Matío 13
13
Yɛɛ́so a á ega ndɔ̄kɔ meshuŋne lepúʼ, ńzíʼnɛ epuɔ anu, ánɛ Lefɔ Ndém
(Mlk 4.1-9; Lúk 8.4-8)
1Á lɛ ánɛ aleʼé mɛ́t, Yɛɛ́so á fhó á ŋgyā ntó ŋgʉ̄ɔ ńnáŋ á akʉŋɛ́ mía ntshi Ŋgaliléa. 2Alāʼ á shʉʼ ncúʼte á lezēŋ yí, ńzá zāa tɛ́ á kɔ́ʼ nnáŋ á ntē akɛnūʼ. Alāʼ á zɛ́t ntshí á akʉŋɛ́ ntshi.
3Á lɔk meshuŋne lepúʼ, éshúŋ á wɔ́p menu tɛ é zá. Ńdé á mbū pɔ́p ŋ́gɛ: «Mmɔʼ ŋiŋ a le gʉ̄ɔ á ŋkāʼ yí á mbhií etsō#13.3 Ntií lephi etsō mɛ́t, e é páʼ mɛ́ maʼa nzap lā., 4ŋ́kó á lephi etsō mɛ́t, emɔ̄ʼ mesa é whʉte á ndo mɛnzhɛ, meséŋ é shʉʼ ntsókte, ḿbú mpfɛ́t. 5Emɔ̄ʼ mesa é whʉte ánɛ ajʉʼ metɔ́. Ájʉʼ zīi atsáʼ á té tswhi ŋgɔ́ éwú ú. Éshʉʼ ŋgákne ésáʼ, melaʼ mīi, atsáʼ á té ajʉʼ mɛ́t tɛ esɛ̄h ɛ́. 6Nu á kyá, á gɔ́ páʼ meŋgaŋ é kaá ntswhi ŋgɔ́ éwú lā, á pú ntɔ̄ etsō mɛ́t, tɛ é zó. 7Emɔ̄ʼ mesa é whʉte, á ajʉʼ mmɔʼ tepɔŋ mvēŋ. Pɔ́ a pɔ́p é púte esáʼ, tepɔŋ mvēŋ mɛ́t, á pú ŋkwɛ́t etsō mɛ́t, tɛ é té júʼ á letswhī ɛ́. 8Emɔ̄ʼ mesa etsō mɛ́t, é le ké ŋgwhʉte á ajʉʼ atsáʼ mbɔŋ, éshʉʼ nzém á mbɔŋɔ́, tɛ mɛ́ faʼ, é tɔ́k etsi, mɛ́ le phī éwú, ŋ́gʉɔ ŋkhʉ. Emɔ̄ʼ é nɔŋ ntɔ́kɔ, ŋgʉɔ megēm ntokó. Emɔ̄ʼ é kó nnɔ̄ŋ ntɔ́kɔ ŋgʉɔ megēm tɛ́t. 9Ŋiŋ a wiɛ metuúŋ á lelɔk njúʼ ejʉʼ, á júʼ. »
Melaʼ akɔ̄ Yɛɛ́so a lɔkɔ meshuŋne lepúʼ tɛ́ eshúŋnɛ ɛ́?
