Fúcihum 25
25
Búbajum Aburaham nꞌKetura
1Aburaham nabaañ ayab akoña acee gajaool Ketura. 2Nabajool guleeh gumaañen gammee : Simiran, Yokusan, Medan, Midian, Yisebak, nꞌSua. 3Yokusan abaj mee Saaba bugo nꞌDedan. Dedan nabaj bugara Asúur, Letuus, nꞌLáum. 4Midian nabaj guleeh gumaañen gammee : Efa, Efer, Hanok, Abida, nꞌElida. Bugo peepe búbajum bara Ketura.
5Aburaham akakat fubajool peepe Isaak. 6Bare ájiijii dó guleeh bugara ukoñaool gan akogut mee. Ja guroŋool, nápureniil gukuhi aleehool Isaak bu mꞌmof mammee ban bunak búpureul mee.
Ecet Aburaham
7Aburaham nabaje símit ceme nꞌsímit gafaŋ gúfaajiir nꞌguñen gaat (175), 8nacet. Buroŋool bubaabaak, fúfaanulool fujajak. Emít neŋarool. Najow atook bo sipaayool gufaan gacet mee.
9Ñeer guleehool Isaak bugo nꞌIsumayeel ngufogool dó mꞌbúwaay baabu bammee Makapela cik Mamure, mꞌbarager ban Efuroŋ aleeh Sowaar, ahiitiit aahu, acileen mee. 10Barager baabu, ban Aburaham anoom mee nꞌehiitiit yaayu min afok akoñaool Saara, dó may ngufogool. 11Mꞌbaceher Aburaham, Atúuha násoonien Isaak hacin mee cik ekoloŋ yara Laahay-Rooy.
Fiil fara Isumayeel
12Ufe fiil fara Isumayeel, aleeh Aburaham bugo nꞌAgaar hápurulo mee Esípt, amiigeel hara Saara. 13Isumayeel, guleehool gumaañen mꞌbutuunooriil bugo gommee : Nebayot ammee aleehool anafaan, Kedar, Adibeel, Mibusam, 14Misema, Duma, Masa 15Hadad, Tema, Yetur, Nafis, nꞌKedema. 16Bugaage gommee guleeh Isumayeel, nkaan uyooŋ woono guñen nꞌúruba. Aleehóoleeh nakankaan anafaan hara gayooŋool ban naŋar gajaool akaan ésugool son músuk magongen yo mee. 17Isumayeel abaje símit ceme nꞌsímit gafaakan nꞌguñen gaat nꞌsíruba (137) min kindiŋ acet. Najow atook bo sipaayool gufaan gacet mee. 18Búbajumool bucincin kábiriŋ Hawila káŋ bu Súur nꞌgapana gara Esípt jooŋoor Asúur. Guleeh Isumayeel ulahoor buganiil peepe.
Sakob bugo nꞌEsawu
19Waawe ubaj mee nꞌfiil fara Isaak, aleeh Aburaham. Aburaham abaj mee Isaak. 20Isaak nan abaj mee símit gafaŋ gúruba (40), nayab Rebeka áliin Laban. Rebeka paayool Aram nápurulo, gajaool Betuwel. Nacin mꞌmof man guroge mee Padan-Aram. 21Isaak nahuoor Acehériit mee mara akoñaool nabajut mee aleeh. Acehériit mee najam báciinerool nabonket, nakaan min akoñaool Rebeka aŋar búteb. 22Guleehool nak gulonkoor dó nꞌfarool. Rebeka nakaaw arok : « Mee tíntiiŋ mo ? » Najow asonken Acehériit mee. 23Acehériit mee narogool :
« Mof múruba mon dó nꞌfari,
uyooŋ úruba won dó, ban wo bu gafanjoor.
Bare ganur be eheek gapaal go.
Aleeh átiyaara bu gáani ájagaga hara árubahen. »
24Nan funagool fútiiŋ mee, nguñow mara guleeh gúruba naakene. 25Aleeh átiyaara nápurul ájuuk, nafalet naŋ énunkureŋ. Ngurogool Esawu (yo yommee : afalefalet). 26Arúbahen nápurul min ajoge futonj fara atiool. Ngurogool Sakob (yo yommee « ajoga gutonj » son « abantena. » ) Nan gubaji mee, paayiil Isaak babajer símit gafaŋ gúfaajiir (60).
27Guleeh gaagu nan guhank mee, Esawu nakaan ayima háamak hara fúkanga ban ápureriit nꞌfutaŋaat. Sakob nakaan an abebeb, alakoa síndo. 28Isaak mara gacamenool eluu yara futaŋaat, búyegehool mbon nꞌEsawu. Rebeka, ho nacamen Sakob.
29Funak fucee, Sakob násiil súum. Tooge Esawu babaañulo nꞌfutaŋaat min ayoge máaamak. 30Esawu narok Sakob : « Iyoyok tambi, núsiisiil júuk, ubonket újiiom ímer básiileri bájuuk mee mee. » (Yo ecil mee ngurogool Edom, yo yommee : júujuuk). 31Sakob násuupool arogool : « Umundum unoomenom funafaanehi peh ! » 32Esawu narogool : « Injé be ecet mꞌbacaar. Funafaanehom waa nfunafa'aam ? » 33Sakob narogool : « Ukali peh ! » Esawu nakaliool mara nanoomenoonoomen funafaanet faafu. 34Ñeer Sakob nasenool fúmbuur son gusaak gan ásiil mee atiñ afaak, narem, nayiho ajow. Maa Esawu ápuren mee búyegehool nꞌfunafaanet faafu.
Currently Selected:
Fúcihum 25: gsl
Tõsta esile
Share
Kopeeri
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.