Mataio 8
8
Kua Fakamālōlō e Iehu he Tamāloa
(Maleko 1.40-45; Luka 5.12-16)
1Kua fanaifo ia Iehu mai luga o te mauga, oi mulimuli atu ai ki ei he kaifenua e tokalahi. 2Oi hau ai he lēpela kua tōtuli i mua o ia ma lea vē atu ki a te ia, “Te Aliki, kāfai koe e loto ki ei, e kē mafaia oi fakamamā#8.2: fakamamā: Ko ho he tauale kino o te kili nae taku fakatahi lava ko te lēpela, ma nae i ei te talitonuga ko nā tauale uma vēnei e hē mamā ai te tino e maua ai, i nā mea tau tāpuakiga, ma e tatau ke fakamālōlō muamua fātoā mafai ai ke auai ki ei. au.”
3Oi papae atu ai ia Iehu, kua paki atu tona lima ki te lēpela ma lea vē atu, “Ko au e loto ki ei. Mamā loa!” Ma ko te taimi lava tēnā na mamā ai ia mai te lēpela. 4#Lev 14.1-32Oi vāgana atu ai ia Iehu ki ei, “Fakalogo mai koe! Ko koe e hē lea lele ki he tino, kae fano oi fakaali tō tino ki he ohitāulaga; ma ofo atu ai he tāulaga e vē ona fakatonu mai e Mohe, ke fai ma fakamāoniga ki tagata ko koe kua mamā.”
Kua Fakamālōlō e Iehu te Kaukauna a he Takitakikau Loma
(Luka 1.7-10)
5Kua fanatu ia Iehu ki Kapenaumi, oi fakafetaui mai ai ki ei he takitakikau Loma ma fakatagi ki ei mo he fehoahoani; 6“Te Aliki, ko taku kaukauna e takoto i te fale e tauale, e mate tētahi ona itū, ma e tīgāina lahi lele.”
7Kua lea atu ia Iehu ki ei, “Ko au la ka fanatu oi fakamālōlō tau kaukauna.”
8Kae kua tali mai te takitakikau. “Te Aliki, ko au ko he tino fakatauva ma e hē talafeagai ke ulu koe ki loto o toku fale. Kae tau lava ko hau kupu, ma ka mālōlō ai taku kaukauna. 9Auā ko au foki ko he tino e i lalo o te pule a nā takitakikau e maualuluga atu ia te au, ma e i ei foki nā fitafita e i lalo o taku pule. Ma kāfai au e lea ki te tino tē, ‘Fano vē’ oi e fano; kāfai au e lea ki tētahi tino, ‘Hau’ oi e hau foki; ma kāfai au e lea ki taku kaukauna, ‘Fai te mea tē!’ oi e vēnā lava oi fai e ia.”
10I te lagona atuga e Iehu o nā kupu iēnei a te takitakikau, oi na ofo lele ai; oi vāgana atu ai ki nā tino e tau mulimuli mai ki a te ia, “E lea atu au ki a te koutou, e hēki kō iloa lele he tino i Ihalaelu e vēnei hona fakatuatua! 11#Luk 13.29E lea atu au ki a te koutou, e tokalahi ki lātou ka ōmamai mai hahae ma hihifo oi nonofo fakatahi ki lalo ma Apelaamo, Ihaako ma Iakopo i te kaiga lahi i te Mālō o te lagi. 12#Mat 22.13; 25.30; Luk 13.28Kae ko nā tino e tatau ke i loto i te Mālō, ka togi ki fafo ki te pōuli, ki te mea ka lauē ma katigū ai o lātou nifo.” 13Oi lea atu ai ia Iehu ki te takitakikau, “Fano loa ki tō fale. Ko te mea e talitonu koe ki ei, ka vēnā lava oi fakataunuku mo koe.”
Ko te taimi lava tēnā na mālōlō ai te kaukauna a te takitakikau.
Kua Fakamālōlō e Iehu nā Tino e Tokalahi
(Maleko 1.29-34; Luka 4.38-41)
14Kua ulu atu ia Iehu ki te fale o Petelu, oi kitea ai e ia te mātua o te āvaga a Petelu e takoto i tona moega e tauale i te fiva. 15Kua paki atu ia Iehu ki te lima o te fafine; kua fano kehe te fiva mai te fafine, oi tū ake ai ki luga oi laulau te meakai a Iehu.
