Fúcihum 22
22
Aburaham najow gásimen aleehool
1Púr to wabaj mee, Atúuha nacamen be eñow gáyinen gara Aburaham. Nawoogool : « Aburaham. » Nátuulool : « Oóo. » 2Atúuha narogool : « Uŋar aleehi, Isaak, ho hanur aahu, han ureg mee nucamene, nujow bu mof mara Moriya, núsimenomool, nusowool jaram areem bo nꞌemontaañ yan ibili mee eliik. »
3Fara gajom noono mꞌbújom, Aburaham nakok efalo'ool. Naŋar dó nꞌújaagaool goono gúruba bugo nꞌaleehool Isaak, najis ujonten be esow jaram reem wan abil mee gásimen min gujow bu bo ban Atúuha aliigool mee. 4Funak fúfaajiiten, náraahulo, naŋanden emontaañ yaayu. 5Narok újagagaool : « Ikat taahe efalo yaayu min jinaakóli. Injé nꞌakambaano'om be ejow baaba enaak Atúuha, núbaañul. »
6Aburaham naŋar ujonten wara esow búsimen baabu, asen aleehool Isaak ateb. Ho naŋar sambun son jipan min gujow. Ngujow gujow, 7Isaak narok Aburaham : « Paam. » Nátuulool : « Oóo. » Narogool : « Nukenaale sambun nꞌujonten, ñeer ésaaja yan ubilaal mee gásimen úyey ? » 8aNarogool : 8b« Atúuha fannaool be esen ésaaja yabili mee gásimen. » 8cNgufaalen márubaiil.
9Nan gútiiŋ mee tin taahu tan Atúuha aliigool mee, Aburaham nateep to fúsimenum. Naŋar ujonten waawu abaŋ dó. Nakok aleehool Isaak, natebool abaŋ fatiya ujonten waawu wan dó mee nꞌfúsimenum faafu. 10Nañuhen áŋarul jipanool be etaan aleehool. 11Amalayika hara Acehériit mee nawoogulool dó fatiya nꞌémit : « Aburaham, Aburaham ! » Nátuulool : « Oóo, ínje umee. » 12Narogool : « Jambil gañeni gugor akambaano aahu, jambil ukaanool mátaañie. Niñoñow ñeer mara núyinenyinen Atúuha ban úfirutool aleehi, haani min kaan mee hanur. »
13Aburaham náraahulo, nañow fújikel fan usiin fo umale nꞌjiñobol. Najow áŋarul fo ásimen, nasow fo jaram fureem bindum aleehool. 14aAburaham narok tin taahu : 14b« Acehériit mee hasene mee. » 14cYo ecil mee jaat ngurok : 14d« To nꞌemontaañ yaayu 14eAcehériit mee be esen. »#22.14e Yo yommee may « Acehériit mee hañowe mee » son « To nꞌemontaañ yaayu Acehériit mee be eñow. »
15Amalayika hara Acehériit mee nabaañ áwoogul Aburaham dó fatiya nꞌémit. 16Narogool : « Acehériit mee naroge : “Mara wan ukaan mee, úfirutom aleehi, hanur aahu. Haani min emmee Atúuha, nikalikali 17ínje bu gásoonieni máamak, nikaan babajeri bumeeeŋ naŋ siwuut sammee nꞌémit ngumeeeŋ naŋ garuus gammee gapana fal. Babajeri be eheek gulahooriil min guyab sísugiil. 18Mooliil mubil mee ecil, nísoonien giil gaagu búroom go gammee nꞌdúniya, mara nunaakannaak.” » 19Aburaham nábaañul bu to nꞌújaagaool, ngúlowulo gubaañ bu Beer-Seba ban acin mee.
Fiil fara Nahoor
20Nan púr to mee, Aburaham najam mara Milika, ammee akoña atiool Nahoor, nababaj guleeh gumaañen. 21-23Aleehool átiyaara gajawool Uús, ho atuuhen mee Búus, Kemuwel, Kesed, Haso, Pilidas, Idilaf bugo mꞌBetuwel. Milika nabaj nꞌaraaŋool Nahoor, atii Aburaham, guleeh gumaañen gammee futok nꞌgúfaajiir. Kemuwel ho abaj mee Aram. Betuwel nabaj aleeh akoña gurogool Rebeka. 24Nahoor naŋar akoña han akogut, gurogool Rehuma. Nabajool guleeh : Teba, Gaham, Tahas bugo mꞌMaaka.
Currently Selected:
Fúcihum 22: gsl
Tõsta esile
Share
Kopeeri
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.