Fúcihum 24
24
Aburaham naŋes akoña bu nꞌIsaak
1Aburaham nafallenfallen máamak ban Acehériit mee ásoonienoosoonien nu wanoowan. 2Funak fucee, Aburaham narok ájagagaool anafaan, hacookoore mee fubajool peepe : « Ubaŋ gañeni nꞌfataam fuboŋom min ukaliom.#24.2 Dó múkaaniinaay mara Ehébura. Naŋ min gapana gaagu gara eniin guñaao mee, mo may wan ukali mee uñaao mee. Naŋ min an nja abaji to mee, mo may wan ukali mee ubil mee ebaañ bu mꞌbúbajum bara Aburaham. 3Ukaliom nꞌAcehériit mee, Atúuha hátuut mee émit nꞌetaam, mara mat uŋes aleehom Isaak akoña dáare mꞌmof me mara Kanaan, dan icin mee. 4Bare aw be ejow bu mꞌmofom, dó nꞌfiilom min uŋesulom bo akoña bu nꞌaleehom Isaak. » 5Ñeer ájagagaool násuupool arogool : « Júhe may akoña aahu mat asoŋ galagenulom bu baabe mꞌmof me. Teer íjuhe iŋar aleehi bu bo mꞌmof man úpurulo mee ? » 6Aburaham narogool : « Jambil uyok neŋar aleehom bu bo. 7Acehériit mee, Atúuha ammee nꞌémit, hakaanaam mee nípur yaŋ paayom, mꞌmof mara fiilom, harogaam mee ban nakaliom be esen mof me búbajumom, ho be eboñ amalayikaool tíro min acookoor bulagoi mbil újuh úŋarul bo akoña bu nꞌaleehom. 8Eéni akoña aahu asoŋut galagenuli, gakali gan ukali mee gubiloohi ejok. Bare jambil uŋar aleehom bu bo. » 9Ñeer ájagaga aahu nabaŋ gañenool nꞌfataam fuboŋ anafaanool Aburaham min akaliool mara ho be ekaan naŋ min alobool mee.
10Púr to, ájagaga aahu naŋar siñonkome guñen, nacaap wareg mee bajak dó nꞌfubaj fara anafaanool Aburaham afaak, najow kuhi nꞌgara ésuk yara Nahoor káŋ bu bo mꞌmof mara Mesopotami. 11Bátiiŋerool bo gárusa, nan nja ukoña gujow mee gáyij, nakaan siñonkome saasu nsiyah gújuul cik ekoloŋ yaayu. 12Ñeer náciin arok : « Acehériit mee, Atúuha hara anafaanom Aburaham, uliigom gáriiken gan ubaj mee nu ho min iñow jaat akoña han ijaalo mee fuŋes bu nꞌIsaak. 13Injé umee nicige ekoloŋ yaayu tan síjur bugara ésuk yaayu gommee néjool bu gáyij. 14Ajúr han ibil mee erok : “Utíigen jípalaŋi min íjuh irem”, násuupom arogom : “Urem ufaak, níjii siñonkomei sirem”, no nibil mee émir mara ho nucaap mee bu nꞌIsaak ammee ájagagai ban úriikendiiken anafaanom. »
15Ajágaga Aburaham bafaagerut éciin, Rebeka nápurul jípalaŋ nꞌgabandool. Rebeka aleeh Betuel. Betuel aleeh Milika bugo nꞌNahoor atii Aburaham. 16Ajúr aahu ajajak pak, ban ámirut amaañen. Nawalo bu nꞌekoloŋ yaayu, náyij jípalaŋool afaak, nájiŋul. 17Ñeer ájagaga Aburaham natey ngurehoor nꞌRebeka narogool : « Ubonket újiom jal fáriit nꞌjípalaŋi irem. » 18Násuupool : « Paam, uyab urem. » Nasommen awalen jípalaŋool min asenool arem. 19Rebeka nan asenool mee arem afaak, narogool : « Níyijul may siñonkomei sirem sipooñ. » 20Nasommen awuhul mal maamu nꞌgaŋant, natey abaañ áyijul bu nꞌsiñonkome saasu. 21Ajágaga aahu nañeeroorool balobut be émir teer Atúuha akankaan bulago'ool mbujak.
