пётр кармась мельцек-мельцек азондома тейст, кода тя сембось лиссь: 5«Мон улень Иоппия ошса, и озондомста няень няйфкс. Менельста валгсь кати-мезе котфонь кодяма, конань кирдезь ниле ужеда. Сон валгсь тейне, 6мон варжакстонь эзонза и няень кодама-повсь жуватат, вирьбаксянь жуватат, куйхть-ёзмолдыхть и менелень нармотть. 7И кулень вайгяль, кона мярьгсь тейне: "Стяк, Пётр! Печкить и ярхцак!" 8Мон корхтан: "Мон аф карман, Азор. Мон мзярдонга ашень ярхцсе мезьдонга туткоткста и аф аруда". 9Вайгяльсь менельста омбоцеда мярьгсь: "Аф тейть лемнемс туткотксокс сянь, мезть Шкайсь тиезе арукс". 10Тяфта тиевсь колмоксть, а сяльде сембось тя меки кепотьфоль менели.
11И тяка пингть кудть инголе, коса минь эряме, ащесть колма ломатть, синь кучфтольхть тейне Кесарияста. 12Ваймопожфсь мярьгсь тейне: тяза явожкшне мяльце, архт мархтост. Мон тунь, и мархтон срхкасть нинге ва ня кота кемай ялгатне. Минь саме тона ломанть кудс. 13Сон азондозе тейнек, кода няйсь эсь кудсонза ангел, кона мярьгсь тейнза: "Кучт ломатть Иоппияв и тертьк пялот Симононь, конань лемнесазь Пёторкс. 14Сон азы тейть валхт, конатнень вельде идеват тонць и марнек кудце". 15Мзярда мон ушедонь корхтама, синь лангозост валгсь Иняру Ваймопожфсь, кода васенда валгсь миньге лангозонк. 16И мон лятфтайне Азорть азфонц: "Иоанн кстиндась ведьса, а тинь ульхтяда кстиндафт Иняру Ваймопожфса". 17Эрь вов, кда Шкайсь максозе тейст сяка казнеть, конань максозе тейнековок, мзярда минь кемаме Иисус Христос Азорти, эста киян мон – Шкайть каршес арамс?»
18Ня валдонза меле синь седисна озасть и кармасть шнамонза Шкайть, корхтамок: «Лисенди, Шкайсь макссь лия тналонь ломаттнендиге шарфтомс Тейнза и сатомс пефтома эряфть».
Антиохиянь кемаень пуромкссь
19А сят, кит ворьгодсть панцематнень эзда, конат ушедсть Стефанонь куломда меле, пачкодсть Финикияв, Киправ и Антиохияв, но еврейда башка оду киндиге ашезь азонкшне Кулять. 20Синь ётксост ульсть кемай ломатть Кипраста и Киринеяста, конат Антиохияв самста кармасть пачфнема Пара куля Иисус Азорть колга лия тналонь ломаттненди. 21Синь мархтост ульсь Азорть виец, и ламодонга лама ломань кармась кемама и шарфтсь Азорти.
22Кулясь тянь колга пачкодсь Иерусалимонь кемаень пуромксти, и Варнавань кучезь Антиохияв. 23Тов пачкодемста сон эсь сельмосонза няезе Шкаень пароказнеть и сонь сявозе кенярдема. Сон тернезень сембе ломаттнень кемоста ванфтомс Азорти кемамаснон. 24Варнава пяк цебярель алясь, пяшксель Иняру Ваймопожфта и кемамада. И Азорти сась нинге пяк лама ломань.
25Тяда меле Варнава тусь Тарсу Саволонь вешема. Кодак музе сонь, сявозе мархтонза Антиохияв. 26Мянь киза синь покодсть тостонь кемаень пуромксса и тонафнесть лама ломань. Антиохияса васенцекс кармасть лемнемост тонафнихнень христианкс.
27Сяка пингть Иерусалимста Антиохияв сась мзярошка пророк. 28Ёткстост фкясь, лемоцоль Агав, стясь и Ваймопожфть вятеманц коряс ингольпяли азозе: марнек модать лангса кармай улема оцю вачаши, и тяфтама вачашись сась Клавдий кесарть пингста. 29Эста тонафнихне састь мяльс кучемс ярмак Иудеяса эряй кемай ялгатненди, эрсь эсь уликсшинц коряс. 30Тяфта синь и тисть, и Варнавань и Саволонь вельде кучезь кемаень пуромксонь оцюнятненди кочкаф лезксть.
Currently Selected:
Апостолхнень тевсна 11: ОС16
Tõsta esile
Share
Kopeeri
Want to have your highlights saved across all your devices? Sign up or sign in
Библиянь ётафтома институтсь, 2016