16I te afiafipō o te aho lava tēnā, na kaumai ai e ki lātou ki a Iehu nā tino e tokalahi nae ulufia e nā tēmoni. Na tuli e Iehu nā agaga kino ki fafo i he kupu ma fakamālōlō ki lātou uma nae tauale. 17#Iha 53.4Na fai e ia te mea tēnei ke taunuku ai te kupu a te pelofeta ko Ihaia e vē, “Ko ia lava na kave kehea o tātou tauale ma taukavea o tātou tīgā.”
Nā Tino na Ofo ke fai ma Hoko o Iehu
(Luka 9.57-62)
18I te kiteaga e Iehu te kaifenua kua hiko takamilo ia te ia, oi fakatonu ai e ia ona hoko ke olo ki tētahi itū o te vaitūloto. 19Oi hau ai he faiakoga o te Tūlāfono ki a Iehu, kua lea vē ki ei, “Te Faiakoga, ko au kua hāuni ke olo ma koe ki ho he mea lava e fano koe ki ei.”
20Kua tali atu ia Iehu ki a te ia, “E fai ia lua o ālope ma fai ia ōfaga o manulele; kae ko te Ataliki o te Tagata e hēai he mea ke takoto ki ei ke mālōlō ai.”
21Kua lea mai foki hētahi tino nae mulimuli ki a Iehu, “Te aliki, ke mua fano ko au oi tanu toku tamana.”
22Kae kua tali atu ia Iehu, “Mulimuli mai ki a te au kae tuku vē nā tino oti ke tanu e ki lātou o lātou lava tino oti.”
Kua Fakatonu e Iehu he Afā ke Mālū
(Maleko 4.35-41; Luka 8.22-25)
23Kua hopo ia Iehu ki luga o he vaka, oi olo ai ma nā hoko o ia. 24Nā lava e teki kua to te afā mālohi i te vaitūloto, kua hopokia ai te vaka ma kua tāli goto. I te taimi tēnā ko Iehu e moe. 25Oi olo ai te kau hoko oi fafagu ia Iehu ma lea vē atu ki ei, “Te Aliki, fakaola ko ki tātou auā ki tātou ka feoti!”
26Ka kua tali atu ia Iehu ki a te ki lātou, “He ā te mātataku ai koutou? Kai te taigole lele o te koutou fakatuatua!” Oi tū ai ia Iehu ki luga kua fakatonu te matagi ma nā galu ke mālū, oi toku ai loa te matagi ma toka te tai, ma kua tokihi te malino.
27Na ofo lele te kau hoko ma lea vē, “He itūkāigā tagata vēhea tēnei? E pa foki lava ki nā matagi ma nā galu e uhitaki ki a te ia!”
Kua Fakamālōlō e Iehu nā Tamāloa e Toka Lua e Ulufia e ni Tēmoni
(Maleko 5.1-20; Luka 8.26-39)
28Kua pa atu ia Iehu ki tētahi itū o te vaitūloto ko Kalilaia, ki te kogāfenua e igoa ko Katala i tētahi itū o te vaitūloto, oi fakafetaui atu ai ki ei ni tamāloa e toka lua na ōmai i nā tugamau i te fenuatanu i kinā. Ko te toka lua tēnei nae ulufia e ni tēmoni ma nae fakamātakutaku lele oi nae hēai lele foki he tino nae toe fia kui i te auala tēnā. 29Ko te taimi lava na kitea ai e ki lāua ia Iehu, oi taukalalaga vē atu ai ki ei, “E, te Ataliki o te Atua, he ā ko ta koe e fai mai ki a te ki māua? Ko koe kua hau ke fakahāuā mai ki a te ki māua ka ko hēki pa ki te taimi e tatau ai?”
30E hē mamao atu ma kinā nae kakai mai ai he lafu puaka lahi. 31Oi fakatagi atu ai nā tēmoni ki a Iehu, kua lea vē atu, “Kāfai ki mātou ka tuli e koe ki fafo, uga ko ki mātou ki loto o te lafu puaka tēnā.”
32Kua lea atu ia Iehu, “Olo kehe loa.” Oi olo kehe ai nā tēmoni, kua ulu ki loto o nā puaka. Kua fētutuli ifo te lafu puaka ki lalo i te tafatō o te mauga ki loto o te vaitūloto, ma mālelemu uma ai.
33Ko nā tino nae kikilagia nā puaka, kua fētutuli ki te kakai ma taku ki tagata te mea na tupu kinā taulelea nae ulufia e nā tēmoni. 34Oi olo ai loa nā tino tau tokatahi uma o te kakai kua fakafetaui ki a Iehu; ma i te kitea atuga o ia, oi tauanau ai e ki lātou ke fano kehe mai to lātou fenua.
Currently Selected:
Mataio 8: TNT
Tõsta esile
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.