Elshiler 3
3
Ayaǵı láń adamnıń shıpa alıwı
1Bir kúni Petr menen Yuxan duwa etiw waqtında, tústen keyin saat úshte Ibadatxanaǵa baratır edi. 2Sol jerde ishten ayaǵı láń bolıp tuwılǵan bir adam bar edi. Ol Ibadatxanaǵa kelgenlerden sadaqa soraw ushın kóterip ákelinip, hár kúni Ibadatxananıń «Gózzal» degen qapısınıń qasında otırǵızılatuǵın edi. 3Bul adam Ibadatxanaǵa kirip baratırǵan Petr menen Yuxandı kórip, olardan sadaqa soradı. 4Petr menen Yuxan oǵan tigilip qaradı. Sońınan Petr oǵan:
– Bizlerge qara! – dedi.
5Sol adam olardan bir nárse alıwdı dámetip, olarǵa dıqqat penen tigilip qaldı.
6Petr oǵan:
– Mende gúmis hám altın joq, biraq saǵan ózimde barımdı beremen. Nasıralı Iysa Masiyxtıń atı menen buyıraman, júr! – dep 7onıń oń qolınan usladı da, ornınan turǵızdı. Sol waqıtta-aq onıń ayaqları menen tobıqlarına kúsh endi. 8Ol ornınan ushıp turdı da, júre basladı. Bılay-bılay júrip sekiriwi menen Qudayǵa alǵıslar aytıp, olar menen birge Ibadatxanaǵa kirdi. 9Pútkil xalıq onıń júrip baratırǵanın hám Qudaydı alǵıslap atırǵanın kórip, 10onıń Ibadatxananıń «Gózzal» degen qapısınıń qasında otırıp, tilenshilik etetuǵın adam ekenin tanıdı. Júz bergen waqıyaǵa olar qattı hayran qalısıp, ań-tań bolıstı.
Petrdiń Ibadatxanadaǵı sózi
11Jańaǵı adam Petr menen Yuxannan ayırılmay júrgende, pútkil xalıq hayran qalısıp, «Sulaymannıń aywanı» dep atalatuǵın jerge, olardıń qasına juwırısıp keldi. 12Bunı kórgen Petr xalıqqa qarata bılay dedi:
– Izraillılar, buǵan nege ań-tań bolıp atırsızlar? Bul adamdı bizler óz kúshimiz yamasa dinshilligimiz benen júrgizgendey, nege bizlerge tigilip tursızlar? 13Ibrayımnıń Qudayı, Ísaqtıń Qudayı, Yaqıptıń Qudayı, biziń ata-babalarımızdıń Qudayı Óz xızmetshisi Iysanı ullıladı. Sizler Onı uslap berdińler hám Pilat Onı bosatıwǵa qarar etkende, Pilattıń aldında Onnan waz keshtińler. 14Muxaddes hám haq Adamnan waz keship, bir adam óltiriwshiniń ózlerińizge bosatılıp beriliwin talap ettińler. 15Sizler Ómir Iyesin óltirdińler, biraq Quday Onı ólimnen tiriltti. Bizler buǵan gúwamız. 16Sizler kórgen hám tanıytuǵın bul adam Iysanıń atı menen, Onıń atına degen isenim menen shıpa taptı. Iysaǵa degen isenim hámmeńizdiń kóz aldıńızda oǵan tolıq shıpa berdi.
17Endi tuwısqanlarım, sizlerdiń bul isti basshılarıńız sıyaqlı bilmey islegenińizdi bilemen. 18Biraq barlıq payǵambarlar arqalı Óz Masiyxınıń azap shegetuǵının aldın ala bildirgen Quday Óz sózin usılay ámelge asırdı. 19-20Solay etip, táwbe etińler hám gúnalarıńızdıń juwılıwı ushın Qudayǵa qaytıńlar. Sonda Jaratqan Iye sizlerge ráhátleniw waqıtların beredi hám sizler ushın aldın ala tayınlanǵan Masiyxtı, yaǵnıy Iysanı jiberedi. 21Qudaydıń áyyemnen muxaddes payǵambarları arqalı aytqanınday, hámme nárseniń óz qálpine keliwine deyin Iysa aspanda bolıwı kerek. 22Óytkeni Muwsa bılay degen edi: «Qudayıńız Jaratqan Iye sizler ushın tuwısqanlarıńızdıń arasınan men sıyaqlı bir payǵambardı shıǵaradı. Onıń aytqan hár bir sózin tıńlańlar. 23Sol payǵambardı tıńlamaǵan hár bir adam Qudaydıń xalqı arasınan joq etiledi»#3:22-23 Nzm 18:15, 18-19..
24Samuel payǵambardan baslap, onnan keyin kelip sóylegen payǵambarlardıń hámmesi de usı kúnler haqqında boljaǵan edi. 25Sizler payǵambarlardıń hám Qudaydıń ata-babalarıńız benen dúzgen kelisiminiń miyrasxorlarısızlar. Sebebi Quday Ibrayımǵa bılay degen edi: «Seniń áwladıń arqalı jer júzindegi hámme xalıqlar jarılqanadı»#3:25 Jar 22:18; 26:4.. 26Hár birińizdi jaman joldan qaytarıp, sizlerdi jarılqaw ushın, Quday Ózi tayınlaǵan xızmetshisin eń aldı menen sizlerge jiberdi.
Currently Selected:
Elshiler 3: QrqMK22
Tõsta esile
Share
Kopeeri
Want to have your highlights saved across all your devices? Sign up or sign in
© Институт перевода Библии, 2022