प्रेरितां चे काम 5
5
हनन्याह ते सफीरा ची धोक्केबाजी
1हनन्याह नांवा चे हेक इन्सान, ते ओची घराआली सफीरा ने मिलती कर आपणी भोंये महु हेक खेत बेचला। 2ते कीमती महु कहीं मेहले जती, ते हा बात ओची घराआली वी जाणती, ते ओचा हेक हेंस्सा आणती कर प्रेरितां चे पग़्ग़ा मां मेहला जती।
3पर पतरस ने केहले, “हे हनन्याह, शैताना ने दुधे मना मां हा बात कां घाली कि तु पवित्र आत्मा नु कूड़ मार, ते भोंये ची कीमती महु कहीं मेहल जती? 4जिसे बेले वा दुधे गोढु रेहली, का दुधी ही कोनी हुती? ते जिसे बेले बिकती गेली तां दुधे वशा मां कोनी हुती? तु हा बात आपणे मना मां कां सोचली? तु बन्दा कनु कोनी, पर नरीकारा नु कूड़ मारले।”
5हा बात सुणते ही हनन्याह ढेती पला ते मरला गेला। ते सारे लौक ये बाते नु सुणती कर घणी ङरती गेली। 6ते बल्ति कोच्छ जवाना ने ऊठती कर ओची अर्थी बणाली ते ब़ाहर जती कर दफनाती ङिले।
7करीबन तीन घण्टा चे बाद ओची घराआली, जको कोच्छ हुले हुते ना जाणती हुली भीतर आली। 8बल्ति पतरस ने विनु केहले, “मनु बावड़, कां तम्ही वा भोंये इतने मां ही बेचली हुती?”
विणे केहले, “हव्वे, इतने मां ही।”
9पतरस ने विनु केहले, “हा का बात छै, कि तम्ही ङोनी प्रभु ची आत्मा ची परीक्षा वास्ते ऐका करला? ङेख, दुधे मुणसा नु दफनाणे आले हालि ब़ाहरु ही भिले ते तनु वी ब़ाहर गेहती जाये।” 10बल्ति वा ओही बेले ही पतरस चे पग़्ग़ा मां ढेते ही मरली गेली। ते जवाना ने भीतर आती कर विनु मरले आले ङेखले, ते ब़ाहर चती कर विचे मुणसा लारे पूरती नाखले। 11ते सारे विश्वासी, ते जितने ये बाते नु सुणने आले लौका उपर ङर पड़ती गेला।
प्रेरितां चे जरिये घणा सारा ची चंगाई
12प्रेरितां चे हाथु घणे चैन्ह ते अदभोत काम लौका चे बीच ङिखाणले जते। वे सारे विश्वासी लौक हेक चेत्त हुती कर सुलैमान चे ओसारे मां भेले हुते रेहते। 13पर नेरा लौका महु काई वी हा हिम्मत ना हुती कि ओठे जती कर वांचे मां मिलु जती, पर फेर वी लौक वांची बढ़ाई करते रेहते। 14ते विश्वास करने आले ब़ोहत सारे मर्द ते असतरीया प्रभु ची कलीसिया मां होर वी ज्यादा आती कर मिलते रेहले। 15इठे तक कि लौक बिमारा नु सड़का उपर आणती आणती कर, खाटा ते तङीया उपर लिटाती ङिते, कि जिसे बेले पतरस आओ, ओची छां ही वांचे महु काये उपर पड़ती जाओ। 16ते यरुशलेम चे आस-पास चे शहरा महु वी ब़ोहत लौक बिमारा नु ते अशुद्ध आत्मा चे सताले आला नु आणती आणती कर, भेले हुते, ते सब आच्छे करती ङिले जते।
प्रेरितां चे कैदखाने मां नाखणे जाणे
17बल्ति महायाजक ते ओचे सारे साथी जको सदूकिया चे पंथ चे हुते, भड़कती खड़े हुले। 18ते ङुंहु प्रेरितां नु पकड़ती कर कैदखाने मां नाखले पती। 19पर राती नु हेक स्वर्ग़दूता ने कैदखाने चे दरवाजा नु खोलती कर वानु ब़ाहरु आणती कर केहले, 20“जावा, मन्दरा मां भिले रेहती, ये जीन्दगी चा सब बाता लौका नु सुणावा।” 21वे ईं सुणती कर ङिओ हुते ही मन्दरा मां जती कर उपदेश ङिऊं लाग़ले।
पर महायाजक ते वांचे साथीया ने आती कर महासभा नु ते इस्राएलीया चे सब बङका नु भेले करले, ते कैदखाने मां हा केहती कर भेज़ले कि वानु गेहली आवा। 22पर जिसे बेले अधिकारी कैदखाने मां गेले वानु वे ओठे कोनी मिड़ले, ते मुड़ती कर सनेसा ङिला कि, 23“अम्ही कैदखाने नु बङी होशियारी लारे बन्द करले आले हुते, ते पाहरेदारा नु ब़ाहरु दरवाजा उपर-उपर खड़े ङेखले, पर जिसे बेले दरवाजे खोड़ले, तां भीतर कुई कोनी मिड़ले।” 24जिसे बेले मन्दरा चे सिपाहीया चा सरदार ते प्रधान याजका ने हा बात सुणली, तां वांचे बारे मां बङी चिन्ता मां पड़ती गेले, “कि वांचे लारे हमा का हुले।”
