यूहन्ना 11
11
लाजर ची मौत
1 #
लूक 10:38,39 बैतनिय्याह गांवा चे हेक बन्दे बिमार हुते जाये नां हुते लाजर। जिठे ओह ङोन ब़ेहणी मरियम ते मारथा लारे रेहता। 2#यूह 12:3हा मरियम वाहो असतरी हुती जेह्णे प्रभु उपर इत्र नाखती कर ओचे पग़्ग़ा नु आपणे माला लारे लुहले हुते, यिचा ही भऊ लाजर बिमार हुता। 3यां ब़ेहणीया ने ईशु चे गोढु हा सनेसा भेज़ला, “हे प्रभु, जाये लारे तु प्रेम राखी, ओह बिमार छै।”
4ईशु ने जिसे बेले ईं सुणले, ते ओ ब़ोला, “हा बिमारी जान लेवा कोनी, बल्कि नरीकारा ची महिमा नु उजागर करने वास्ते छै, जाये कनु नरीकारा चे पूता नु महिमा मिली।”
5ईशु, मारथा, ते विची ब़ेहण ते लाजर लारे प्रेम राखता। 6ऐवास्ते जिसे बेले ईशु ने सुणले कि लाजर बिमार छै, जिठे ओ रुकला हुता ओठे ओ ङोन ङिहें नेरा रुकला, 7बल्ति ईशु ने आपणे चैला नु केहले, “आवा अम्ही यहूदिया प्रदेसा सनु पुठे चालु।”
8चैला ने ओनु केहले, “हे गुरु जी, कोच्छ ही ङिहें पेहले यहूदी नेता दुधे उपर पत्थराव करने ची कोशिस करी पलते, का बल्ति तु उठी जई पला?”
9ईशु ने केहले, “का ङिओ चे ब़ारहा घण्टे सोज़ले ना हुवी? अगर कुई बन्दे ङिओ चे सोज़ले मां टुरे तां ऊं ठोकर ना खई, कांकि ओ ऐ संसारा चे सोज़ले नु ङेखे वे। 10अगर कुई राती नु टुरे तां ऊं ठोकर खाये, कांकि ओचे मां सोज़ले कोनी।”
11ओणे ये बाता वानु केहलीया, ते ओणे बल्ति केहले, “अम्चा मित्र लाजर नूहती रेहला, मैं ओनु जग़ाऊं जाये पला।”
12बल्ति ओचे चैला ने ओनु केहले, “हे प्रभु, अगर ओनु नीङ आती गेली, तां ओ ठीक हुती जई।”
13ईशु लाजर ची मौत ची बात करे पलता, पर चैला ने सोचले कि ओ तां नीङे चे बारे बात करे पला।
14बल्ति ईशु ने वानु साफ-साफ केहले, “लाजर मरती चुकला, 15मैं तम्चे कारण खौश छै कि मैं ओठे कोनी हुता, कांकि हमा तम्ही माये उपर विश्वास कर सग़ा। आवा अम्ही ओचे गोढु चालु।”
16बल्ति थोमे ने जको दिदुमुस (मतलब जाड़ीये) किहवाता ङुजे चैला नु केहले, “आवा अम्ही वी ऐचे लारे मरणे वास्ते चालु।”
ईशु पुनरुत्थान ते जीवन छै
17बल्ति ईशु उठु टुरती पला, ते ओठे जती कर ओणे ङेखले कि लाजर ची लाश नु चट्टानी मां खुदली आली कब्री मां मेहले चार ङिहें हुती गेली। 18बैतनिय्याह गां यरुशलेम शहरा कनु करीबन ङोन मील दूर हुते, 19भावां ची मौत उपर मारथा ते मरियम नु हिम्मत ङेणे चे वास्ते घणे सारे यहूदी लौक ओठे आले हुले ते। 20जिसे बेले मारथा ने सुणले कि ईशु इठे आला, ते वा ओनु मिलणे वास्ते गेली, जबकि मरियम घरा मां ही हुती।
21ओठे जती कर मारथा ने ईशु नु केहले, “हे प्रभु, अगर तु इठे हुवी हा तां, माया भऊ ना मरेहा। 22पर मैं जाणे कि हमा वी अगर तु नरीकारा कनु कहीं मांगे तां ओ तनु ङिही जती।”
23ईशु ने विनु केहले कि, “दुधा भऊ जीता हुती जई।”
24मारथा ने ओनु केहले, “मैं जाणे कि पुनरुत्थान चे आखरी ङिहां मां ओ जीता हुती जई।” 25ईशु ने वानु केहले, “मैं ही पुनरुत्थान छै ते जीवन मैं ही छै। जको कुई माये उपर विश्वास करे ऊं अगर मरती वी जाये तां वी जीवी, 26ते जको कुई जीते छै ते माये उपर विश्वास करे, ऊं कङी वी नी मरी। का तनु ये बाते उपर विश्वास छै?”
