Luka 18
18
Ko te Talafakatuha o te Fakamahino ma te Fafine kua Oti tana Āvaga
1Oi fai ai e Iehu he talafakatuha ki ona hoko, ke ki lātou iloa ai e tatau lava ki lātou ke fakamākekeke oi tatalo, ma ke nahe fakavāivai lele. 2Kua lea vē atu, “Nae i ei he fakamahino i hētahi kakai, nae hē mataku i te Atua ma hē fakaaloalo ki tagata. 3Nae i te kakai foki tēnā he fafine kua oti tana āvaga, kua fai ma ana haga ko te fano pea lava ki te fakamahino ma tauanau vē ki ei, ‘Fehoahoani mai ko kae ke mālō au i to mā fakamahinoga ma te tino e teteke mai ki a te au!’ 4E hēki taliagia e te fakamahino, ma na mataloa lele he taimi nae hē fia tokaga ai ki ei, kae mulimuli ake kua vē ifo i tona loto, ‘E ui lava ko au e hē mataku i te Atua, ma hē fakaaloalo ki ho he tagata, 5kae ona kua fai pea lava te fafine kua oti tana tāne ma fakahoehā ki a te au, ka fehoahoani ai au ki ei, kae ke uma ai toku fītā i te hau ho!’ ”
6Kua toe vāgana atu te Aliki, “Fakalogo ki nā fakakupuga a te fakamahino hē āmiotonu na fai. 7Ka hē fehoahoani nei te Atua ki ona tagata e tatalo atu pea lava ki a te ia i te ao ma te pō, mo tana fehoahoani? E i na tuai nei oi fehoahoani te Atua ki a te ki lātou? 8E lea atu au ki a te koutou, ka vave lele oi fehoahoani te Atua ki a te ki lātou. Kae kāfai te Ataliki o te Tagata e hau, e i na ia maua nei he tino fakatuatua i te lalolagi?”
Ko te Talafakatuha o te Falehaio ma te Aolāfoga
9Na fai foki e Iehu te talafakatuha tēnei ki ni tino nae talitonu ko ki lātou ni tino āmiotonu, ma nae inoino lele ki iētahi tino. 10“E i ei ni tamāloa e toka lua na olo oi tatalo i loto o te Mālumalu: ko tētahi he Falehaio, ka ko tētahi he aolāfoga.
11“Ko te Falehaio nae tū tautahi ma tatalo vēnei, ‘Te Atua, ko au e fakafetai atu ki a te koe, auā ko au e hē manako lahi, e hē talapepelo, ma e hē mulilua e vē ko iētahi tino. Ko au e fakafetai atu, auā ko au e hē vē ko te aolāfoga tēia. 12E lua ia aho o te vaiaho e fakalāina ai au, ma e kavatu e au mo koe te tahi vaehefulu o aku tupe uma e maua.’
13“Kae ko te aolāfoga, nae tū mamao mai, ma e hēki kikila ake foki ona mata ki te lagi, ka nae pōpō tona fatafata,#18.13 pōpō tona fatafata: Fakailoga o tona fakanoanoa ona ko ana agahala. ma lea vē, ‘Te Atua, alofa mai ko ki a te au te tagata agahala!’ ” 14#Mat 23.12; Luk 14.11Kua vāgana atu ia Iehu, “E lea atu au ki a te koutou, ko te aolāfoga kae hē ko te Falehaio te tino e hako i mua o te Atua i te fanoga ki tona fale. Auā ko nā tino e loto fakamaualuga, ka fakamaulalogia! Ka ko nā tino e lotomaulalo, ka fakaeke ki luga ma kavea ma tagata takutakua.”
Kua Fakamanuia e Iehu ni Tamaiti
(Mataio 19.13-15; Maleko 10.13-16)
15Kua kaumai e ni tino a lātou tamaiti ki a Iehu ke fakaeke atu ki ei ona lima. Kua kitea atu e te kau hoko te mea tēnei, oi mumuna ai ki ei ona ko te lātou mea tēnei kua fai; 16kae kua kalaga atu ia Iehu ki nā tamaiti ke ōake ki a te ia ma lea vē atu, “Tuku nā tamaiti ke ōmamai ki a te au nahe vavaoa, auā ko te Mālō o te Atua e mo ki lātou e vē ko ki lātou iēnei. 17E takutino atu e au ki a te koutou, ko ai lava e hē ia talia te Mālō o te Atua e vē he tamaiti, ka hē hao atu lele ia ki ei.”
Ko te Tamāloa Maukoloa
(Mataio 19.16-30; Maleko 10.17-31)
18Kua fehili atu hētahi o takitaki Iutaia ki a Iehu, “Te Faiakoga lelei, he ā nei te tatau ke kō faia kae ke maua ai e au te ola e fakavavau?”
