Matío 14
14
Lezwhī Jáaŋ nnoʼ‑epuɔ á ntshi
(Mlk 6.14-29; Lúk 9.7-9; 3.19-20)
1Á lɛ afʉʼ mɛ́t, Elōde esaʼa‑apak ŋgɔŋ Ŋgaliléa, á júʼ páʼ mɛ́ ghítɛ á Yɛɛ́so ánɛ menu mīi, a á si ŋghʉ̄ɛ, 2ńdé á mbū mecɔʼ pí ŋ́gɛ: «Ŋiŋ wuɔ yīi, mɛ́ ghítɛ á yí la, a á si ŋgɔ́ á Jáaŋ nnoʼ‑epuɔ á ntshi. Yí mé fhó á nnɔ mepfhō nzím, melaʼ épúp tɛ́ a wɛɛ̄ mete, á lelɔk ŋghʉ̄ meŋkʉʼne menu. »
3Á zi ŋgē egɔ́ épúp, mbɔ Elōde a le tswī mɛ́ gɔ Jáaŋ, ŋ́kwɛ́t á yí, ńnéŋ á ŋgyā atʉɛ́. A lɛɛ́ ŋghʉɛ épúp, melaʼ Elodiade nzwí méŋ mɔ́ yi Fílíio. 4Jáaŋ a lɛɛ́ eshúŋɔ á Elōde ŋ́gɛ: «Lepé é té si mvéŋɛ ŋ́gɛ, o ekʉ̄ɛ á nzwí méŋ mɔ́ wu, ńdɔk ŋghʉ̄ ewu ú. » 5Elōde á júʼ, ńnɔŋ efāʼa eshhʉ̄ á lezwhī Jáaŋ, ḿbiŋ nnɔ̄ŋ mbɔ́kɔ menēk alāʼ. Á gɔ́ páʼ, alāʼ á le kuʼté azɔ́p á légɛ, Jáaŋ a á si ŋgɔ́ mmɔʼ ntswi‑ŋke Ndém. 6Elōde á shʉʼ ntɔ́ŋ lekāk, á lelɔk ŋkímte aleʼé zīi, mɛ́ le zhí á yí. Méŋ Elodiade eyi menzwí, á kó éwú, ńzéŋ á mvhɔ mege, á pɔŋ á Elōde pɔŋŋ, 7tɛ á shúŋ tɛ ŋkā meka ŋ́gɛ, mɔ́ menzwí mɛ́t, a púu nzɛ́tte á yí á akɔ̄ lɛ́, mbɔ yí e yá á mbū yí. 8Mía mɔ́ menzwí wɔ̄, á tshóne á yí ŋ́gɛ, a egʉɔ ndé ŋ́gɛ, mɛ́ eyá athū Jáaŋ nnoʼ‑epuɔ á ntshi, á mbū yí tsetsɔŋɔ, á ntē apak akāŋ. 9Efɔ á júʼ épúp, mbū mí é pwɛ́t, melaʼ meka mīi, a á ndáʼ ŋkā á mvhɔ mege pí. Ńdɛ ntswī ŋ́gɛ, mɛ́ egɔ ŋgyá á mbū yí. 10Ntó ŋ́gɛ, mɛ́ egɔ nzáʼ á athū Jáaŋ, á ŋgyā atʉɛ́. 11Mɛ́ gʉɔ nzáʼ, ńnéŋ ánɛ apak akāŋ, ńdɔk eshʉ̄ʼ ŋ́gyá á mbū mɔ́ menzwí wɔ̄, á tswí ŋgyá á mbū mɛ́ wɔp. 12Megaŋ nnɔ Jáaŋ é júʼ, éshʉʼ ntswíʼ á apfhō zí ndɔk ŋgʉ̄ɔ ńtúŋ. Ŋ́gʉɔ mbɛ́te éshúŋ á Yɛɛ́so, á ajū mīi á tɔ́k.
