Mataio 7
7
Ko te Fakamahino atu ki Iētahi Tino
(Luka 6.37-38, 41-42)
1“Nahe koutou fakamahino atu ki iētahi tino kae ke hē fakamahinoa ai koutou e te Atua, 2#Mlk 4.24auā ko te fakamahinoga e koutou faia ki iētahi tino, ka fakamahino ai foki koutou, ma ko te fua e fakaaogā e koutou, ko te fua foki ia ka fakaaogā e te Atua ki a te koutou. 3He ā te kitea ai e koe te mea otaota i loto o te mata o tō uho, kae e hē kē kitea te kogālakau i loto o tō mata? 4E lea vēhea koe ki tō uho, ‘Te uho, tuku mai tō mata ke keu kehe e au te mea otaota i loto,’ kae ko tēnā e i ei te kogālakau i loto o tō mata? 5Ko koe ko he tino āmio pepelo! Kave kehe muamua te kogālakau i loto o tō mata, oi fātoā kitea lelei ai e koe ke keu kehe te mea otaota i te mata o tō uho.
6“Nahe fōkia nā mea kua uma te fakapaia ki nā kulī — auā ka fakahaga mai oi takati koutou. Nahe togia autou pēnina ki mua o nā puaka — auā ka holi ki lalo i o lātou vae.
Gogō atu, Hakili atu, Tukituki atu
(Luka 11.9-13)
7“Gogō atu, oi fōki atu ai ki a te koutou; hakili atu, oi maua ai e koutou; tukituki atu, oi tatala mai ai te faitotoka ki a te koutou. 8Auā ko nā tino uma e gogō atu, ka fōki mai ki ei, ko nā tino e hakili atu, ka maua e ki lātou, ko nā tino e tukituki atu, ka tatala mai ki ei te faitotoka. 9Ko ai he tino o koutou, he tamana, e ia fōkia ki tona ataliki he fatu, kāfai e gogō atu ki he falaoa? 10Pe fōki ki ei he gata, kāfai e gogō atu ki he ika? 11Kāfai la koutou, e ui lava e kino, kae e koutou iloa oi fōki nā mea lelei ma autou fānau, ka hē hili atu nei la te lahi o nā mea lelei ka fōki atu e te koutou Tamana i te lagi, ki nā tino e gogō atu ki a te ia!
12 #
Luk 6.31
“Ko nā mea e fofou koutou ke fai e iētahi tino ki a te koutou, ke vēnā foki lava ona fai e koutou ki a te ki lātou; auā ko tēnei te uiga o te Tūlāfono a Mohe ma nā akoakoga a te kau pelofeta.
Ko te Faitotoka Vāiti
(Luka 13.24)
13“Kui ki loto i te faitotoka vāiti, auā ko te faitotoka ki te malaia e lauefa, ma ko te auala e tau ki ei e faigōfie, e tokalahi foki nā tino e kui ai. 14Kae ko te faitotoka ki te ola e vāiti, ma te auala e tau ki ei e faigatā, e tokaititi foki nā tino e ki lātou maua.
Ko te Lākau ma ona Fua
(Luka 6.43-44)
15“Koutou ke fakaeteete i nā pelofeta pepelo: e ōmamai ki a te koutou e fōliga e vē ni māmoe i te kikila atu i fafo, kae ko loto, e vē lava ni luko fekai. 16Ka koutou iloa ki lātou ia lātou gāluega e fai. E hē fua mai e ni lākau tālatala ni vine, ma e hē fua mai e ni lākau mātuituia ni mati. 17Ko te lākau e ola lelei, e fua mai ai nā fua lelei, kae ko te lākau e ola kino, e fua mai ai nā fua kino. 18Ko te lākau e ola lelei e hē fua mai ai ni fua kino, ma ko te lākau e ola kino e hē fua mai ai ni fua lelei. 19#Mat 3.10; Luk 3.9Ma ko ho he lākau e hē fua mai ai ni fua lelei, e ta ki lalo oi togi ki te afi. 20#Mat 12.33Ko te mea ia, ka koutou iloa nā pelofeta pepelo ia lātou gāluega e fai.
E Hē Kō Iloa Koutou
(Luka 13.25-27)
21“E hē ko te tino e lea mai ki a te au, ‘Te Aliki, Te Aliki’ te hao ki te Mālō o te lagi, kae ko te tino e ia faia te finagalo o toku Tamana i te lagi. 22Kāfai e pa mai te Aho Fakamahino, e tokalahi nā tino ka lea mai ki a te au ‘Te Aliki, Te Aliki! Ko tō igoa te na ki mātou tālakia ai te fekau a te Atua, ko tō igoa foki te na ki mātou tulia ai ki fafo nā tēmoni ma ki mātou faia ai nā vāvega e lahi.’ 23#Hal 6.8Oi ka lea vē atu au ki a te ki lātou, ‘E hē kō iloa koutou. Olo kehe ma au, koutou nā tino āmio kino.’
Nā Tino Faufale e Toka Lua
(Luka 6.47-49)
24“Ko te mea ia, ho he tino e lagona e ia nā kupu iēnei a āku ma uhitaki ki ei, e vēia ia ko he tino poto na fau tona fale i luga o te papa. 25Kua to mai nā uaga mamafa, kua tafe mai te vai kua lōfia ai te kelekele, ma kua agi mālohi te matagi ki te fale. Kae e hēki pakū ki lalo auā na fau i luga o te papa.
26“Kae ho he tino e lagona e ia nā kupu iēnei a āku kae hē uhitaki ki ei, e vēia ia ko he tino valea na fau tona fale i luga o te oneone. 27Kua to mai nā uaga mamafa, kua pāpā nā vaitafe ma lōfia te kelekele, ma kua agi mālohi te matagi ki te fale. Oi pakū ai te fale ki lalo ma momo likiliki.”
Ko te Pule a Iehu
28I te umaga o te vāgana atu o Iehu i nā mea iēnei, na ofo lele te kaifenua ki te faiga o ana akoakoga. 29#Mlk 1.22; Luk 4.32Kua hē vēia ia ko nā faiakoga o te Tūlāfono, kae kua vē ko he tino kua ia te ia te pule kātoa.
Currently Selected:
Mataio 7: TNT
Tõsta esile
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.