Elshiler 5
5
Xananiya hám Safira
1Al Xananiya atlı adam hayalı Safira menen mal-múlkin satıp, 2aqshanıń bir bólegin jasırıp qaldı da, qalǵan bólegin ákelip elshilerdiń qolına saldı. Bunnan onıń hayalınıń da xabarı bar edi.
3Sonda Petr oǵan bılay dedi:
– Xananiya, nege shaytanǵa júregińnen orın berip, Muxaddes Ruwxtı aldadıń hám satılǵan jerdiń aqshasınıń bir bólegin alıp qaldıń? 4Jer satılmay-aq saǵan tiyisli emes pe edi? Satılǵannan soń da, aqshasın qálegenińshe jumsawǵa erkli emes pe ediń? Nege bunday is islewge niyet ettiń? Sen adamlardı emes, Qudaydı aldadıń.
5Xananiya bul sózlerdi esitiwden-aq jerge jıǵılıp, jan tapsırdı. Bunı esitkenlerdiń hámmesin kúshli qorqınısh biyledi. 6Jas jigitler orınlarınan turıp, onıń denesin kepinledi de, alıp ketip jerledi.
7Aradan shama menen úsh saattay ótkende, bolǵan waqıyadan xabarsız Xananiyanıń hayalı ishke kirip keldi. 8Petr oǵan:
– Maǵan aytshı, jerdi usınsha aqshaǵa sattıńlar ma? – dedi.
– Awa, soǵan, – dedi hayal.
9Petr oǵan bılay dedi:
– Nege Jaratqan Iyeniń Ruwxın sınap kóriwge kelistińler? Ánekey, kúyewińdi jerlegenler esikten kirip kiyatır. Olar seni de alıp ketedi.
10Hayal sol waqıtta-aq Petrdiń ayaǵına jıǵılıp, jan tapsırdı. Ishke kirgen jas jigitler onıń ólip qalǵanın kórip, sırtqa alıp ketti de, kúyewiniń qasına jerledi. 11Pútkil iseniwshiler jámáátin hám bolǵan waqıyalardı esitkenlerdiń hámmesin kúshli qorqınısh biyledi.
Elshilerdiń kóp adamlarǵa shıpa beriwi
12Xalıq arasında elshiler arqalı kóp káramatlı belgiler kórsetilip, tań qalarlıq isler islenetuǵın edi. Iseniwshilerdiń hámmesi Sulaymannıń aywanında jıynalıp turatuǵın edi. 13Sırttan olarǵa qosılıwǵa hesh kimniń batılı barmaytuǵın edi, biraq xalıq olarǵa kóp alǵıslar aytatuǵın edi. 14Jáne de, Iyemizge isenip, iseniwshilerge qosılǵan er hám hayallardıń sanı barǵan sayın arta berdi. 15Hátte, Petr ótip baratırǵanda, hesh bolmasa onıń sayası awırıwlardıń biriniń ústine tússin dep, olardı kóshelerge shıǵarıp, kátler hám tóseklerdiń ústilerine jatqızıp qoydı. 16Erusalimniń dógeregindegi qalashalardan da kóp adamlar jıynalıp, awırıwlardı hám jawız ruwxlardan azap shekkenlerdi alıp keletuǵın edi. Olardıń hámmesi shıpa tabatuǵın edi.
Elshilerdiń quwdalanıwı
17Sonda bas ruwxaniy hám onıń tárepdarlarınıń hámmesi, yaǵnıy saddukey toparınıń aǵzalarınıń qızǵanıshtan ishleri janıp, 18elshilerdi uslattı da, mámleket qamaqxanasına qamatıp tasladı. 19Biraq túnde Iyemizdiń bir perishtesi qamaqxananıń qapıların ashıp, olardı sırtqa shıǵardı da:
20– Barıńlar, Ibadatxanada turıp, bul jańa ómir tuwralı sózlerdiń barlıǵın xalıqqa aytıńlar, – dedi.
21Elshiler aytılǵandı tıńlap, tań sáhárde Ibadatxanaǵa bardı da, tálim bere basladı.
Sol waqıtta bas ruwxaniy hám onıń tárepdarları kelip, joqarǵı keńestiń adamların, yaǵnıy Izrail xalqınıń barlıq aqsaqalların jıynalıwǵa shaqırdı hám elshilerdi alıp keliw ushın qamaqxanaǵa adam jiberdi. 22Biraq, saqshılar qamaqxanaǵa barǵanda elshilerdi tappay, izlerine qaytıp keldi de, mınalardı xabarladı:
23– Qamaqxananıń bekkem etip jabılǵanın, qapılardıń awzında qarawıllardıń turǵanın kórdik. Biraq, qapılardı ashqanımızda, ishten hesh kimdi tappadıq.