(Mlk 4.10-12; Lúk 8.9-10)
10Nnɔ Yɛɛ́so é tshóte nnɛ̄t mé lezēŋ tsí, ńzɛ́tte á yí ŋ́gɛ: «Melaʼ akɔ̄ o lɔkɔ ashuŋne lepúʼ, tɛ́ eshúŋnɛ á mbū alāʼ ē?» 11Á pwɛt á mbū pɔ́p ŋ́gɛ: «Mélaʼ mīi, Ndém a ke ghʉ̄ʉ, pɛ pwɔ̄, é zhɛɛ́ ajū mīi, á lʉɔneē ánɛ lefɔ tsí, ḿbiŋ te ghʉ̄ épúp, á mbū pɔ́p ɔ́. 12Ŋiŋ yīi a wɛɛ̄ azō, Ndém a a shʉʼ etswiʼne, a epiŋ mbú ŋgwɛ̄ tɛ a ezá. Ŋiŋ yīi a te azō wɛ, Ndém a a shʉʼ ekú á méŋ agáʼ yīi, a á nzi ŋgwɛ̄. 13Ajū mīi á ghʉɛ tɛ́ meŋ ndɔkɔ ashuŋne lepúʼ tɛ́ eshúŋnɛ á mbū alāʼ, é melaʼ mīi, pɔ́ cʉte ejʉʼ, ḿbiŋ te azō jʉ́ɔ, ńzwíʼte ejʉʼ, ḿbiŋ te azō júʼ. 14Á gɔ́ épúp á mbū pɔ́p, ńdɔk ŋgɔ́ páʼ Ndém a le lɔ̄k nchu ntswi‑ŋke yi Izayi, ńdé ŋ́gɛ:
“Pɛ e shʉʼ echʉ́ nnɛ̄t ezwíʼte ejʉʼ, éké le azō júʼ.
Pɛ e shʉʼ echʉ́ nnɛ̄t ecʉte ejʉʼ, éké le azō jʉ́ɔ.
15Púp melaʼ mīi, ntē epuɔ alāʼ puɔ, é kʉʉ̄ŋ nte páʼ metɔ́ lā.
Pɛ kʉʉ̄ŋ nzeŋne metuúŋ mɛ́,
ŋ́kápte menēk mɛ́,
ŋ́gɛ pɛ gɔ le zéŋ ndɔ̄k metuúŋ mɛ́ njúʼ ejʉʼ ɛ́,
ḿbīŋ le zéŋ ndɔ̄k
menēk mɛ́ njʉ́ɔ ejʉʼ ɛ́.
Ńdɔkɔ te ŋkɔ̄ŋɔ
á lelɔk ntē wɛ́,
ńtswí anu zīi
mɛ́ é shúŋ á wɛ́ ɛ́.
Ńdɔkɔ te ŋkɔ̄ŋɔ á lepiŋ nzem á mbū meŋ,
meŋ mbɛ́t melɔ́ʼ muɔ mɛ́t ɛ́.”
16«Ŋ́ké ŋgɔ́ mé pɛ, mbɔ pɛ é meshhʉ̄ mbɔŋ, melaʼ mīi, menēk mɛ́ é si njʉ́ɔɔ ejʉʼ, metuúŋ mɛ́ é nɔŋ njúʼɔ ejʉʼ. 17Meŋ shúŋɔ á wɛ́ á kwaʼ anuúnē ŋ́gɛ, metswi‑ŋke Ndém tɛ nzáne mbɔɔ wɔ júʼ‑nchu Ndém tɛ nzáne, é le tsá á wɔ́p á lejʉ̄ɔ ajū mīi, pɛ é ayáʼa njʉ́ɔ la, ńdáʼ te jʉ́ɔ. Ńtsá á wɔ́p á lejūʼ ajū mīi, pɛ é ayáʼa njúʼɔ, ńdáʼ te júʼ.