22Nan siñonkome saasu sirem mee sifaak, amaañen aahu nasenool enugunuur yara éñundu son gúñallak gúruba bu nꞌguñenool : dó peepe éwurus yálebilebi nejak. 23Afaak, nasonkenool arogool : « Añúm, ay abaji ? Ubonket ugaanom. Dó yaŋ paayi babaj tan íjuhe iŋot ínje mꞌbuganom ? » 24Rebeka násuupool arogool : « Injé Betuel abajaam, han Milika bugo nꞌNahoor gubaj mee. » 25Afaak nabenen arogool : « Síndo'oli babaj éful mꞌmufenaay son tan jíjuhe jiwalen njiŋot. » 26Ñeer ájagaga aahu nayah gújuul náciin Acehériit mee. 27Narok : « Nisasal Acehériit mee, Atúuha hara anafaanom Aburaham, mara náriikenool máaamak. Ho ajawulenaam mee káŋ bu nꞌfiil fara anafaanom Aburaham. »
28Ñeer ájur aahu natey bu yaŋ jaaool nagaaniil wabaj mee peepe. 29Tooge Rebeka nababaj áliinaay gurogool Laban. Laban nápurul fús, natey bu bo nꞌájagaga aahu ban ammee cik ekoloŋ yaayu, 30mara nañoñow enugunuur yaayu son gunamar gaagu nꞌguñen áliinool, ban najanjam Rebeka negaan wan gulobulo nꞌájagaga aahu. Nátiiŋ, natook ájagaga aahu son siñonkomeool cik ekoloŋ yaayu. 31Narogool : « Aw han Acehériit mee ásoonien mee, waa ucile non baabe tíyaŋ ? Ujaal bu síndo'oli ! Icookoocookoor yaŋ yaayu son tan siñonkomei sibil mee galako. » 32Ñeer ngujow bu yaŋ Laban, ngujal min guwalen búteb siñonkome saasu, ngusen so mufenaay son éful. Ngúŋarul mal gusen ájagaga Aburaham bugo nꞌgátiinenulool mee min gutaas goohiil. 33Ngutebuliil sinaaŋ, ájagaga Aburaham narogiil : « Mat íjuh ícaho ínje balobut waŋarulaam mee bu taahe. » Laban narogool : « Ñeer ulob ! »
34Amaañen aahu narok : « Injé ájagaga Aburaham. 35Acehériit mee násooniensoonien fanfaŋ anafaanom min akaan an háaamak. Asenoosen sísaaja, sijaameen, siyaha, síkori son éwurus, újagaga umaañen nꞌukoña, siñonkome son sifalo. 36Saara akoña Aburaham abajoobaj aleeh amaañen mꞌbafallenerool, ban anafaanom asensen fubajool peepe aleehool. 37Anafaanom arogandok ikaliool mara mat iŋes akoña bu nꞌaleehool, mꞌmof mara Kanaan dan acin mee. 38Bare narogom aw be ejow bu nꞌfiilom nꞌyaŋ yara paayom nuŋesulom bo akoña bu nꞌaleehom. 39Ñeer nirogool : “Júhe akoña aahu mat asoŋ galagenulom.” 40Narogom : “Ikaanekaan nanoonan wásuum mee Acehériit mee. Ho be éboñul amalayikaool bu nꞌaw min bulagoi búsuum. Nuŋarulom akoña dó nꞌfiilom nꞌyaŋ paayom, bu nꞌaleehom Isaak. 41Bare éeni útiiŋ dó nꞌfiilom, gusoŋut gakahen akoña aahu min ájool ; aw be epak nꞌgakali gan ukali mee.” »
42Ajágaga Aburaham naroŋ nelob : « Jaat nan ítiiŋulo mee to nꞌekoloŋ yaayu, níciin irok : “Acehériit mee, Atúuha hara anafaanom Aburaham, éeni maregen ukankaan min bulago'om bujak, 43ñeer ínje umee nicige ekoloŋ yaayu. Ajúr abil mee épurul bu gáyij, han ibil mee erok ‘újiom mal fáriit nꞌjípalaŋi irem’, 44ban násuupom arogom ‘urem ufaak, níjii siñonkomei sirem’, ho abil mee ekaan akoña han Acehériit mee acaap mee bu nꞌaleeh anafaanom.” 