27मारथा ने ईशु नु केहले, “हव्वे, प्रभु, मनु विश्वास छै कि तु नरीकारा चा पूत मसीह छी, जको संसारा मां आणे आला हुता।”
ईशु ची हींजवे
28ईं केहती कर मार्था चाह्ली गेली, ते आपणी ब़ेहण मरियम नु हकारती लुकती कर केहले, “गुरु जी इठी छै, तनु हकारे पला।” 29ईं सुणते ही, मरियम ओही बेले ओचे गोढु आली। 30ईशु हालि तक गांवा मां कोनी पुज़ला हुता, ओह ओही जग़हा मां हुता जिठे मार्था मिड़ली हुती। 31बल्ति जको यहूदी विचे लारे घरा मां हुते, विनु तसल्ली ङिही पलते, वा बन्दा ने मरियम नु ब़ाहरु जते ङेखती कर समझले, कि वा कब्री उपर रोवणे चे वास्ते जाये पली, ते वे विचे भांसु टुरती पले।
32जिसे बेले मरियम ओठे पुज़ली जिठे ईशु हुता, ओनु ङेखती कर ओचे पग़्ग़ा मां ढेती कर केहले, “हे प्रभु, अगर तु इठे हुवीया तां, माया भऊ कङी वी ना मरेहा।”
33जिसे बेले ईशु ने मरियम, ते वा यहूदी बन्दा नु जको विचे लारे आले हुते रोते ङेखले, दिला मां घणा ही उदास हुला ते घब़राला। 34ते केहले, “तम्ही लाजर ची लाश नु किठे मेहले?”
वाणे केहले, “हे प्रभु, चालती कर ङेखती गे।”
35ईशु ची हींजवे आती गेली। 36बल्ति यहूदी किहुं लाग़ले, “ङेखा, ओ लाजर नु कितना प्रेम करे!”
37पर वांचे महु कईयां ने केहले, “ईं बन्दे जेह्णे अन्धा नु आंखीया ङिलीया, का लाजर नु मरणे कनु ना बचा सग़ेला?”