Yɛɛ́so a á ega ŋkɛ́ʼtɛ ashuŋne lepúʼ ánɛ mbhi‑etsō
(Mlk 4.13-20; Lúk 8.11-15)
18«Pɛ eké njúʼ anu zīi, ashuŋne lepúʼ ánɛ mbhi‑etsō, á lɔkɔ ndʉ́ɛ́. 19Ndo mɛnzhɛ zīi, emɔ̄ʼ mesa etsō é le whʉtē éwú lā, é si ŋgɔ́ epuɔ pīi, é juúʼ anu Lefɔ Ndém, pɔ́ té kúʼte. Sɛ́ta á lɛ eshʉ̄ʼ efhó á ntē pɔ́p, éfók azi pɔ́ nzi njúʼ. 20Ajʉʼ metɔ́ zīi, mesa etsō é le whʉtē éwú, á si ŋgɔ́ á ŋiŋ yīi, a juúʼ ashuŋne Ndém, ńdɛ ndɔ̄k lekāk ntswí. 21Ḿbiŋ te cʉ́ʼ tɛ, ashuŋne mɛ́t á kó á ntē yí, tɛ ndɛ̄t meŋgaŋ á. Ńdɛ ŋkúʼte áa ánɛ aleʼé alāʼ. Ŋgʉɔ̄ʼ é lɛ ŋgē eshʉʼ á mbū yí, kɛ mɛ́ lɛ náʼ ŋgē elʉɔ́ʼ á yí melaʼ mīi, a á kúʼte anu Ndém lɛ́, á lɛ mbú ŋgwáʼ anu Ndém mɛ́t. 22Tepɔŋ mvēŋ yīi, mesa etsō é le whʉtē éwú lā, a á si ŋgɔ́ á ŋiŋ yīi, a juúʼ ashuŋne Ndém, ńdɛ ŋgē etém nzem, menu ŋgɔŋ muɔ, é jhʉ́ ntē yí. Á zi á letshī ntē yí ánɛ lewūʼ esī atsetsáʼ tsīi, é gɔ́ áa mepɔp. Ecʉɔ etsō mɛ́t, é pú ŋkwɛ́t anu Ndém á ntē yí, tɛ á pí, té zém ntá. 23Ajʉʼ atsáʼ mbɔŋ zīi, mesa é le ké mbiŋ ŋgwhʉ̄te éwú lā, á si ŋgɔ́ á ŋiŋ yīi, a juúʼ ashuŋne Ndém, ŋ́kúʼte. Ŋgaŋ a á páʼ mesa ecū mīi, mɛ́ le phīī, emɔ̄ʼ é shʉʼ nzém mbaŋ ŋkhʉ, emɔ̄ʼ é zém mbaŋ megēm ntokó, emɔ̄ʼ é zém mbaŋ megēm ntɛ́t lā. »
Ashuŋne lepúʼ ánɛ tepɔŋ mvēŋ
24Yɛɛ́so á zéŋ eshúŋ alāʼ, á amɔ̄ʼ ashuŋne lepúʼ, ńdé ŋ́gɛ: «Lefɔ Ndém é swhií anu mmɔʼ ŋiŋ yīi, a le phī nzwɛt etsō mbɔŋ á ŋkāʼ yí. 25Epuɔ metsem é ge enɔŋ elíi, ŋgaŋ mbo yi, á shʉʼ á ntē etsō mbɔŋ mɛ́t, ḿbhī á tepɔŋ mvēŋ, ŋ́gʉ̄ɔ. 26Etsō é shʉʼ esáʼ tɛ ŋgē ezém, mbɔ tepɔŋ mvēŋ a á zéŋ ntswhí azí. 27Megaŋ afaʼ ŋgaŋ ŋkāʼ, é shʉʼ ndé á mbū yí ŋ́gɛ: “Mɛkwáŋ, nɔ́ŋ ŋ́gɛ, o le phī áa nzwɛt etsō mbɔŋ á ŋkāʼ wu. Tepɔŋ mvēŋ a piŋɛ ŋkɔ́ʼɔ egɔ́ éwú ú?” 28Á pwɛt á mbū pɔ́p ŋ́gɛ: “Ŋgaŋ mbo mé ke ghʉ̄ épúp.” Megaŋ afaʼ é zɛ́tte á yí ŋ́gɛ: “O ó kɔŋ ŋ́gɛ, pek egʉɔ ntsɔ́ʼ ŋ́gwáʼ lɛ́?” 29Á pwɛt ŋ́gɛ: “Ŋgáŋ, mbɔ́k á wɛ́ á letē á ntsɔ́ʼ á tepɔŋ mvēŋ, ŋ́kó ntsɔ́ʼ etsō mbɔŋ. 30Pɛ ecʉ́ʼ pɔ́ epúte ntswhí, tɛ ndáʼ ŋkūʼ á lefaʼ. Ajɔ̄ afʉʼ, meŋ ndé á mbū wɔ faʼ‑etsō ŋ́gɛ, pɛ ezī mvhɔ, ńtsɔ́ʼ á tepɔŋ mvēŋ, ŋ́kwɛ́t mbwɔʼ mbwɔʼ, páʼ mɛ́ gɔ emāaʼ á mmók, ḿbiŋ ŋgɔ́ mé etsō mbɔŋ, pɛ efāʼ, ŋgʉ̄ɔ nnéŋ á ŋkiŋ meŋ.”»
