Gāluega 11
11
Ko te Līpoti a Petelu ki te Ekalehia i Ieluhalema
1Kua lagona e te kau apohitolo ma nā tino i Iutea kātoa kua talitonu ki te Aliki, kua talia e tagata nukukehe te kupu a te Atua. 2I te fanoga la o Petelu ki Ieluhalema, na fakaheā ki ei nā tino nae manatu ko tagata nukukehe e tatau ke pelitome. Kua lea vē ki lātou, 3“Ko koe nae nofo i te kāiga o ni tino nukukehe ko hēki pelitomeagia, ma kakai fakatahi ma ki lātou!” 4Oi fakamatala ai loa e Petelu ki a te ki lātou te mea na tupu i te kāmataga lava:
5“Ko au nae tatalo i te kakai ko Iopa, oi kō kitea ai he fakaaliga. He mea e fanaifo mai te lagi e vē he mātuā kiekafu, e tukutuku ifo i ona pito e fa, ma fanaifo ki oku tafa. 6Na kikila fakalelei au ki loto, oi kō kitea ai nā manu tauhi ma nā manu tāvao, nā manufetolofi, ma nā manulele. 7Oi kō lagona ai he leo e lea vē mai ki a te au, ‘Petelu, tū ki luga oi tāmate, ma kai!’ 8Kae kua lea vē atu au, ‘E hē kō faia he mea vēnā, te Aliki. Ko au e hēki kai lele ki he mea e hē mamā i nā itū tau tāpuakiga, pe hē tatau ke kai ki ei.’ 9Na toe lea vē mai te leo mai te lagi, ‘Ho he mea kua fakailoa mai e te Atua e mamā, e hē tatau ke lea koe e hē mamā.’ 10Na fakatolu lava ona fakatonu vēnei ia Petelu e te Atua, oi toe kavake ai ki i te lagi te mea tēnei. 11Ko te taimi tonu lava tēnā na taunuku ifo ai ni taulelea e toka tolu mai Kaihaleia, ki te fale nae nofo ai au.#11.11 au; ko iētahi tuhituhiga e lea mai ki mātou. 12Ma na lea mai te Agaga Paia ki a te au ko au nahe fakalotolotolua kae olo loa ma nā taulelea. Na olo fakatahi ki mātou ki Kaihaleia ma ni tino kua talitonu e toka ono mai Iopa, ma na olo uma foki ki mātou ki te fale o Konelio. 13Na fakamatala mai e Konelio ki a te ki mātou te ia kiteaga o he agelu e tū i loto o tona fale, oi lea vē ake ai, ‘Uga he tino ki Iopa, ke lea ki he taulealea e igoa ki a Himona Petelu ke hau. 14Ka tautala atu ia ki a te koe i nā kupu e fakaola ai koe, vēnā ma tō kaukāiga kātoa.’ 15Ma i te kāmataga oi tautala au ki ei, kae fanaifo te Agaga Paia ki o lātou luga, e vē foki lava ko te fanaifoga ki luga o ki mātou, i te kāmataga. 16#Gāl 1.5Oi kō manatua ai te vāgana a te Aliki, ‘Na papatiho e Ioane i te vai, kae ka papatiho koutou i te Agaga Paia.’ 17E manino lele na fōki e te Atua ki nā tino nukukehe iēnā te meaalofa lava e tahi tēia na ia fōki maia ki a te ki tātou, ina kua talitonu ki tātou ki te Aliki ko Iehu Keliho; ko ai nei la au, ke kō tāofia ai te mea e fofou ki ei te Atua!”
18Kua fakalogo atu ki lātou ki te mea tēnei, oi uma ai foki te lātou fakaheā, kae kua viviki ake ki te Atua, ma lea vēia “Kua tuku atu foki la e te Atua te avanoa ki tagata nukukehe ke halamō, ma ke maua ai e ki lātou te ola.”
Ko te Ekalehia i Anitioka
19 #
Gāl 8.1-4
Ko iētahi o nā tino kua talitonu na halalau ona ko nā fakahāuāga na pa ki ei i te tāmatega o Hetefano, na pa lele ki Foinike, Kupulona, ma Anitioka, ma na ki lātou tālakia te fekau ki tagata Iutaia oioti. 20Kae ko iētahi o ki lātou, ni tino mai Kupulona ma Kulene, na olo ki Anitioka ma folafola te fekau ki tagata nukukehe,#11.20 ki tagata nukukehe; ko iētahi tuhituhiga e lea mai ki nā tino e tautatala i te gagana Eleni. ma e uiga ki te Tala Lelei ki te Aliki ko Iehu. 21Na fehoahoani lahi te Atua ki a te ki lātou ma e tokalahi lele nā tino na talitonu ma liliu ki te Aliki.
22Kua pa te tala iēnei ki te Ekalehia i Ieluhalema, oi uga ai e ki lātou ia Panapa ki Anitioka. 23I te pa atuga ma ia kiteagia nā fakamanuiaga a te Atua ki tagata, na ia lagona te fiafia ma na fakamālohi ki a te ki lātou uma, ke fakamāoni ma pipiki mau ki te Aliki ma o lātou loto kātoatoa. 24Ko Panapa he tagata lelei, nae tumu i te Agaga Paia ma te fakatuatua, ma e tokalahi ia tagata na talitonu ki te Aliki.
25Oi fano ai ia Panapa ki Taheha oi hakili ia Haulo. 26I te ia mauaga, oi kave ai e ia ki Anitioka, ma e lua ia tauhaga nae māfuta ai ki lāua ma nā tino o te ekalehia ma ki lā akoako he vāega e tokalahi. Ko kinā i Anitioka te na mua fakaigoa ai nā tino kua talitonu ki a Iehu, ni Kelihiano.
27E tuha ko te taimi tēnei na ōifo ai ni pelofeta mai Ieluhalema ki Anitioka. 28#Gāl 21.10Ko tētahi o ki lātou iēnei ko Akapo, na tū ki luga ma fai tana vāloaga e ala i te mana o te Agaga Paia, ko he oge lahi e tuku e pa mai ki te lalolagi kātoa. (Na tupu te oge tēnei i nā aho o te pūlega a te Kaihala Kalautiona.) 29Na tonu i te kau hoko, ko he ā lava he mea e maua e ki lātou tau tokatahi uma, ke kave ke fehoahoani ki te kau uho Kelihiano e nonofo i Iutea. 30Na vēnā lava ona fai e ki lātou, ma na momoli ai te tupe e Panapa ma Haulo, ki nā toeaina o te Ekalehia.
Currently Selected:
Gāluega 11: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.