ईशु ने लाजरा नु जीते करले
38ईशु मना मां ब़ोहत घणा ही उदास हुती कर, कब्री उपर आला। जिठे लाजर नु मेहले हुते वे कब्री चे मुँहा उपर हेक बङा पत्थर पलता ला। 39ईशु ने केहले, “पत्थर हटावा।”
लाजर ची ब़ेहण मार्था ओनु किहुं लाग़ली, “हे प्रभु, ओचे महु हमा तां बद्दबू आवे पली, कांकि ओनु मरले आले चार ङिहें हुती गेली।”
40ईशु ने केहले, “का मैं तनु कोनी केहले हुते कि अगर तु विश्वास करे तां, नरीकारा ची महिमा ङेखे?” 41बल्ति वाणे ओह पत्थरा नु हटाले। ईशु ने आंखी उपर करती कर केहले, “हे नरीकारा ब़ा, मैं दुधा शुक्र करे कि तु माई सुणती गेली। 42मैं जाणता कि तु सदा माई सुणी, पर जको भीड़ आस-पास भिली वांचे वजह मैं ईं केहले, जाये कनु वे विश्वास करो कि तु मनु भेज़ले।”
43ईं केहती ओणे ऊंची अवाजी मां केहले, “लाजर, ब़ाहर निकलती आ!” 44जको मरती गेलता ओह खफना लारे बिलठला आला ब़ाहर निकलती आला, ते ओचे मुँह रुमाला लारे ढकले आले हुते।
ईशु ने वानु केहले, “ओनु खोलती ङिया ते जऊं ङिया।”
ईशु चे विरोध मां साजिश
(मत्ती 26:1–5; मरकुस 14:1,2; लूका 22:1,2)
45बल्ति जको यहूदी लौक मरियम चे लारे आले हुते, ते ईशु चे ईं काम ङेखती, वांचे महु ब़ोहता ने ओचे उपर विश्वास करला। 46पर वांचे महु कोच्छ लौका ने फरीसिया चे गोढु जती कर ईशु चे कामा ची खबर ङिली। 47ऐचे पर प्रधान याजका ते फरीसिया ने महासभा हकारली ते केहले, “अम्ही करु का? ईं बन्दे तां घणे चमत्कार चे चैन्ह ङिखाणे। 48अगर अम्ही ओनु यूंही छोड़ती ङिऊं, तां सारे ओचे उपर विश्वास करु लाग़ती जाये, ते बल्ति रोमी बन्दी इठे आती जाये ते अम्चे मन्दरा नु ते देशा नु खत्तम करती नाखे।”
49तब वांचे महु काइफा नांवा चा हेक शक्स ने जको ओ साला चा महायाजक हुता, वानु केहले, “तम्ही कोच्छ वी ना जाणा! 50ते ना ईं समझा पले कि तम्चे वास्ते ईं भले छै कि अम्चे लौका चे वास्ते हेक इन्सान मरो, ते सारी जाति नाश ना हो। ”
51हा बात ओणे आपणी तरफा कनु कोनी केहली, पर ओ साला चा महायाजक हुता भविष्यवाणी करली कि ईशु यहूदी लौक वास्ते मरी, 52ते ना सेर्फ ओह यहूदिया चे वास्ते, बल्कि ऐवास्ते कि नरीकारा ची खिंडली आली ऊलाद्धी नु हेक करती ङियो।
53ओही ङिहां कनु वे ओनु मारणे ची साजिश करु लाग़ले। 54ऐवास्ते ईशु ओह समय कनु यहूदिया मां उजागर हुती कर कोनी फिरला। पर उठु बरब्यान चे गोढु इफ्राईम नांवा चा हेक शहरा नु चाह्ला गेला, ते आपणे चैला लारे उठी रेहला।
55यहूदिया चा फसह चा तेंहवार गोढु हुता, ते घणे लौक फसह कनु पेहले देहात कनु यरुशलेम नु गेले कि आपणे आप नु यहूदी रीति चे अनुसार शोद्ध करो। 56वे ईशु नु सोधु लाग़ले, मन्दरा चा बेहड़े मां खड़े हुती आपस मां किहुं लाग़ले, “तम्ही का सोचा पले? का ओ तेंहवारा मां नी आवी?” 57प्रधान याजका ते फरीसिया ने हा आज्ञा ङिली कि अगर कुई ईं जाणे कि ईशु किठे छै तां बावड़ो कि ओनु पकड़ सग़ु।
Currently Selected:
यूहन्ना 11: ODR
Tõsta esile
Share
Copy
Want to have your highlights saved across all your devices? Sign up or sign in
CC BY-NC-ND 4.0