Yɛɛ́so a á ega ndɔ̄kɔ ashuŋne lepúʼ ntswīi páʼ Lefɔ Ndém, é ziīŋ épúp
(Mlk 4.30-32; Lúk 13.18-19)
31Yɛɛ́so á zéŋ eshúŋ alāʼ, á amɔ̄ʼ ashuŋne lepúʼ, ńdé ŋ́gɛ: «Lefɔ Ndém é swhií mmɔʼ ntií lesa sésōk tsīi, mmɔʼ ŋiŋ a le pɛ́ mbhī á ŋkāʼ yí. 32Eziɛ́ ntií lesa sésōk mɛ́t, é pú ŋkʉɔ́k ntsyā nzwɛt etsō tsem, táʼ, é gɔ́ tɛ ntswhí, ḿbú esak ntɔ́k emɔ̄ʼ etsō lejhʉ̄ tsīi, é ŋkāʼ. Ḿbú ncʉ́ʼ á athʉ́, mbū é tó éwú, tɛ meséŋ é shʉʼɛ éwú mbáʼa meŋka mɔ́p. »
33Yɛɛ́so á zéŋ eshúŋ alāʼ, á amɔ̄ʼ ashuŋne lepúʼ, ńdé ŋ́gɛ: «Lefɔ Ndém é zeéŋ ŋgɔ́ páʼ levwi yīi, mmɔʼ menzwí, a le kʉɔ́ʼ afalíin memía ekāŋ tsɛ́ tɛ́t, ńnéŋ éwú ndɔk esɛ̄t, ńtshí, ńzwíʼte tɛ levwi á ghʉ, á kɔ́ʼ. »
Melaʼ akɔ̄ Yɛɛ́so a lɔkɔ meshuŋne lepúʼ tɛ́ eshúŋnɛ ɛ́?
(Mlk 4.33-34)
34Yɛɛ́so a le pú ndɔk ashuŋne lepúʼ, tɛ́ eshúŋ menu muɔ ntsem, á mbū alāʼ. A lɛɛ́ te nnéŋɛ té lɔk ashuŋne lepúʼ, éshúŋne á mbū pɔ́p ɔ́. 35Ŋ́ghʉ̄ épúp, tɛ́ á lɔk mbō páʼ ntswi‑ŋke Ndém a le lé ŋ́gɛ:
«Meŋ a shʉʼ eŋáʼa nchu gá, élɔk eshúŋ
meshuŋne lepúʼ.
Meŋ a shʉʼ esáʼ
eshúŋ ecū mīi,
Ndém a le lʉ̄ɔ tɛ efhó páʼ, a le nɔ̄ŋ ŋgɔŋ. »
Yɛɛ́so a á ega ŋkɛ́ʼtɛ ashuŋne lepúʼ ánɛ tepɔŋ mvēŋ
36Yɛɛ́so á ghʉ ntshī alāʼ néŋ, ŋgʉ̄ɔ mé mba, ŋgɔ́ á ŋgyā. Nnɔ yí é tshóte nnɛ̄t mé lezēŋ tsí, ńzɛ́tte á yí ŋ́gɛ: «Lɛ ŋkɛ́ʼte ashuŋne lepúʼ jɔ̄, ánɛ tepɔŋ mvēŋ á ŋkāʼ, éshúŋ á wék. » 37Á pwɛt á mbū pɔ́p ŋ́gɛ: «Ŋiŋ yīi a le phī nzwɛt etsō mbɔŋ, a á si ŋgɔ́ á Méŋ‑Ŋiŋnɔŋ. 