Gāluega 10
10
Kua Āhiāhi ia Petelu ki a Konelio
1Nae i ei he taulelea i Kaihaleia e igoa ki a Konelio, he takitaki o he tokahelau fitafita i te vaegākau a Loma e takua ko te “Vaegākau mai Italia.” 2He tino e mataku i te Atua; ko ia ma tona kāiga kātoa e tāpuaki ki te Atua. E lahi foki ana mea nae fai ke fehoahoani ai ki nā tino Iutaia mātitiva, ma nae tatalo pea lava ki te Atua. 3E tuha ko te tolu i te afiafi kae ia kitea manino i he fakaaliga, he agelu a te Atua kua ulu mai ki te fale oi lea vē ake ki a te ia, “Konelio!”
4Na pupula ki ei ona mata ona ko tona mataku, oi lea vē atu ai ki ei, “Te aliki, e i ei he mea e fofou koe ki ei?”
Kua tali mai te agelu, “Kua lagona e te Atua au tatalo ma ia kitea au gāluega alofa ki tagata mātitiva, ma kua hāuni ke tali atu ki a te koe. 5Uga ni taulelea ki Iopa ki he tino e igoa ki a Himona Petelu. 6E i te fale o Himona, he tino gaohi mea mai nā pakumanu, ma e pili tona fale ki te tai.” 7Oi fano kehe ai te agelu, ma na kalaga loa ia Konelio ki ni kaukauna fakamoemoegia e toka lua a ia ma he fitafita, he tino kua talitonu ki te Atua ma ko hētahi ia o nā tino e fehoahoani ake ki a te ia. 8Kua taku e ia ki a te ki lātou te mea na tupu, oi uga ai ke olo ki Iopa.
9I te aho alafaki, ka koi faimalaga ki lātou ma kua tafapili ki Iopa, na fano ai ia Petelu ki luga o te tuāfale i te fakaaoauli, ke tatalo ai. 10Na lagona e ia te fia kaia; ka koi tāpena mai tana katiga kae ia kitea he fakaaliga. 11Kua kitea atu e ia te lagi kua māvā, ma he mea e vē he kiekafu lahi e fōliga e tukutuku ifo ki te lalolagi i ona pito e fa. 12I loto o te kiekafu, e i ei ai nā itūkāigā manuvaefa uma, nā manufetolofi, ma nā manulele. 13Oi lea vē ifo ai he leo ki ei, “Petelu, tū ki luga oi tāmate ma kai nā manu iēnei!”
14Kae kua lea vē atu ia Petelu, “Te Aliki, e hē kō faia he mea vēnā. Ko au e hēki kai lele ki he mea e hē mamā i nā itū tau tāpuakiga, pe hē tatau ke kai au ki ei.”
15Kua toe lea vē ifo te leo, “Ho he mea kua fakailoa mai e te Atua e mamā, e hē tatau ke lea koe e hē mamā.” 16Na fakatolu lava ona fakatonu vēnei ia Petelu e te Atua, oi toe kavake ai ki te lagi te mea tēnei.
17Ka koi māfaufau ia Petelu pe ko he ā te uiga o te fakaaliga tēnei, ko nā taulelea na uga e Konelio ma nae ki lātou hakilia te fale o Himona, kua tutū i mua o te faitotoka o te fale i te taimi lava tēnā. 18Kua kālalaga vē atu ki lātou, “E nofo i kinā he tino e igoa ki a Himona Petelu?”
19Koi tau māfaufau lava ia Petelu pe ko he ā te uiga o te fakaaliga, kae vāgana mai ki ei te Agaga Paia, “Kikila, e toka tolu#10.19 toka tolu; ko iētahi fakamaumauga e lea mai i ei nā tino; e fokotahi te fakamaumauga e lea mai toka lua. ia taulelea e ki lātou hakilia koe. 20Ko te mea ia, tū loa ki luga oi fano ki lalo, ma ia koe nahe fakanofonofo ke olo koutou ma nā taulelea, auā na kō uga maia ki lātou.” 21Oi fano ai ia Petelu ki lalo ma lea vē atu ki nā taulelea, “Ko au te tino e koutou hakilia. He ā na ōmamai ai koutou?”
22Kua tali mai ki lātou, “Ko ki mātou na uga mai e Konelio te Takitaki o he Toka Helau fitafita. Ko he tino lelei e tāpuaki ki te Atua ma e taku leleia e tagata Iutaia uma. Na fakatonu e he agelu a te Atua ke valakaulia koe ki tona fale, kae ke mafai ke fakalogo ia ki nā mea e tautala ai koe.” 23Oi lea ai ia Petelu ki nā taulelea ke mapu ake ki loto o te fale ke mālōlō ai mo te pō tēnā.
