Elshiler 4
4
Petr hám Yuxan joqarǵı keńes aldında
1Petr menen Yuxan xalıqqa sóylep turǵanda, ruwxaniyler, Ibadatxana saqshılarınıń basshısı hám saddukeyler#4:1 Saddukeyler – yahudiylerdiń kúshli diniy toparı. olardıń janına toparlasıp keldi. 2Óytkeni olardıń xalıqqa tálim berip, Iysanıń mısalında ólilerdiń qayta tiriletuǵının járiyalaǵanına qattı ashıwlı edi. 3Sonlıqtan olar Petr menen Yuxandı uslap aldı da, erteńine deyin qamap qoydı. Sebebi kún kesh bolıp qalǵan edi. 4Biraq, elshilerdiń sózin esitken adamlardıń kóbisi isendi. Isengen er adamlardıń sanı bes mıńǵa shamalas edi.
5Kelesi kúni yahudiy basshıları, aqsaqallar hám diniy muǵallimler Erusalimge jıynaldı. 6Bas ruwxaniy Xanna menen Kayafa, Yuxan, Iskender hám bas ruwxaniydiń urpaǵınan bolǵan basqa adamlar da sol jerde edi. 7Olar Petr menen Yuxandı ortaǵa turǵızıp, olardan:
– Sizler bunı qanday kúsh penen hám kimniń atı menen isledińler? – dep soradı.
8Sonda Petr Muxaddes Ruwxqa tolıp bılay dedi:
– Xalıq basshıları hám aqsaqallar! 9Bul láń adamǵa islengen jaqsılıq hám onıń qalay shıpa tapqanı haqqında bizler búgin tergelip atırǵan bolsaq, 10onda sizlerdiń hámmeńiz hám pútkil Izrail xalqı mınanı bilip qoyıńlar: bul adam sizler atanaq aǵashqa shegelegen, biraq Quday ólimnen qayta tiriltken nasıralı Iysa Masiyxtıń atınıń qúdireti menen sap-saw bolıp, aldıńızda tur.
11Sol Iysa haqqında Muxaddes Jazıwda bılay dep aytılǵan:
«Siz, qurılısshılardıń kereksiz dep taslaǵan tası,
Úydiń múyeshiniń tiykarǵı tası boldı»#4:11 Zab 117:22..
12Iysadan basqa hesh kim arqalı qutqarılıw joq. Qutqarılıwımız ushın aspan astında adamlarǵa berilgen basqa hesh bir at joq.
13Keńes aǵzaları Petr menen Yuxannıń bilimsiz hám qarapayım adamlar ekenin bayqap, olardıń batıllıǵın kórgende tań qalıstı. Olardıń Iysa menen birge bolǵanın bildi. 14Biraq shıpa tapqan adamnıń Petr hám Yuxan menen turǵanın kórip, olarǵa qarsı hesh nárse ayta almadı. 15Solay etip, keńes aǵzaları olarǵa sırtqa shıǵıp ketiwdi buyırdı da, sońınan óz ara keńese baslap:
16– Bul adamlarǵa ne islesek eken? Erusalimde jasaytuǵın hár bir adam olardıń anıq káramatlı belgi islegenin biledi. Bizler bunı biykarlay almaymız. 17Biraq, bul xabardıń xalıq arasında jáne de kóbirek jayılmawı ushın, bunnan bılay Iysanıń atı menen hesh kimge hesh qashan sóylemeńler dep, qorqıtıp qoyayıq, – desti.
18Sońınan olardı shaqırıp alıp, Iysanıń atı menen hesh nárse aytpawların hám úyretpewlerin buyırdı. 19Biraq, Petr menen Yuxan olarǵa juwap berip:
– Ózlerińiz oylap kóriń: Qudaydıń sózlerinen góre, sizlerdiń sózlerińizge qulaq asıw Quday aldında durıs bolar ma eken? 20Bizler kórgenlerimizdi hám esitkenlerimizdi aytpay tura almaymız, – dedi.
