Fúcihum 23
23
Aburaham nanoom fuyaak bu gafok Saara
1Saara nan abaj mee símit ceme nꞌsímit gafaakan nꞌfutok nꞌsíruba, (127) 2nacet mꞌmof mara Kanaan, nꞌésuk yara Kiriyat-Aruba yo yommee Heburon. Aburaham nakul Saara, nahuool.
3Ñeer nayiho nañago nꞌeñalen yaayu min alob nꞌehiitiit yaayu. 4Narogiil : « Injé ajawoorauul, para nicocong. Jinoomenom tin tan íjuhe ifok akoñaom. » 5Ngúsuupool gurogool : 6« Paam, ujantenóli jak, Atúuha nakaanikaan an háamak nꞌésugoli. Ñeer, dó nꞌúwaayoli, be eseni bareg mee bajak nꞌaw, nufok dó akoñai. Biloot ebaj taahe nꞌéli an abili éfir fuyaak fan ubile efok akoñai. »
7Ñeer Aburaham nayiho nayah gújuul bugara mof maamu gammee ehiitiit yaayu. 8Násuupiil arogiil : « Naŋ maregen eñalen yara akoñaom be efogi dó nꞌúwaayuul, jítiiŋenom furim fe Efuroŋ aleeh Sowaar : 9“Búwaay bammee Makapela nꞌgafaagoum gara baragerool, anoomenom bo naŋ min nja gunoomen mee dáare nꞌésuk ye, mbil iŋar ikaan guyaak.” » 10Tooge Efuroŋ min alakoe ásuupoor mꞌbuganool ehiitiit yaayu, násuup Aburaham fácil bugan gan to mee mꞌmúnogenum ésuk yaayu, arogool : 11« Paam, ujantenom jak, ilob yo min buganom gujam : níjii'ijii barager baabu son búwaay ban dó mee, uŋar min ufok akoñai. »
12Ñeer Aburaham nabaañ ayah gújuul fácil bugan gacin dó mee mꞌmof maamu. 13Nalob nꞌEfuroŋ fáciliil peepe min gujam. Narogool : « Ubonket ujantenom ! Injé be ecaami barager baabu. Usoŋ min uyab ékori ye mimbil íjuh ifok dó akoñaom. » 14Ñeer Efuroŋ násuup Aburaham arogool : 15« Paam, ujantenom. Ganoomeni barager be ukuparu siceme sibaagiir, kaanut waaf nꞌetuhoorola ! Ñeer ufok dó akoñai ! » 16Ngujamoor. Aburaham napin ukuparu wammee siceme sibaagiir san ehiitiit yaayu gujamool mee nelob, asenool naŋ min nja gunoomen mee.
17Ñeer barager Efuroŋ bammee Makapela fácil Mamure : barager baabu, búwaay ban dó mee, son ununuk wan dó mee peepe 18nubaañ ukaan wara Aburaham, mara nanoonoom bo fácil ehiitiit yaayu mꞌbugan gan to mee mꞌmúnogenum ésuk yaayu.
19Nan púr to mee, Aburaham nafok akoñaool Saara mꞌbúwaay ban dó mee mꞌbarager baabu bammee Makapela fácil Mamure (Mamure yo yommee Heburon), mꞌmof mara Kanaan. 20Ñeer ehiitiit yaayu ngúmir mara barager baabu, son búwaay ban dó mee, Aburaham acile. Maareer júhe ekaan guyaagool.
Currently Selected:
Fúcihum 23: gsl
Tõsta esile
Share
Kopeeri
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.