25इतने मां किह्णी आती कर बावड़ले, “ङेखा, जानु तम्ही कैदखाने मां बन्द करले हुते, वे मन्दरा मां भिले बन्दा नु उपदेश ङी पले।” 26बल्ति ओही सरदार, आपणे कोच्छ सिपाहीया लारे जती कर, प्रेरितां नु गेहती आला, पर आपणी ताकती लारे ना, कांकि वे लौका कनु ङरते, कि लौक वांचे उपर पत्थराव ना करो।
27वाणे वानु बल्ति आणती कर महासभा चे सामणे भुकाणले ते महायाजका ने वाकनु पूछले, 28#मत्ती 27:25“का अम्ही तम्हानु चिताती कर आज्ञा कोनी ङिली हुती, कि तम्ही ऐ नांवा लारे उपदेश ना करजा? फेर वी ङेखा, तम्ही सारे यरुशलेम नु आपणे उपदेशा लारे भरती नाखले ते ओ शक्स चे लुहीं अम्ची गिच्ची उपर आणने चाहवा।”
29बल्ति पतरस ते नेरा प्रेरितां ने उत्तर ङिला, “बन्दा ची आज्ञा कनु बधती कर नरीकारा ची आज्ञा चा पालन करना ही अम्चा कर्म छै। 30अम्चे ङाङा-ब़ा चे नरीकारा ने ईशु नु जिवाले, जानु तम्ही क्रूसा उपर टांकती कर मारती नाखले ते। 31ओनु ही नरीकारा ने प्रभु ते उद्धारकर्ता ठहराती कर आपणे सज़्ज़े हाथा लारे ऊंचे करले, कि ओ इस्राएलीया नु मन फिरावणे ची ताकत ते पापा ची माफी दान करो। 32ते अम्ही यां बाता चे ग़वाह छिऊं, ते पवित्र आत्मा वी, नरीकारा ने ओनु ङिली, जको ओची आज्ञा मने।”
33ईं सुणती कर वे ब़लु पड़ती गेले, ते प्रेरितां नु मारती नाखणे चाह्ले। 34पर गमलीएल नांवा चा हेक फरीसी ने जको व्यवस्थापक ते सब लौका मां मनला आला हुता, महासभा मां भिले रेहती प्रेरितां नु थोड़ी देरी वास्ते ब़ाहरु करती ङेणे ची आज्ञा ङिली। 35बल्ति वानु केहले, “हे इस्राएली जको बाता यां बन्दा लारे करना चाहवा, सोचती समझती करजा। 36कांकि यां ङिहां कनु पेहले थियूदास ईं केहते हुले ऊठला कि, ‘मैं वी कोच्छ छै’ ते कुई चार साओ बन्दी ओचे लारे हुती पली, पर ओ मारला गेला ते जितने लौक ओनु मनते सारे इंगे-ऊंगे हुती कर मिटती गेले। 37ओचे बाद नांवे लिखवाणे चे ङिहां मां यहूदा गलीली ऊठला, ते कहीं लौक आपणी तरफ करती गेले। ओ वी मरती गेला ते जितने लौक ओनु मनते, सब खिंडती-पुंडती गेले। 38ऐवास्ते हमा मैं तम्हानु किहे पला यां बन्दा कनु दूर रिहा ते वांचे कनु कुई काम ना राखा, कांकि अगर हा योजना जा काम बन्दा चे तरफु हुवी तां मिटती जई। 39पर अगर नरीकारा चे तरफु छै, तां तम्ही वानु हरगिज मिटा नी सग़ा कहीं इसड़े ना हो कि तम्ही नरीकारा लारे वी भिड़ने आले ठहरा।”
40बल्ति वाणे ओची बात मनती गेली, ते प्रेरितां नु हकारती कुटवाले, ते हा आज्ञा ङिती कर छोड़ती ङिले, कि ईशु चे नांवा लारे बल्ति बाता ना करजा। 41वे ये बाते लारे खौश हुती कर महासभा चे सामणे चाह्ले गेले कि “अम्ही ईशु मसीह चे नांवा वास्ते बेकदरे हुवणे चे काबिल तां बणले।” 42वे हर ङिओ मन्दरा मां ते घरा-घरा मां उपदेश करने, ते ये बाते चा सुसमाचार सुणावणे कनु कि ईशु ही मसीह छै ना रुकले।
Currently Selected:
प्रेरितां चे काम 5: ODR
Tõsta esile
Share
Kopeeri
Want to have your highlights saved across all your devices? Sign up or sign in
CC BY-NC-ND 4.0