I te aho alafaki na hāuni ai ia Petelu ma olo ma nā taulelea; na olo fakatahi ai foki ma iētahi tino kua talitonu ki te Aliki, i Iopa. 24Ko te aho na hohoko ai na taunuku ai ia Petelu ki Kaihaleia ki te mea e fakatali mai ai ia Konelio ma ni tino o tona kāiga, vēnā ma ni uō mamae na ia valakaulia. 25Kua havali atu ia Petelu ka ulu atu ki te fale, kae fakafeiloaki mai e Konelio, kua fakapakū ki ona vae, ma ifo atu ki a Petelu. 26Ka kua tago atu ia Petelu oi fakatū ki luga kae lea vē atu ki ei, “Tū ki luga! Ko au he tino e vē foki lava ko koe.” 27E tautala lava ia Petelu ki a Konelio ma havali atu ki lotofale, oi na ia kitea atu e tokalahi nā tino kua fakapotopoto mai. 28Oi lea vē atu ai ki a te ki lātou, “E iloa lelei lava e koutou e hē fakatagagia he tino Iutaia e tana tāpuakiga, ke āhiāhi pe fai mea fakatahi ma he tino nukukehe. Kae kua fakahino mai e te Atua e hē tatau au ke lea, e i ei he tino e hē mamā pe kino. 29Ma i te kalaga atuga o koutou ko au ke hau, na tū ake lava au oi hau e aunoa ma hoku fehili. Ko au la e fehili atu pe ko he ā te na kalaga atu ai koutou ko au ke hau.”
30Kua tali atu ia Konelio, “E tuha kua tolu ia aho kua teka, i te taimi foki lava tēnei ka koi tatalo au#10.30 tatalo au; ko iētahi tuhituhiga e lea mai fakalāina ma tatalo au. i toku fale i te tolu i te afiafi. Kae nā lava e teki ko he taulealea e kofu pupula kua tū mai i oku mua 31ma lea vē mai, ‘Konelio! Kua lagona e te Atua au tatalo, ma ia kitea au gāluega alofa ki tagata mātitiva. 32Uga he tino ki Iopa ki he tino e igoa ki a Himona Petelu. E i te fale o Himona, he tino gaohi mea mai nā pakumanu, ma e pili tona fale ki te tai.’ 33Oi na fekau atu ai loa lava koe i te taimi tēnā, ma kua alofa mai ai koe ke hau. I te taimi la tēnei, ko ki mātou uma kua i kinei i mua o te Atua, e fakatalitali ke fakalogo ki mātou ki nā mea uma na fakatonu atu e te Aliki, ke tautala ai koe”
Ko te Lāuga a Petelu
34 #
Teu 10.17
Ma na kāmata ai oi tautala vēnei atu ia Petelu: “Kua mautinoa e au i te taimi nei ko te Atua e hē fakapito ki he tino. 35Ko nā tino e tāpuaki ki te Atua ma ki lātou faia te mea tonu, e talia ki lātou e ia, e tuha lava pe ko fea te mālō e ōmamai ai. 36Kua koutou iloa te fekau na ia kaumaia ki tagata o Ihalaelu, na folafola ai te Tala Lelei o te fīlēmū e ala ia Iehu Keliho, te Aliki o tagata uma. 37Kua koutou iloa te mea lahi na tupu i luga o Ihalaelu kātoa kāmata mai i Kalilaia, i te umaga o te papatihoga na tālaki e Ioane. 38Kua koutou iloa te tala ki a Iehu te Nahaleta, i te liligi ifoga e te Atua ki ona luga te Agaga Paia ma te mana. Na fano ki nā koga kehekehe, ma ia faia nā gāluega lelei ma fakamālōlō ki lātou nae i lalo o te pule a te Tiāpolo, ona nae fakatahi te Atua ma ia. 39Ko ki mātou ni molimau ki nā mea uma na ia faia i te kakai ko Ieluhalema, ma iētahi vāega o te fenua o tagata Iutaia. Na ki lātou tāmatea i te tutukiga e ki lātou o ia ki te hātaulo. 40Kae na toe fakatū e te Atua mai te oti i tona tolu o aho, ma ko tona lava finagalo ke fakakitea ia Iehu, 41e hē ki tagata uma, kae ki a te ki mātou oioti kua uma te filifilia e te Atua, ki mātou iēnei na kakai ma inu fakatahi ma Iehu talu tona toetū mai te oti. 42Ma na fakatonu mai ki mātou e Iehu ke tālaki te Tala Lelei ki tagata, ma ke molimau ko ia te kua tōfia e te Atua ke fai ma fakamahino o nā tino koi ola, vēnā ma ki lātou kua feoti. 43Ko ia te na molimau ai te kau pelofeta uma, ko nā tino uma e talitonu ki a te ia, ka fakamāgalogia a lātou agahala, e ala i te mana o tona igoa.”
Kua Fanaifo te Agaga Paia ki luga o Tagata Nukukehe
44Ka koi tautala ia Petelu, kae fanaifo te Agaga Paia ki luga o ki lātou uma nae fakalogologo ki te fekau. 45Na ofo lele nā tino Iutaia kua talitonu ki te Aliki na ōifo ma Petelu mai Iopa, ona e pa foki lava ki nā tagata nukukehe, kua liligi ifo e te Atua tana meaalofa ko te Agaga Paia ki o lātou luga. 46Auā kua ki lātou lagona atu kua tautala i ni gagana kehe, ma viviki ake ki te hilihili kehe o te Atua. Kua lea vē atu ia Petelu; 47“Ko nā tino iēnei kua ki lātou maua te Agaga Paia, e vē foki lava ona ki mātou mauagia. E mafai la e he tino oi tāofi ke nahe papatihoa ki lātou i te vai?” 48Oi na fakatonu loa e ia ke papatiho ia Konelio, tona kāiga ma ana uō, i te igoa o Iehu Keliho. Oi lea ai ki lātou ki a Petelu ke toe nofo mo ni nai aho.
Currently Selected:
Gāluega 10: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.