Elshiler 6
6
Jeti xızmetshi
1Masiyxtıń shákirtleriniń sanı ósip atırǵan sol kúnlerde grekshe sóyleytuǵın iseniwshi yahudiyler tárepinen evreyshe sóyleytuǵın iseniwshi yahudiylerge qarsı narazılıq payda boldı. Sebebi kúndelikli járdem bólistirilgende, olardıń jesirlerine kewil awdarılmaytuǵın edi. 2Sonda on eki elshi hámme shákirtlerdi bir jerge jıynap:
– Qudaydıń sózin járiyalaw isin taslap, dasturxan basında xızmet etkenimiz durıs bolmas. 3Tuwısqanlarım! Arańızda jaqsı atı shıqqan, Muxaddes Ruwx penen danalıqqa tolǵan jeti adamdı tańlańlar. Olarǵa usı isti tapsırayıq. 4Al bizler ózlerimizdi duwa etiwge hám Qudaydıń sózin járiyalawǵa baǵıshlayıq, – dedi.
5Bul sóz pútkil jámáátke unadı. Olar isenimi kúshli hám Muxaddes Ruwxqa tolı bolǵan Stepandı, jáne de Filipti, Proxordı, Nikanordı, Timondı, Parmendi hám yahudiy dinine ótken antioxiyalı Nikolastı saylap, 6elshilerdiń aldında turǵızdı. Elshiler olardıń ústilerine qolların qoyıp, duwa etti.
7Solay etip, Qudaydıń sózi jayılıp, Erusalimdegi shákirtlerdiń sanı kóbeye berdi. Ruwxaniylerdiń kóbisi de elshilerdiń tálimin qabıl alıp, isene basladı.
Stepannıń qolǵa alınıwı
8Qudaydıń miyrimi menen qúdiretine tolı bolǵan Stepan xalıq arasında ullı tań qalarlıq nárseler hám káramatlı belgiler kórsetetuǵın edi. 9Degen menen, «Qullıqtan azat etilgenler» degen májilisxananıń kireneli hám iskenderiyalı ayırım aǵzaları, sonday-aq Kilikiya menen Aziyadan bolǵan adamlar Stepanǵa qarsı shıǵıp, onıń menen tartısa basladı. 10Biraq ol danalıq hám Muxaddes Ruwx penen sóylegenlikten, olar qarsı tura almadı. 11Sonda olar bir neshe adamdı úgitlep: «Onıń Muwsaǵa hám Qudayǵa til tiygizgenin esittik», – dep aytqızdı.
12Solay etip, olar xalıqtı, aqsaqallardı hám diniy muǵallimlerdi óshegistirip, bas salıp Stepandı usladı da, onı joqarǵı keńestiń aldına alıp keldi. 13Olar ákelgen jalǵan gúwalar:
– Mına adam Ibadatxanaǵa hám Muwsanıń Nızamına úzliksiz qarsı sóylep júr. 14Bizler onıń: «Nasıralı Iysa Ibadatxananı joq qıladı, Muwsanıń bizlerge bergen úrp-ádetlerin ózgertedi», – degenin esittik, – dedi.
15Joqarǵı keńeste otırǵanlardıń hámmesi Stepannıń júzine tigilip qarap, onıń júziniń perishteniń júzine uqsas ekenin kórdi.
Currently Selected:
Elshiler 6: QrqMK22
Tõsta esile
Share
Kopeeri
Want to have your highlights saved across all your devices? Sign up or sign in
© Институт перевода Библии, 2022