Fúcihum 21
21
Isaak min abaji mee
1 Acehériit mee naranden Saara naŋ min alobeen mee. Nakaan nu ho naŋ min arogeen mee. 2Naŋar búteb, nabaj Aburaham aleeh amaañen, nin naanu naŋ min Atúuha alobeen yo mee. Tooge Aburaham min afallene. 3Aleeh han Saara abajool mee, Aburaham nasenool gajow gara Isaak (yo yommee : eber). 4Nasunnaool min abaje gunak futok nꞌgúfaajiir naŋ min Atúuha alob yo mee. 5Isaak nan abaji mee, Aburaham babajer símit soono ceme (100).
6Saara narok : « Atúuha nakaanom niber, bare gabil mee ejam, be eber múmbaam. » 7Nabaañ arok : « Ay ájuheene arok Aburaham, Saara bu gamooben guleeh ? Ban ínje ume nibajool aleeh amaañen bafallenerool. »
Aburaham nakahen Agaar bugo nꞌIsumayeel
8Isaak najow jaram ahank, nápur gamoob. Aburaham nakaan gagaan gáamak nꞌfunak fan aleeh aahu ápur mee gamoob. 9Saara naŋanden aleeh hara Agaar, han abaj mee nꞌAburaham neber. Agaar mof mara Esípt nápurulo.#21.9 Agaar ammee amiigeel hara Sara 10Saara narok Aburaham : « Apu ukam amiigeel aahu bugo nꞌaleehool, mara aleehool mat guwaajoor fubaj faafu fiiya bugo nꞌaleehom Isaak. »
11Aburaham furim faafu nfútaañiool máamak, mara aleeh Agaar may hoola. 12Bare Atúuha narogool : « Jambil táañi'i mara aleehi bugo nꞌamiigeeli. Ukaan wan Saara arogi mee peepe. Mara nꞌaleehi Isaak, ínje be ekaan min búbajumool bumeeeŋ. 13Aleeh may hara amiigeeli, ínje be esenool gayooŋ gáamak mara ho may hiiya. »
14Fara gajom mꞌbújom pím, Aburaham nayiho, naŋar múcahoaay son etuen yapuupuus mal asen Agaar. Naŋar aleeh aahu, nabaŋool mꞌbúsol bara Agaar, nakaheniil min gujow gulilioor nꞌerampaasa yara Beer-Seba. 15Nan mal mara etuen yaayu mufaago mee, Agaar nakat aleeh aahu fataam jiñobol jicee. 16Afaak natos maa, nalako tin tan úmire éeni uyah fúkanga nfútiiŋ. Nañeerúl bu bo ban abaŋ mee aleeh aahu mara acamenut eñowool necet. Agaar ban alako mee nak akaaw nahuu.
17Atúuha najam bahuer bara aleeh aahu. Amalayikaool dó fatiya nꞌémit náwoogul Agaar. Narogool : « Agaar wa hom ? Jambil úsebi. Aleeh aahu tan ubaŋool mee, Atúuha najanjam bahuerool. 18Uyuho ! Nuyihen aleehi nujogool nꞌgañen liŋ mara ínje be ekaan min búbajumool bumeeeŋ. » 19Ñeer Atúuha nakaan min Agaar añow wan añoweenut mee, naŋanden ekoloŋ yabaje mal. Najow amoj etuen yaayu epuus, nasen aleeh aahu arem.
20Atúuha napooy aleeh aahu jaram abaak. Nacin bo nꞌerampaasa yaayu nakaan ayima háamak hara fúkanga. 21Bo nꞌerampaasa yaayu yan guroge mee Paran nacin mee, jaram jaaool aŋesool akoña hara mof mara Esípt.
Bapaalaay Aburaham nꞌAbimelek
22Nin naanu Abimelek naŋar Pikol, ammee anafaan hara utiigaool, ngujow gutook Aburaham ngurogool : « Maregen maregen, Atúuha umu ngajogoori nu wanoowan wan oon nekaan. 23Maareer, ukaliom nꞌAtúuha mara mat umus ubantenom, ínje nꞌguleehom, nꞌguleeh guleehom. Naŋ min ínje ikaani mee majage, ukaan mo may bu nꞌínje, mꞌmof maamu man ujaalo mee fujawooraet. » 24Aburaham narogool : « Yoo, nikalikali. »
25Nájogum to nagaan Abimelek mara buganool gubohool ekoloŋ. 26Abimelek narogool : « Imírut ay akaan mee mee. Aw fannai ulobutom yo. Injé may ijameenut yo, ejookom ejam yo jaat. »
27Ñeer Aburaham naŋar sísaaja, sijaameen, nꞌsiyaha asenool min gujogoor bapaalaay. 28Nabaañ ápuren músaaja moono futok mꞌmúruba nꞌekoore yaayu abaŋ mee. 29Abimelek nasonkenool : « Taŋ buu nkaane núpuren músaaja mammee futok mꞌmúruba ubaŋ mee ? » 30Narogool : « Be eseni músaaja me mammee futok mꞌmúruba mimbil uwosen mara ínje iwooge ekoloŋ yaayu. » 31Yo ecil mee ngurok to Beer-Seba (yo yommee : ekoloŋ yara gakali) mara bugo gammee gúruba to ngukalioore.
32Ñeer ngútugen bapaalaayiil to Beer-Seba gufaak, Abimelek naŋar Pikol ammee anafaan utiigaool min gubaañ bu bo mꞌmof mara efilisiit yaayu. 33Aburaham nariilen to Beer-Seba bununuk ban náciin to Acehériit mee, Atúuha haroŋ mee bu nanoonan. 34Nalako to piyo mꞌmof mara efilisiit yaayu.
Currently Selected:
Fúcihum 21: gsl
Tõsta esile
Share
Kopeeri
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.