21Keńes aǵzaları jazalaw ushın hesh qanday sebep taba almaǵanlıqtan, olardı jáne qorqıttı da, bosatıp jiberdi. Óytkeni bolǵan waqıya ushın pútkil xalıq Qudayǵa alǵıslar aytıp turǵan edi. 22Sebebi káramatlı shıpa nátiyjesinde jazılǵan adamnıń jası qırıqtan asqan edi.
Iseniwshilerdiń duwa etiwi
23Petr menen Yuxan bosatılǵannan soń joldaslarına barıp, bas ruwxaniyler menen aqsaqallardıń ózlerine aytqan sózleriniń hámmesin xabarladı. 24Olar bunı esitkende, bir awızdan Qudayǵa qarata bálent dawıs penen bılay dedi:
– O, Qúdiretli Iyemiz! Aspandı, jerdi, teńizdi hám olardıń ishindegilerdiń hámmesin Sen jaratqansań. 25Óz xızmetshiń babamız Dawıttıń awzı menen Muxaddes Ruwx arqalı bılay degen ediń:
«Ne ushın kóterilis qıladı milletler?
Nege biyhuda jobalar dúzedi xalıqlar?
26Jaratqan Iyege hám Ol tayınlaǵan Masiyxqa qarsı,
Sap tartıp turadı jer júzindegi patshalar,
Jıynalıp, til biriktiredi húkimdarlar».#4:25-26 Zab 2:1-2.
27Haqıyqattan da, Hirod penen Pontiy Pilat bul qalada basqa milletler hám Izrail xalqı menen birge Sen tayınlaǵan muxaddes xızmetshiń Iysaǵa qarsı toplandı. 28Olar bunı Seniń qúdiretiń hám erkiń menen aldın ala belgilengenlerdi ámelge asırıw ushın isledi. 29Endi, O Iyemiz, olardıń aybat etiwlerine názer salıp, Seniń sózińdi tolıq mártlik penen aytıwǵa Óz qullarıńa kúsh-quwat bere gór! 30Muxaddes xızmetshiń Iysanıń atı menen awırıwlarǵa shıpa beriw ushın, káramatlı belgiler hám tań qalarlıq isler islew ushın qúdiretińdi kórsete gór!
31Duwa etip bolǵanda, olar jıynalǵan jer silkinip ketti. Hámmesi Muxaddes Ruwxqa tolıp, Qudaydıń sózin mártlik penen ayta basladı.
Iseniwshilerdiń awızbirshiligi
32Iseniwshiler jıyınındaǵı hámme adam bir jan, bir tán edi. Hesh qaysısı da óz mal-múlkin «meniki» demeytuǵın edi. Al hámme nársesin ortalıqqa qoydı. 33Elshiler Iyemiz Iysanıń qayta tirilgeni haqqında kúshli jiger menen, tásirli túrde gúwalıq beretuǵın edi hám olardıń hámmesi Qudaydıń ullı miyrimine iye edi. 34Olardıń arasında joqshılıqta jasaytuǵın adam bolǵan joq. Óytkeni jerleri yamasa úyleri barlar olardı satatuǵın edi. Túsken aqshaların alıp kelip, 35elshilerdiń qolına salatuǵın edi. Aqshalar hár kimge mútájligine qaray úlestiriletuǵın edi.
36Mısalı: Lebiy urıwınan shıqqan Yusup degen kiprli bir adam bar edi. Elshiler oǵan Barnaba, yaǵnıy «Jubanısh beriwshi» degendi ańlatatuǵın at bergen edi. 37Ol ózine tiyisli jerdi sattı da, aqshasın ákelip, elshilerdiń qolına saldı.
Currently Selected:
Elshiler 4: QrqMK22
Tõsta esile
Share
Kopeeri
Want to have your highlights saved across all your devices? Sign up or sign in
© Институт перевода Библии, 2022