प्रेरितां चे काम 4
4
यहूदी महासभा चे सामणे पतरस ते यूहन्ना
1जिसे बेले पतरस ते यूहन्ना लौका नु ईं किही पलते, तां याजक ते मन्दरा चे सिपाहीया चा सरदार ते कहीं सदूकी वांचे उपर चढ़ती गेले। 2कांकि वे बङे गुस्से हुले कि पतरस ते यूहन्ना ईशु चे बारे मां सिखाते, ते ईशु चा उदाहरण ङिती-ङिती कर कि, मरला आला चे जीते हुवणे चा प्रचार करते, 3ते वाणे वानु पकड़ती कर ङुजे ङिओ तक कैदखाने मां राखले कांकि आथण हुती गेलते। 4पर वचन सुणने आला महु घणा ने विश्वास करला, ते वांची गिणती पाँच हजार मर्दा चे करीब हुती गेली।
5ङुजे ङिओ इसड़े हुले कि वांचे सरदार ते बङके ते शास्त्री।
6ते महायाजक हन्ना, ते कैफा, ते यूहन्ना, ते सिकन्दर ते जितने महायाजका चे घराणे चे हुते सारे यरुशलेम मां भेले हुले। 7ते पतरस ते यूहन्ना नु आधी मां भुकाणती पूछु लाग़ले, “तम्ही ईं काम किसी ताकती लारे ते किसे नांवा लारे करले?”
8बल्ति पतरस ने पवित्र आत्मा मां भरीती कर वानु केहले, 9“हे यां लौका चे सरदार, ते बङके, ऐ लंगड़े बन्दे लारे जको भलाई करली गेली, अगर आज़ अम्हा कनु ओचे बारे मां पूछताछ करली जाये, कि ओ किवें ठीक हुला, 10तां तम्ही सारे इस्राएली लौक जाणती गिहा कि ईशु मसीह नासरी चे नांवा लारे जानु तम्ही क्रूसा उपर चढ़ाले, ते नरीकारा ने मरले आला महु जिवाले, ईं बन्दे तम्चे सामणे भले चंगे भिले ले। 11हा ईशु मसीह ओही पत्थर छै,
“ ‘जानु तम्ही राजमिस्त्रीया ने तोच्छ जाणले ते,
ओ कूणे चे सिरे चा पत्थर हुती गेला।’
12ते कुई ङुजे चे जरिये उद्धार कोनी, कांकि सारे संसारा मां नेरे कुई ङुजे नां कोनी ङिले गेले, जाये जरिये अम्ही उद्धार गे सग़ु।”
ईशु चे नांवा वास्ते चैला नु धमकी
13जिसे बेले वाणे पतरस ते यूहन्ना चा होंसला ङेखला, ते ईं जाणले कि ये अनपढ़ ते सादा बन्दी छी, तां हैरान हुले, कि ये ईशु चे लारे रेहले हुते। 14पर ओ बन्दे नु जको ठीक हुला तां, वांचे लारे भिले ङेखती कर, यहूदी वांचे विरोध मां कहीं केह ना सग़ले।
15पर वानु महासभा चे ब़ाहर जाणे ची आज्ञा ङिती कर, वे आपस मां विचार करु लाग़ले, 16“अम्ही यां बन्दा लारे का करु? कांकि यरुशलेम चे सारे रेहणे आला उपर उजागर छै, कि यांचे जरिये हेक खास चैन्ह ङिखाणला गेला, ते अम्ही ओचा इन्कार ना कर सग़ु। 17पर ऐवास्ते कि हा बात लौका मां नेरी ज्यादा फैलती ना जाओ, अम्ही वानु धमकाऊं, कि वे ऐ नांवा लारे बल्ति कुई बन्दे लारे बाता ना करो।”
18बल्ति पतरस ते यूहन्ना नु हकारले ते चिताती कर ईं केहले, “ईशु चे नांवा लारे कहीं वी ना ब़ोलजा ते ना सिखाजा।”
19पर पतरस ते यूहन्ना ने उत्तर ङिला, “तम्ही ही न्यां करा, कि का ईं नरीकारा चे सामणे भले छै, कि अम्ही नरीकारा ची बाते कनु बढ़ती कर तम्ची बात मनु? 20कांकि ईं तां अम्हा कनु हो ना सग़ी, कि जको अम्ही ङेखले ते सुणले, ऊं ना किहुं।”
21बल्ति वाणे वानु धमकाती कर छोड़ती ङिले, कांकि लौका ची वजह वानु ङण्ड ङेणे चा कुई वजह ना मिड़ला, ऐवास्ते कि जको वारदात हुली हुती ओची वजह कनु सब लौक नरीकारा ची बढ़ाई करी पलते। 22कांकि ऊं बन्दे, जाये उपर हा चंगा करने चा चैन्ह ङिखाणला गेलता, चालीस साला कनु ज्यादा उम्री चे हुते।
पतरस ते यूहन्ना ची वापसी
23पतरस ते यूहन्ना छुटती कर आपणे साथीया चे गोढु आले, ते जको कोच्छ प्रधान याजका ते बङका ने वानु केहले हुते, वानु सुणाती ङिले। 24ईं सुणती कर वाणे हेक चेत्त हुती कर ऊंची अवाजी मां नरीकारा नु केहले, “हे स्वामी, तु ओही छी जेह्णे स्वर्ग़ ते धरती ते समुन्दर ते जको कोच्छ वांचे मां छी बणाले। 25तु पवित्र आत्मा चे जरिये आपणे सेवक अम्चे ब़ा दाऊद चे मुँहा कनु केहले,
“ ‘नेरीया जातिया ने हल्ला कां मचाला?