Yɛɛ́so a á ega nzékɛ á ŋiŋnɔŋ ntsāʼ ntáa
(Mlk 6.30-44; Lúk 9.10-17; Jáŋ 6.1-15)
13Yɛɛ́so á júʼ ajʉɔ anu mɛ́t, ŋ́kó á ntē akɛnūʼ, éfhó á ajʉʼ zīi, a á ŋgɔ́ éwú, éfwɔ̄ʼ nnɛ̄t ŋgʉ̄ɔ mé ajʉʼ zīi, ŋiŋ a te éwú ú. Alāʼ á zhɛ́, éfhó á ntē metésɔŋ ntó, ŋ́gɔ́ á akʉŋɛ́ ntshi nzīŋɛ á esī, ńzhɛ̄nɛ á yí. 14Á kó éwú, ńdɛ ŋgē efhó á ntē akɛnūʼ etó, ńjʉ́ɔ atʉtʉ epuɔ, mezeŋɛ mɔ́p é kú á yí tɛʼ, á zi á leghʉ, megaŋ agɔ pɔ́p é te. 15Á kó ŋgɔ́ eseéŋ‑njhʉ̄, megaŋ nnɔ pí é tshóte nnɛ̄t mé lezēŋ tsí, ńdé á mbū yí ŋ́gɛ: «Ajʉʼ zīi ḿpɛ é éwú la, mba ŋiŋ e te éwú ú, njhʉ̄ é piŋ nzéŋ ŋgɔ́ mbɔ e é gʉɔ tɛʼ. Tswiī, alāʼ jʉɔ a egʉ̄ɔ, ḿbīŋ nzem mé mekap alāʼ, ńzó azō mpfɛ́t. » 16Yɛɛ́so á pwɛt á mbū pɔ́p ŋ́gɛ: «Á te si nzɛ́ttɛ ŋ́gɛ, pɔ́ egʉ̄ɔ á ajʉʼ ɛ́. Pɛ méŋwɛ̄t e eyá á wɔ́p etsō pɔ́ epfɛ́t. » 17Pɔ́ pwɛt á mbū yí ŋ́gɛ: «Pek lɛɛ̄ ŋgwɛ áa mblɛ ntāʼ táa, ŋ́ghʉ̄ mesōh ntāʼ epīa ndaʼ. » 18Á gɛ: «Pɛ elɔ̄k eshʉ̄ʼ ŋgyá mé meŋ, meŋ ejʉ́ɔ. » 19Ńdé épúp, ńtswī á mbū alāʼ ŋ́gɛ, pɔ́ enáŋte á esī ánɛ mvēŋ. Ńtswí mblɛ jɔ̄ ntāʼ táa, pɔ́ mesōh mwɔ̄ ntāʼ pīa, ḿbʉ́ʼɛ menēk mí ncʉ̄ lephū, ésyákne á Ndém éwú, ḿbwɔ́ʼte mblɛ ŋgyá á mbū nnɔ yí, nnɔ yí é tswí ŋgāpte á mbū alāʼ. 20Epuɔ metsem é pfɛ́t tɛ nzwɛ́t. Nnɔ yí é cúʼte epwɔ̄ʼ tsīi é vuʼɔ, é ló metúŋ ntsɔp pīa mé legēm. 21Epuɔ pīi, é le pfɛ́t etsō mɛ́t, pɔ́ le nɔ̄ŋ ŋgʉɔ ajūɔ ŋiŋnɔŋ ntsāʼ táa, té sáŋ wɔnzwí mbɔɔ ewɔŋkhʉ̄.