38Ŋkāʼ é si ndɔk ŋgɔ́ ndo ŋgia. Nzwɛt etsō mbɔŋ é gɔ́ epuɔ pīi, pɔ́ é véŋ ŋ́gɛ, Ndém mé ecʉ́ʼɛ esáʼa á wɔ́p. Tepɔŋ mvēŋ é gɔ́ epuɔ pīi, Sɛ́ta a á si esáʼa á wɔ́p. 39Ŋgaŋ mbo yīi, a le phī á tepɔŋ mvēŋ, á gɔ́ á Sɛ́ta. Afʉʼ lefaʼ etsō á si ŋgɔ́ afʉʼ zīi, ŋgɔŋ e gɔ á mmiī. Wɔ faʼ‑etsō, é gɔ́ mecɔʼ Ndém. 40Ndeŋ ndeŋ páʼ mɛ́ tsɔ́ʼɔ á tepɔŋ mvēŋ mmāʼa á mmók lā, a láʼ ezéŋ egɔ́ ndeŋ ndeŋ épúp, á afʉʼ zīi, ŋgɔŋ e gɔ á mmiī. 41Méŋ‑Ŋiŋnɔŋ wuɔ, a a láʼ etó mecɔʼ pí, pɔ́ egʉɔ efhó á ntē lefɔ tsí, éfók epuɔ metsem pīi, pɔ́ ghʉɛ, emɔ̄ʼ epuɔ é faa nzhɛ. Éfók epuɔ pīi, pɔ́ fʉʼɛ mele menu. 42Éfók á wɔ́p épúp, ḿmāʼ á wɔ́p á ntē mía mía mmók, ájʉʼ zīi mɛ́ éwú, ńdaa mpfɛ́tɛ mesɔŋ. 43Epuɔ pīi, pɔ́ ghʉʉ̄ ajū mīi, Ndém a á si ŋkɔ̄ŋɔ, e eŋwāŋne páʼ lezēk nnu lā, á ntē lefɔ Mɔʼɔ́ wɔp Ndém. Ŋiŋ a wiɛ metuúŋ á lelɔk njúʼ ejʉʼ, á júʼ. »
Lefɔ Ndém é si ŋgɔ́ azō ntē nzwiŋ
44Yɛɛ́so á zéŋ ndé ŋ́gɛ: «Lefɔ Ndém é zeéŋ ŋgɔ́ páʼ, ajūɔ tee nzwiŋ zīi, mɛ́ le lʉ̄ɔ á ŋkāʼ, ŋiŋ á shʉʼ ŋkēm, ḿbɛ́ nzéŋ ńdʉ̄ɔ leswhī leswhī. Ŋgɔŋ é nɔŋ mbɔŋɔ́ á yí, á gʉɔ mbú eswīŋ ajūɔ tsem zīi, a wɛɛ̄, ńdɔk nzó ŋkāʼ mɛ́t. 45Lefɔ Ndém é zeéŋ eswhí mmɔʼ ŋgaŋ esaá yīi, a le nɔ̄ŋ efaʼa á mbɔŋ atók tshī, 46éfaʼ tɛ njʉ́ɔ azi á teē nzwiŋ, ŋ́gʉɔ eswīŋ ŋgɔŋ etsō tsem tsīi, a wɛɛ̄, ńdɔk eshʉ̄ʼ ńzó.