ते देश-देश चे लौका ने कां पुठीया बाता करलीया?
26प्रभु ते ओचे मसीह चे विरोध मां
धरती चे सारे राजे भिले रेहती गेले,
ते सारे हाकिम भेले हुती गेले।’
27 #
लूक 23:7–11;
मत्ती 27:1,2; मरकु 15:1; लूक 23:1; यूह 18:28,29 कांकि सच्चमां दुधे पवित्र सेवक ईशु चे विरोध मां, जानु तु अभिषेक करला, हेरोदेस ते पुन्तियुस पिलातुस वी नेरीया जातिया ते इस्राएली चे लारे ऐ शहरा मां भेले हुले, 28कि जको कोच्छ पेहले कनु दुधी ही ताकत ते मकसद लारे ठहराले हुते, ऊंही करो। 29हमा हे प्रभु, वांचीया धमकीया नु ङेख ते आपणे दासा नु हा वरदान ङे कि दुधा वचन बङे होंसले लारे सुणाओ। 30ते चंगा करने वास्ते तु आपणा हाथ बधा कि चैन्ह ते अदभोत काम दुधे पवित्र सेवक ईशु चे नांवा लारे करले जाओ।”
31जिसे बेले वे प्राथना करती चुकले, तां वा जग़हा जिठे भेले हुते हलती गेली, ते वे सारे पवित्र आत्मा लारे भरीती गेले, ते नरीकारा चा वचन होंसले लारे सुणाते रेहले।
विश्वासीया चा सहायक जीवन
32 #
प्रेरि 2:44,45 ते विश्वास करने आली कलीसिया हेक चेत्त ते हेक मन चीया हुतीया इठे तक कि कुई वी आपणी जायजात आपणी ना केहते, पर सब कोच्छ साझे चे हुते। 33ते प्रेरित बङी ताकती लारे प्रभु ईशु चे जीते हुवणे ची ग़वाही ङिते रेहले ते वांचे सारा उपर बङा अनुग्रह हुता। 34ते वांचे मां कुई वी गरीब कोनी हुते, कांकि जाये कनु भोंये जा घर हुते, वानु बेचती-बेचती कर, बिकली आली चीजा चा कीमत आणते, ते ओनु प्रेरितां चे पग़्ग़ा मां मेहलती ङिते, 35ते जिसड़ी जाई जरुरत हुती, ओचे अनुसार हर-हेक नु बांटती ङिते।
36ओठे यूसुफ नांवा चा हेक शक्स हुता जको साइप्रस मां पैदा हुला हुता ते लेवी गोत्र चा हुता। प्रेरित ओनु बरनबास (जाया मतलब “शान्ति ङेणे आला”)केहते। 37ओची कोच्छ भोंये हुती, जको ओणे बेचली, ते कीमत चे रुपये आणती कर प्रेरितां चे पग़्ग़ा मां मेहले आती।
Currently Selected:
प्रेरितां चे काम 4: ODR
Tõsta esile
Share
Kopeeri
Want to have your highlights saved across all your devices? Sign up or sign in
CC BY-NC-ND 4.0