Luka 16
16
Ko te Kaukauna Pule Potokino
1Kua vāgana atu ia Iehu ki ona hoko, “E i ei he tino maukoloa nae i ei hana kaukauna nae pule i te kikilaga o ana meatōtino. Kua logotala te tino maukoloa, ko ana tupe e fakamāumau e tana kaukauna pule. 2Oi fekau ai e ia tana kaukauna pule ma lea vē atu ki ei, ‘He ā tēnei kua kō lagona atu e uiga ki a te koe? Hāuni mai la he tala kātoa o aku mea uma nae kē kikilagia, auā ko koe ka hē toe kaveagia ma kaukauna pule.’ 3Oi vē ake ai te kaukauna pule i tona loto, ‘He ā nei ta aku ka fai, auā ia au ka tuli kehe e toku matai mai taku gāluega? Kua hē lava toku mālohi oi keli autu, ma ko au foki e mā oi kaitagōgō tupe. 4Ko tēnei taku mea ka fai kae ke talia ai au e nā tino ki loto o nā fale o ki lātou, kāfai au ka fakateka ma taku gāluega.’
5“Oi fekau ai e ia nā tino tau tokatahi uma nae nofo kaitālafu ki tona matai. Kua fehili vē atu ki te tino muamua, ‘E fia tau kaitālafu ki toku matai?’ 6Kua tali mai te tino, ‘E helau ia kālone#16.6 kālone: e tuha ma te 37 lita lolo ōlive.’ Oi lea atu ai ki ei te kaukauna pule, ‘Tēia la tau pili, nofo ki lalo oi tuhi fakavave ki ei he limahefulu kālone.’ 7Oi lea atu ai ki tētahi tino, ‘Ka ko koe — e fia tau kaitālafu?’ Kua tali mai te tino, ‘E helau ia fuagā haito.’#16.7 fuagā haito: Fua o nā haito pe ko te kolouha i te gagana Eleni. Ko te fuagā haito e fokotahi e tuha ma te 370 lita. Oi lea atu ai te kaukauna ki ei, ‘Tēia la tau pili, tuhi ki lalo he valuhefulu fuagā haito.’
8“Ona ko te mea tēnei, na fakamālō ai te matai ki tana kaukauna pule, ona ko tona potokino; auā e hili atu te popoto faitogafiti o nā tino o nā aho nei i te kikilaga o a lātou mea, i lo nā tino o te mālamalama.”#16.8 nā tino o te mālamalama: nā tino e ki lātou fakatāuagia nā mea tau ki te Mālō o te Atua.
9Oi toe vāgana atu ai ia Iehu, “Ko au la e lea atu ki a te koutou: Fai ni uō mā koutou e ala i nā koloa e maua i ni auala hē hako, kae kāfai la e uma te lātou aogā, ka talia koutou ki loto o te nofoaga e nonofo tūmau ai ke pa ki te fakavavau. 10Ko ai lava e fakamāoni i nā tamā mea, ka fakamāoni foki i nā mea lalahi; ma ko ai lava e hē fakamāoni i nā tamā mea, ka hē fakamāoni foki i nā mea lalahi. 11Kāfai la koe kua hē fakamāoni i te kikilaga o nā koloa e maua i ni auala kino, e vēhea ake la ona mafai ke tuku atu nā koloa moni, ke kē kikilagia? 12Ma kāfai koe kua hē fakamāoni i nā mea a hētahi tino, ko ai la te ka ia fōki atua ki a te koe, nā mea lava a koe?
13 #
Mat 6.24
“E hēai he kaukauna e mafai ke kaukauna ki ni matai e toka lua; auā ka ita ki tētahi, kae alofa ki tētahi; ka fakamāoni ki tētahi kae inoino ki tētahi. E hē mafai koe ke kaukauna uma ki te Atua ma nā tupe.”
Ko Iētahi o Fakakupuga a Iehu
(Mataio 11.12-13; 5.31-32; Maleko 10.11-12)
14I te lagona atuga o nā mea uma iēnei e te kau Falehaio, oi fai ai a lātou kupu fakatauemu ki a Iehu, auā ko ki lātou ni tino e fiafia ki nā tupe. 15Kua vāgana atu ia Iehu ki a te ki lātou, “Ko koutou iēnā e fia āmiotonu i mua o tagata, kae e kitea e te Atua nā mea i outou loto. Auā ko nā mea e fakatāua i te kikila a te tagata, ni mea iēnā e inoino ki ei te Atua.