19Kua fehili atu ia Iehu ki ei, “He ā te lea vēnā mai ai koe ko au e lelei? E hēai he tino e lelei kae nā ko te Atua oioti lava. 20#Eho 20.12-16; Teu 5.16-20Kua iloa e koe nā fakatonuga: ‘Ia koe nahe mulilua; ia koe nahe tāmate tino; ia koe nahe kaihohoa; ia koe nahe molimau pepelo; āva ki tō tamana ma tō mātua.’ ”
21Kua tali atu te tamāloa, “Na kāmata mai lava koi tamaiti au, ko au e uhitaki pea lava ki nā fakatonuga uma iēnā.”
22I te lagona atuga e Iehu o te mea tēnei, oi vāgana atu ai ki ei, “Ko toe tahi lava la te mea e tatau ke kē faia. Fano oi fakatau au mea uma lele ma fōki te tupe ma nā tino mātitiva, ma ka maua ai e koe nā koloa e lahi i te lagi; oi hau ai oi mulimuli mai ki a te au.” 23Kae i te lagonaga atuga e te tamāloa o te mea tēnei, oi lagona ai e ia te loto fakanoanoa lahi, auā ko ia ko he tino maukoloa.
24Kua kitea atu e Iehu te fakanoanoa o te maukoloa, oi vē atu ai tana kupu, “Kai te faigatā lele mo nā tino maukoloa ke hao atu ki te Mālō o te Atua! 25E faigatā lele atu mo he tino maukoloa ke hao atu ki te Mālō o te Atua, i lo mo he kāmela ke ulu i te pu o he gila.”
26Ko nā tino na ki lātou lagona atu te fakakupuga tēnei kua fehili vē, “Ko ai nei la te i na mafai ke fakaola?”
27Kua tali atu ia Iehu, “Ko te mea e hē mafai e te tagata, e mafai e te Atua.”
28Oi lea atu ai ia Petelu, “Kikila, kua tuku e ki mātou o mātou kāiga kae mulimuli atu ki a te koe.”
29Oi lea atu ia Iehu ki a te ki lātou, “Io e hako, kae e takutino atu e au ki a te koutou, ho he tino e ia tukua tona kāiga, pe ko tana āvaga, pe ko ona uho, pe ko ona mātua, pe ko tana fānau, ona ko te Mālō o te Atua, 30ka maua e ia nā mea e hautualahi i te ōlaga nei; ma i te ōlaga fou koi hau, ka maua e ia te ola e fakavavau.”
Ko te Fakatolu Oi Tautala ia Iehu e Uiga ki Tona Mate
(Mataio 20.17-19; Maleko 10.32-34)
31Oi tataki kehe ai e Iehu ona hoko, ma lea vē atu ki ei, “Kikila, ko ki tātou ka olo ki Ieluhalema, te mea ka fakataunuku ai nā mea uma lele na tūhia e te kau pelofeta e uiga ki te Ataliki o te Tagata. 32Auā ka tukulima atu ia ki tagata nukukehe, ma ka ki lātou tauemua, fai kupu mātagā ma tūfeanu ki ei. 33Ka kini e ki lātou ma tāmate, kae ka toe tū ia mai te oti i tona tolu o aho.”
34Kae e hēki mālamalama ki lātou i he mea e fokotahi o nā mea iēnei; ko te uiga o nā kupu a Iehu nae hē fakailoa ki ei, ma nae hē ki lātou hāfia ai te mea nae lea ake ai.
Kua Fakamālōlō e Iehu he Tāuaho
(Mataio 20.29-34; Maleko 10.46-52)
35Kua tāli pa atu ia Iehu ki Ieliko, oi tau atu ai ki he tamāloa tāuaho e nofo i tafa o te auala, ma kaitagōgō ki tagata e holo ake i te auala. 36Kua lagona atu e ia te kaifenua e gāholo ake, oi fehili ai pe ko he ā te kua tupu.
37Kua tali atu nā tino ki ei, “Ko Iehu te Nahaleta e kui ake i te auala.”
38Oi kalaga leo lahi ai te tāuaho, “Iehu! Te Ataliki o Tavita! Alofa mai ko ki a te au!”
39Ko nā tino nae i mua kua mumuna ki te tāuaho ma lea ki ei ke nahe piha. Kae kua ātili ai te tau kalaga leo lahi vē atu, “Te Ataliki o Tavita, alofa mai ko ki a te au!”
40Oi tū ai loa ia Iehu, ma fakatonu e ia ke kavake te tāuaho ki a te ia. Kua tafapili mai te tāuaho oi fehili atu ai ki ei ia Iehu, 41“He ā te fofou koe ke kō faia mo koe?”
Kua tali mai te tāuaho, “Te Aliki, ko au e fofou ke toe pupula oku mata.”
42Kua vāgana atu ia Iehu ki ei, “Pupula la! Ko tō fakatuatua kua mālōlō ai koe.”
43Ko te taimi lava tēnā na mafai ai ke kitea e ona mata, oi mulimuli ai ki a Iehu, ma fakafetai ki te Atua. I te kitea atuga o te mea tēnei e te kaifenua, oi viviki ake uma ai ki lātou ki te Atua.
Currently Selected:
Luka 18: TNT
Tõsta esile
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.