Yɛɛ́so a á ega ndʉ́ɛ́ ŋ́gɛ Lefɔ Ndém é si ŋgɔ́ páʼ lekhʉ lā
(Mlk 6.1-6; Lúk 4.16-24)
47«Lefɔ Ndém é zeéŋ ŋgɔ́ páʼ lekhʉ tsīi, mɛ́ maʼa á ntshi, ńdɔkɔ ŋgɔ̄ɔ á ntií ntiī mesōh lā. 48É gɔ́ tɛ ndó, mɛ́ shuŋ ŋgyá á ndo ŋgia, ńnáŋ á esī, ŋ́kyɛ́tte emi mbɔŋ, ńnéŋ á túŋ, ḿbiŋ ŋgwáʼ emi mɛ́ gɔ le pfɛ́t. 49A láʼ ezéŋ egɔ́ ndeŋ ndeŋ épúp, á afʉʼ zīi, ŋgɔŋ e mii. Mecɔʼ Ndém e láʼ eshʉʼe, éfhó á nnɔ epuɔ pīi, é ghʉʉ̄ ajū mīi, Ndém a á si ŋkɔ̄ŋɔ, éfak epuɔ tepɔŋ, 50émaʼ á wɔ́p á ntē mía mmók, ájʉʼ zīi mɛ́ é éwú, ńdaa mpfɛ́tɛ mesɔŋ. »
Ashuŋne Yɛɛ́so á wɛɛ̄ menu meswhī mbɔɔ mezwiŋ menu
51Yɛɛ́so á zɛ́tte nnɔ yí ŋ́gɛ: «Tɛ pɛ é júʼ menu ntsem muɔ mīi, meŋ á shúŋ la a?» Pɔ́ pwɛt ŋ́gɛ: «Ŋŋ. » 52Á lé á mbū pɔ́p ŋ́gɛ: «Á gɔ́ ŋké ŋgɔ́ épúp, pɛ ezhɛ́ á légɛ, ŋkɛʼte‑mbé Ndém tsem yīi, a á júʼ anu zīi, mɛ́ é shúŋ á yí, ánɛ Lefɔ Ndém ŋkúʼte, a á páʼ ŋgaŋ mba yīi, a á fhó á ntaŋ yí, éfók á tsitsi eswhī, ńzéŋ efók eyi nzwiŋ lā. »
Epuɔ Naázalɛt é ka Yɛɛ́so véŋ ɛ́
(Mlk 6.1-6; Lúk 4.16-30)
53Yɛɛ́so á mak á lelɔk meshuŋne lepúʼ eshúŋne, éfhó á ajʉʼ mɛ́t ŋgʉ̄ɔ. 54Ŋ́kó á alāʼ zīi a le tswhí éwú, ńzī á lezīʼne epuɔ anu Ndém, á ntē ŋgyā aswiŋte pɔ́p. Epuɔ pīi é ŋgɔ́ éwú, é júʼ ashuŋne zí, á pú ŋkʉ̄ʼne á wɔ́p tɛ́ʼ, pɔ́ lé ŋ́gɛ: «Awɔ́ a á páʼa, ŋ́gyáa á yí ejʉɔ ntií azhɛ̄‑anu ū? Ŋ́gyáa á yí mete, tɛ́ á lɔkɔ ŋghʉ̄ɛ meŋkʉʼne menu ū? 55Yí mé té méŋ ŋkwɛ‑methū ŋgyā kɛ? Mɛ́ wɔp mé té lɛ Malía á lɛ̄? Epɔ̄ memía pí mé té si ŋgɔ́ á Jáak mbɔɔ Yosɛ́p, ŋ́ghʉ̄ á Simɔŋ pɔ́ Zwíde lɛ̄? 56Epɔ̄ memía pí epi wɔnzwí metsem, é té zéŋ nnáŋte ega, á mbū pímpɛ ɛ́ lɛ̄? A lɔkɔ ejʉɔ ntií menu mɛ́t ntsem, ŋ́kɔ́ʼɔ egɔ́?» 57Ńdé épúp, pɔ́ té fɛ́ nnɛ̄t ŋgyá á mbū Yɛɛ́so ó. Yɛɛ́so á lé á mbū pɔ́p ŋ́gɛ: «Mɛ́ wuʼteē á ntswi‑ŋke Ndém ejʉʼ tsem, tɛ cʉ́ʼ á alāʼ pɔ́p. Mɛ́ wák á yí wáke á mba pɔ́p. » 58Á gɔ gɔɔ́, tɛ Yɛɛ́so a te tswhī ŋghʉ̄ meŋkʉʼne anu éwú ú, melaʼ mīi, pɔ́ ka fɛ́ nnɛ̄t ŋgyá á mbū yí í.
Currently Selected:
Matío 13: ybb
Tõsta esile
Share
Copy
Want to have your highlights saved across all your devices? Sign up or sign in
© CABTAL