16 #
Mat 11.12-13
“Ko nā Tūlāfono a Mohe ma nā tuhituhiga a te kau pelofeta, nae fakaaogā lava ke pa ki nā aho o Ioane te Papatiho; na kāmata mai i te taimi tēnā, te folafolaga o te Tala Lelei e uiga ki te Mālō o te Atua, ma kua taumafai ia tagata uma ke olo fakamālohi ki te mea e pule ai te Atua. 17#Mat 5.18Kae e faigōfie ke mavae kehe atu te lagi ma te lalolagi, i lo te tōkehea o he koma pe he mataituhi e fokotahi mai te Tūlāfono.
18 #
Mat 5.32; 1 Kol 7.10-11 “Ho he tamāloa e tatala e ia tana āvaga kae fakaipoipo ki hētahi fafine, kua agahala ia i te mulilua; ma ko te tamāloa e fakaipoipo ki he fafine kua tatala tana āvaga, kua agahala ia i te mulilua.
Ko te Tamāloa Maukoloa ma Lahalo
19“Nae i ei he tamāloa maukoloa nae kofu i nā lākei e pito hili te taugatā ma kai i nā meakai e pito hili te lelei, i aho uma. 20Ma nae i te faitotoka ki tona fale he tino mativa e igoa ki a Lahalo, nae papala kātoa tona tino, 21ma nae fofou lele ke ia kaia nā matutuga e malili ifo ki lalo mai te laulau a te maukoloa. E pa ki nā kulī, e ōmamai oi hepo e ki lātou nā papala o ia.
22“Kua oti te tino mativa, oi kave ai e nā agelu ke nofo i tafa o Apelaamo, i te kaiga i te lagi. Kua oti foki te tamāloa maukoloa, oi tanu ai; 23ma i loto o Heoli, te nofoaga kua maua ai ia i te pagātia, kua kikila ake ki luga oi ia kitea mamao atu ai ia Apelaamo, ma Lahalo e i tētahi ona itū. 24Oi kalaga atu ai vē, ‘Toku tamana e, Apelaamo! Alofa mai ko. Uga mai ko ia Lahalo ke lolō tona muamuālima ki ni vai, ma fakamālū ake ai toku laulaufaiva, auā ko au nei kua tīgāina i te mumū o te afi tēnei!’
25“Kae kua lea vē atu ia Apelaamo, ‘Toku ataliki, e manatua e koe, i tō ōlaga kātoa, na maua e koe nā mea lelei uma lele, kae maua e Lahalo nā mea e kino. Kae nei, kua fiafia ia Lahalo i kinei, kae maua koe i nā tīgā. 26E hē gata i tēnā, kua i ei te vanu loloto kua i to tātou va, kae ke nahe mafai ai ni tino e fia oatu mai kinei ki kinā, pe ni tino mai kinā e fia ōmamai ki kinei.’ 27Kua lea vē atu te maukoloa, ‘Ko au la e fakatagi atu ki a te koe Apelaamo te tamana, uga ko ia Lahalo ki te fale o toku tamana, 28auā e toka lima oku uho — ke fakailoa ki ei kae ke nahe ōmamai ai ki te nofoaga tēnei o puapuagā.’
29“Kua tali atu ia Apelaamo, ‘Kua ia te ki lātou ia Mohe ma te kau pelofeta.#16.29 Mohe ma te kau pelofeta: Ko nā tuhituhiga a Mohe ma te kau pelofeta i te Feagaiga Tuai. E tatau nā uho o koe ke fakalogo ki nā mea kua tuhituhia e ki lātou.’ 30Kua tali mai te maukoloa, ‘Apelaamo te tamana, e hē lava ai! Kae kāfai he tino kua toe fakatū mai i te oti e fano ki ei, oi ka mafai ai ki lātou ke halamō.’ 31Ka kua lea atu ia Apelaamo, ‘Kāfai ka hē fakalogo ki lātou ki a Mohe ma te kau pelofeta, e tuha lava pe i ei he tino e fakatū mai te oti, ka hē mafai lava ki lātou ke talitonu.’ ”
Currently Selected:
Luka 16: TNT
Tõsta esile
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.