Yɛɛ́so a á ega nzīŋɛ á ndo ntshi
(Mlk 6.45-52; Jáŋ 6.16-21)
22Yɛɛ́so á lɛ ŋkōne nnɔ yí ŋ́gɛ, pɔ́ ekɔ́ʼ ŋkó á ntē akɛnūʼ, ńtó ntshi mbīk á nzéŋ mmɔʼ, yí ecʉ́ʼ nzɛ́t ndāʼnɛ alāʼ, pɔ́ egʉ̄ɔte. 23Á laʼne alāʼ tɛ pɔ́ gʉɔte, á pe mé ndo lekwɛ̄t yíléyī, á eswíŋte Ndém. Eseéŋ‑njhʉ̄ á ge ekuʼe, á gɔ́ éwú yíléyī. 24Mbɔ akɛnūʼ á ndáʼ nzi nzīŋ, tɛ ŋgɔ́ mé tsetsɛlɛ ntshi, fefwɛt á piŋ nnɔ̄ŋ efhɔ́ɔ mé mvhɔ ntúʼɔ, ŋ́ghʉ̄ɛ ntshi é pú nnʉ̄ʼɛ akɛnūʼ. 25Á ghʉ ŋgɔ́ ánɛ ajūɔ melanjhʉ̄, Yɛɛ́so á ge eshʉʼ mé lezēŋ nnɔ yí, ńnɔŋ nzīŋɛ á ndo ntshi. 26Pɔ́ jʉ́ɔ páʼ a á si nzīŋɛ á ndo ntshi, ecɔʼ é pú ŋgɔ̄ á wɔ́p, pɔ́ nɔŋ nchʉ̄ɛ meŋguŋ ndʉ́ɛ́ ŋ́gɛ: «Á gɔ́ áa agega ŋiŋ. » 27Tɛ́ Yɛɛ́so á lɛ ndé á mbū pɔ́p ŋ́gɛ: «Pɛ ekúʼte nnɛ̄t zɛ. A gɔ́ áa gá, ndɛ́ʼ pɛ ezéŋ mbɔ́k. » 28Piɛ á tswí ashuŋne, ndé á mbū yí ŋ́gɛ: «Mɔʼɔ́ wek, a gɔ́ ŋké ŋgɔ́ á kwaʼ wu, o etswī ŋ́gɛ, meŋ ezīŋ azá á ndo ntshi, éshʉʼ ntswɛ́tte á wú. » 29Á gɛ: «Shʉʼɛ̄. » Piɛ á fhó á ntē akɛnūʼ esóʼo, ńnɔŋ nzīŋɛ á ndo ntshi, ŋgʉ̄ɔ mé lezēŋ Yɛɛ́so. 30Táʼ, ḿbiŋ njʉ́ɔ ntií zīi, afēm á si ndɔkɔ ntúʼɔ épúp, ecɔʼ é gɔ á yí, á lɛ nzī á lecū mé ntē ntshi, ŋ́gaʼte ndé ŋ́gɛ: «Mɔʼɔ́ wek, lɛ ŋghʉ̄ meŋ etswɛ́t. » 31Yɛɛ́so á lɛ ŋgē ena apū elɔk ekwáp á yí, ńnɔŋ ndʉ́ɛ́ á mbū yí ŋ́gɛ: «Ewu lefɛ̄ nnɛ̄t ŋgyá mé meŋ, a te kʉɔ́k e. Melaʼ akɔ̄ o ó miʼte ē?» 32Pɔ́ yí é zíʼ ŋkó á ntē akɛnūʼ, afēm á lɛ nzáʼa. 33Epuɔ pīi é ŋgɔ́ á ntē akɛnūʼ, é tswíʼte á mvhɔ yí, ńdé á mbū yí ŋ́gɛ: «Á kwaʼ anuúnē, o ó si ŋgɔ́ á Méŋ Ndém. »
Yɛɛ́so a á ega ŋghʉ̄ɛ megaŋ agɔ é tʉɛ, á Jenezalɛt
(Mlk 6.53-56)
34Pɔ́ tó ntshi tɛ mmāk, ŋ́kó á Jenezalɛt, á amɔ̄ʼ akap alāʼ. 35Epuɔ ajʉʼ mɛ́t é yiŋ á yí, ḿbú ŋghí á yí, á ntē aziɛ́ akap alāʼ. Epuɔ é júʼ, ḿbú ndɔ̄k megaŋ agɔ ntsem, éshʉʼ njʉ́ɔ á yí. 36Éswíŋte á yí ŋ́gɛ, a elɛ ncʉ́ʼ megaŋ agɔ e epfēŋ tsɔ alē nzhó zí ndaʼ. Epuɔ metsem pīi, é lɛ si mbúu mpfēŋɛ á yí, é lɛ si mbúu ntʉ̄ɛ̄.
Currently Selected:
Matío 14: ybb
Tõsta esile
Share
Copy
Want to have your highlights saved across all your devices? Sign up or sign in
© CABTAL