यूहन्ना 12
12
ईशु चे पग़्ग़ा उपर इत्र नाखणा
(मत्ती 26:6–13; मरकुस 14:3–9)
1ईशु फसह कनु छाऔ ङिहें पेहले बैतनिय्याह मां आला, जिठे लाजर रेहता, जानु ओणे मरले आला महु जिवाले। 2ओठे ईशु वास्ते वाणे खाणे तियार करले। मारथा ने ओनु घालती ङिले, ईशु चे लारे जको खाणे खई ब़ेहले हुते लाजर वी वांचे मां हेक हुता। 3#लूक 7:37,38तब मरियम ने जटामांसी चा आधा सेर बेशकीमती इत्र गेहती कर ईशु चे पग़्ग़ा उपर नाखला ते आपणा माला लारे ओचे पग़्ग़ लुहले। इत्र ची खुश्बु लारे सारे घर महकती गेले। 4पर ओचे चैला महु यहूदा इस्करियोती नांवा चा हेक चैला, जको ओनु पकड़ावणे उपर हुता, किहुं लाग़ला, 5“हा इत्र तीन साऔ चान्दी चे सिक्का मां बेचती कर कंगाला नु कां कोनी ङिला गेला?” 6ओणे हा बात ऐवास्ते कोनी केहले कि ओनु कंगाला ची चिन्ता हुती पर ऐवास्ते कि ओह चोर हुता। ओचे कनु वांची ग़ुथली रेहती, ओचे मां जको कहीं नाखले जते ओ काढ़ती गेहता।
7ईशु ने केहले, “विनु रिहुं ङिया, विनु ईं माये दफनाले जाणे चे ङिओ चे वास्ते मेहलु ङिया। 8कांकि कंगाल तां तम्चे लारे सदा रिही, पर मैं तम्चे लारे सदा नी रिही।”
लाजर चे विरोध मां योजना
9फसह चे तेंहवारा उपर आली यहूदिया ची बङी भीड़ नु जिसे बेले हा पता लाग़ला कि ईशु उठी छै ते वे ओनु मिलणे वास्ते आले, ना सेर्फ ओनु पर ओ लाजर नु वी ङेखणे वास्ते वी, आली हुती जानु ईशु ने मरणे चे बाद बल्ति जीते करती ङिलते। 10बल्ति प्रधान याजका ने लाजर नु वी मारती नाखणे ची योजना बणाली, 11कांकि ये वजह घणे सारे यहूदी आपणे नेता नु छोड़ती कर ईशु उपर विश्वास करु लाग़ती गेलते।
ईशु चे यरुशलेम मां जाणे
(मत्ती 21:1–11; मरकुस 11:1–11; लूका 19:28–40)
12आग़ले ङिओ फसह चे तेंहवारा उपर आली भीड़ी ने जिसे बेले ईं सुणले कि ईशु यरुशलेम मां आवे पला। 13वे खज्जी चा लड़ीया चती कर ओनु मिलणे वास्ते टुरती पले, वे ऊंची अवाजी मां किही पलते,
“होशना!
धन्न छै ओ जको प्रभु चे नांवा लारे आवे पला
ओ जको इस्राएल चा राजा छै!”
14बल्ति ईशु नु हेक गाहड़ो चे ब़च्चे मिड़ले ते ओ ओचे उपर ब़ेसती रेहला, जिसड़े कि धर्मशास्त्र मां लिखले पले,
15“हे सिय्योन ची धूउ, ङर ना!
ङेख, दुधा राजा
गाहड़ो चे ब़च्चे उपर ब़ेहला आवे पला।”
16ओचे चैले ये बाते नु पेहले तां समझले कोनी हुते। जिसे बेले ईशु ची महिमा ङिसली, वानु याद आले कि हा बात ओचे बारे मां लिखली आली हुती ते लौका ने ओचे लारे इसड़ा सलूक करला। 17बल्ति भीड़ चे लौका ने जको ओह बेले ओचे लारे हुते, हा ग़वाही ङिली कि लाजर नु कब्री महु हकारती मरले आले महु जिवाले। 18ऐवास्ते लौक ओनु मिलणे वास्ते आले, कांकि वाणे सुणले हुते कि ओणे हा चमत्कार चा चैन्ह ङिखाणला। 19बल्ति फरीसिया ने आपस मां केहले, “सोचा तां सही, कि तम्चे कनु कोच्छ ना बण सग़ी, ङेखा सारा संसारा ओचे भांसु टुरती पला!”
20जको बन्दी ओ तेंहवारा मां अराधना करने वास्ते आली हुती वांचे महु कई यूनानी हुती। 21वाणे गलील चे बैतसैदा चे रेहणे आले फिलिप्पुस कनु आती कर बिनती करली, “भाई साहब, अम्ही ईशु लारे मिलणे चाहु।” 22फिलिप्पुस ने आती अन्द्रियास नु केहले, बल्ति अन्द्रियास ते फिलिप्पुस ने जती ईशु नु केहले।
23ऐचे उपर ईशु ने वानु केहले, “ओ समय आती गेला कि मैं इन्सान चे पूता ची महिमा हो। 24मैं तम्हानु सच्च-सच्च किहे, कि जब तक कणकी चा ङाणा भोंये मां ढेती कर खत्तम ना हुती जई, ओ हेकला रिहे। पर जिसे बेले खत्तम हुती जाये, ते ब़ोहत फल आणे। 25#मत्ती 10:39; 16:25; मरकु 8:35; लूक 9:24; 17:33जको आपणी जीन्दगी नु प्यारे जाणे ओ विनु गुंती ब़ेसे, ते जको ये दुनिया मां आपणी जीन्दगी नु प्यारे ना जाणी, ओ अनन्त जीवन चे वास्ते विची रक्षा करी। 26अगर कुई माई सेवा करने चाहवे तां माये भांसु टुरणे पड़ी, जिठे मैं छै, उठे माया दास वी हुवी। अगर कुई माई सेवा करे तां माया ब़ा ओचा कद्दर करी।
ईशु चे जरिये आपणी मौत चा इशारा
27“हमा माये जी घब़रावे पले, ऐवास्ते हमा मैं का किहे? ‘हे ब़ा, मनु ये घड़ी कनु बचा’ ना, कांकि मैं येही वजह कनु येही घड़ी मां पुज़ला। 28हे ब़ा, तु दुधे नांवा ची महिमा ङिखाण!”