45Bala ifaak éciin, Rebeka nápurul nꞌjípalaŋool dó nꞌgaband. Nawalo bu bo nꞌekoloŋ yaayu náyijul. Nirogool : “Ubonket újiom mal irem.” 46Nátiiŋ gawalen jípalaŋool narogom : “Urem, ban be esen may siñonkomei sirem.” Ñeer nirem, nasen may siñonkome saasu sirem. 47Púr to, nisonkenool irogool : “Añúm, ay abaji ?” Narogom : “Betuel abajaam, han Milika bugo nꞌNahoor gubaj mee.” Nikaanool enugunuur yaayu nꞌéñunduool son gunamar gaagu nꞌguñenool. 48Ifaak, niyah gújuul min íciin Acehériit mee. Isasal Acehériit mee, Atúuha hara anafaanom Aburaham mara najawulenaam min bulago'om bujak, min íjuh íŋarul aleeh akoña hara atii anafaanom Aburaham bu nꞌaleehool Isaak. 49Ñeer, éeni buguul bu gáriiken anafaanom, njilobom. Naŋ may jibiloot ekaan, njigaanom min ijow nꞌgapana gacee. »
50Laban bugo mꞌBetuel ngurogool : « Naŋ min kaan mee fuliik fara Acehériit mee, óli ubajut to furim. 51Rebeka umue fácili, uŋarool nujow mbil akaan akoña hara aleeh anafaani, naŋ min Acehériit mee aliik mee nogoor. »
52Ajágaga Aburaham nan ajam mee baloberiil, nayah gújuul káŋ bu nꞌetaam min asal Acehériit mee. 53Púr to, náŋarul búsangen bara síkori nꞌéwurus son wañ asen Rebeka, nasen may fubaj fajajak áliinool Laban bugo nꞌjaaool. 54Afaak, kindiŋ ájagaga aahu nꞌgupaalool ngúcaho ngurem, nguŋot to.
Nan guyiho mee mꞌbújom, ájagaga Aburaham narok Laban bugo nꞌjaaool : « Jikahenóli min ubaañ bu bo nꞌanafaanom. » 55Alíin Rebeka bugo nꞌjaaool ngúsuupool : « Paañeer jikahóli ho taahe nꞌgunak guñen, kindiŋ njijow. » 56Narogiil : « Jambil jibaŋom taahe. Acehériit mee akankaan min bulago'om bujak. Jikahenom nibaañ bu bo nꞌanafaanom. » 57Ngurogool : « Uwoogulaal ájur aahu min ujamaal gapinoorool. » 58Ñeer ngúwoogul Rebeka min gusonkenool : « Aw ñeer mee, usonsoŋ ejow buguul nꞌamaañen he ? » Narogiil : « Eem. » 59Ñeer Rebeka, buganool ngukahenool bugo nꞌakoña háwayilool mee min gujawoor nꞌájagaga Aburaham nꞌgupaalool. 60Fiil fara Rebeka nfúduwaool :
« Alíinoli, Emít ekaan búbajumi bumeeeŋ,
ban mbuheek ulahooriil. »
61Ñeer Rebeka nayuho bugo nꞌújagagaool ukoña ngujiŋ siñonkome saasu min gujawoor nꞌamaañen aahu. Maa ñeer ájagaga aahu aŋar mee Rebeka ngujow.
62Tooge Isaak min ápurulo bo nꞌekoloŋ yan gurege mee Laahay-Rooy najow acin para mꞌmof mara Negeew. 63Funak fucee gárusa, nápur ajawoor ho noonool nꞌurager waawu. Náraahulo, naŋanden siñonkome néjool bu bo nu ho. 64Rebeka may náraahulo, naŋanden Isaak. Nawaloúl nꞌeñonkome yaayu. 65Nasonken ájagaga aahu : « Amaañen aahu umu ammee néjool nurehooraal baabe nꞌurager we, ay hoom ? » Narogool : « Umu anafaanom. » Ñeer Rebeka naŋar futiko'ool aguben buhulool.
66Ajágaga aahu nagaan Isaak wan akaanulo mee peepe. 67Isaak naŋar Rebeka árur dó nꞌéguut yara jaaool Saara. Nayabool akaan akoñaool, nacamenool. Maa Isaak búyegehool bubeb mee nꞌecet yara jaaool.
Currently Selected:
Fúcihum 24: gsl
Tõsta esile
Share
Kopeeri
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.