24Bul sózlerdi esitken Ibadatxana saqshılarınıń basshısı menen bas ruwxaniyler: «Bul ne bolǵanı» dep, albırasıp qaldı.
25Sonda olardıń qasına bir adam kelip:
– Áne, sizler qamaqqa salǵan adamlar Ibadatxanada tálim berip tur, – dep xabarladı.
26Solay etip, saqshılardıń basshısı saqshılar menen birge ketip, elshilerdi alıp keldi. Biraq xalıqtıń ózlerin tas boran qılıwınan qorqıp, olarǵa zorlıq islemedi.
27Olar elshilerdi alıp kelip, joqarǵı keńestiń aldında turǵızıp qoydı. Bas ruwxaniy elshilerdi sorawǵa tutıp:
28– Bul at penen tálim bermeń, dep qatań buyırǵan edik-ǵo. Biraq sizler óz tálimatıńızdı pútkil Erusalim qalasına jayıpsızlar. Bul Adamnıń qanınıń tógiliwine de bizlerdi juwapker qılmaqshısızlar, – dedi.
29Petr menen basqa elshiler bılay dep juwap berdi:
– Adamlarǵa emes, Qudayǵa boysınıw tiyis! 30Ata-babalarımızdıń Qudayı sizler atanaq aǵashqa shegelep óltirgen Iysanı qayta tiriltti. 31Izraildıń táwbe etip, gúnalarınıń keshiriliwi ushın, Quday Onı Kósem hám Qutqarıwshı qılıp, Óziniń oń tárepine kóterdi. 32Bizler bul islerdiń gúwasımız. Sonday-aq, Qudaydıń Ózine boysınatuǵınlarǵa beretuǵın Muxaddes Ruwxı da bularǵa gúwa.
33Joqarǵı keńes aǵzaları bunı esitkende ashıwǵa minip, elshilerdi óltirmekshi boldı. 34Biraq, pútkil xalıqtıń húrmetine iye bolǵan nızam muǵallimi Gamaliel atlı bir parisey#5:34 Parisey – yahudiylerdiń kúshli diniy toparlarınıń birine tiyisli adam. keńeste ornınan turıp, elshilerdi az-maz waqıtqa sırtqa shıǵarıp turıwdı buyırdı. 35Sońınan ol keńes aǵzalarına bılay dedi:
– Izraillılar! Bul adamlarǵa isleyjaq isińizdi abaylap isleńler. 36Sebebi bunnan burın ózin ullı dep esaplaǵan Teudas atlı bir adam shıqqan edi. Oǵan tórt júzge shamalas adam qosıldı. Biraq ol óltirilip, izine ergenlerdiń hámmesi tarqap, joq bolıp ketti. 37Onnan soń, xalıqtıń esabı alınǵan kúnlerde galilalı Yahuda shıǵıp, bir topar adamlardı izine ertti. Ol da óltirilip, izine ergenlerdiń hámmesi tarqap ketti. 38Sonlıqtan endi sizlerge aytatuǵınım mınaw: bul adamlarǵa tiymeńler, olardı tınıshına qoyıńlar. Óytkeni bul is-háreket adamlardan bolsa, ol iske aspaydı. 39Biraq Qudaydan bolsa, bul adamlardı joq qıla almaysızlar. Jáne de, Qudayǵa qarsı urısıwshı bolıp qalıwıńız da múmkin.
40Keńes aǵzaları Gamalieldiń másláhátin qabıl etti de, elshilerdi ishke shaqırtıp, olardı qamshılattı hám Iysanıń atı menen waz aytpawdı buyırıp, bosatıp jiberdi. 41Elshiler Iysanıń atı sebepli masqaralanıwǵa miyasar bolǵanı ushın joqarǵı keńesten quwanıshlı túrde shıǵıp ketti. 42Olar hár kúni Ibadatxanada hám úyme-úy tálim beriwin, Iysanıń Masiyx ekeni haqqında Xosh Xabardı járiyalawın toqtatqan joq.
Currently Selected:
Elshiler 5: QrqMK22
Tõsta esile
Share
Kopeeri
Want to have your highlights saved across all your devices? Sign up or sign in
© Институт перевода Библии, 2022