बल्ति स्वर्ग़ा महु हा अवाज आली, “मैं माई महिमा ङिखाणली, ते नेरी वी ङिखाणी।”
29बल्ति जको लौक ओठे भिलते ये अवाज नु सुणती कर कई किहुं लाग़ले, “बदल गरजला।”
ङुजे किहुं लाग़ले, “कुई स्वर्ग़दूत ने ओचे लारे बात करली।”
30ऐचे उपर ईशु ने केहले, “हा अवाज माये वास्ते कोनी, पर तम्चे फायदे वास्ते आली। 31हमा ऐ संसारा चे न्यां चा समय आती गेला, हमा शैतान नु जको संसारा चा सरदार छै ओनु काढ़ती ङिले जई। 32ते जब मैं धरती कनु ऊंचे उपर चढ़ाला जई, तां सारा नु आपणे गोढु हकारती गिही।” 33इसड़े केहती कर ओणे ईं प्रकट करती ङिले कि ओ किसड़ी मौत लारे मरी। 34ऐचे उपर लौका ने केहले, “अम्ही व्यवस्था ची हा बात सुणली कि मसीह हमेशा रिही, बल्ति तु कां किही कि इन्साना चा पूत ऊंचे उपर चढ़ाला जाणा जरुरी छै? हा इन्साना चा पूत कूण छै?” 35ईशु ने वानु केहले, “सोज़ले हमा थोड़ी देर तक तम्चे बीच मां छै। जब तक सोज़ले तम्चे लारे छै तब तक टुरते रिहा, इसड़ा ना हो कि अन्धारे तम्हानु आती घेरे। जको अन्धकार मां चले ऊं ना जाणी कि किंघे जाये पले। 36जब तक सोज़ले तम्चे लारे छै सोज़ले उपर विश्वास करा, कि तम्ही सोज़ले ची ऊलाद्ध बणा।” ये बाता केहती, ईशु चाह्ला गेला ते वाकनु लुकला रेहला।
37ओणे वांचे सामणे इतने चैन्ह ङिखाणले, तां वी वाणे ओचे उपर विश्वास कोनी करला। 38कि यशायाह भविष्यवक्ता चा वचन पूरा हो जको ओणे केहले,
“हे प्रभु, केहणे अम्चे समाचारा उपर विश्वास करला?
ते प्रभु ची ताकत काये उपर उजागर हुली?”
39ऐवास्ते वे विश्वास ना कर सग़ले, कांकि, यशायाह ने ईं वी केहले,
40“ओणे वांची आंखी अन्धीया
ते वांचे मन कठोर करती ङिले,
कङी इसड़े ना हो कि वे आंखीया लारे ङेखो,
ते मन लारे समझो,
ते माये सनु फिरो
ते मैं वानु चंगा करे।”
41यशायाह ने ये बाता नु ऐवास्ते केहले कि ओणे ईशु ची महिमा ङेखली ते ओणे ओचे बारे मां बाता करलीया। 42तां वी हाकिमा महु घणा ने ओचे उपर विश्वास करला। पर फरीसिया ची वजह कनु उजागर मां ना मनते कङी इसड़े ना हो कि प्राथनाघरा महु काढ़ले जऊं, 43कांकि लौका ची वाह-वाह वानु नरीकारा ची प्रशंसा कनु ज्यादा प्यारी लाग़ती।
ईशु चे वचन न्यां चा अधार
44ईशु ने ऊंची अवाजी मां केहले, “जको माये उपर विश्वास करी ओह माये उपर ना, पर माये भेज़णे आले उपर वी विश्वास करे। 45जको मनु ङेखे ओह माये भेज़णे आले नु ङेखे। 46मैं संसारा मां सोज़ले हुती कर आला छै। कि जको कुई माये उपर विश्वास करे ऊं अन्धारे मां ना रिहो।
47“अगर कुई माया बाता सुणती कर ना मनी, मैं ओनु दोषी ना ठहरावी। कांकि मैं संसारा नु दोषी ठहराणे वास्ते कोनी, पर संसारा चा उद्धार करने वास्ते आला। 48जको मनु तोच्छ जाणे ते माया बाता नु ना मनी, ओनु दोषी बणावणे आला हेक छै, यानि जको वचन मैं केहले वे ही आखरी ङिओ मां ओनु दोषी ठहरावी। 49कांकि मैं आपणे तरफु बाता कोनी केहलीया, पर नरीकार ब़ा जेह्णे मनु भेज़ले ओणे मनु आज्ञा ङिली कि का-का किहे ते का-का ब़ोले। 50मैं जाणे कि ओची आज्ञा अनन्त जीवन सनु गेहती जाये। ऐवास्ते मैं ऊं किहे जिंवे नरीकार ब़ा ने मनु केहले यूंही मैं ब़ोले।”
Currently Selected:
यूहन्ना 12: ODR
Tõsta esile
Share
Copy
Want to have your highlights saved across all your devices? Sign up or sign in
CC BY-NC-ND 4.0