Yohanes 8
8
1Apo Yesus botula' ko bukit Jaitun.
2Kosunsuknghobu'annyo, Sio botula' agi' ko tongahlamanan Rumah Allah. Boko urakng datakng ko Sio. Lalu, Yesus dudu' huatan mongajar sia'. 3Watu nantai, datakam boko guru agama Yahudi huatan boko pomimpitn agama Yahudi doi' kolompok Farisi. Sia' mombaba' siku' botina' inyo ditangkap obai io bomporajoan agatn lolaki bukai. 4Sia' mombaba' botina' nantai ko tongah-tongah urakng banya'. Kato sia' ko Yesus, “Guru, botina' ni'in totangkap bansah tongahan bomporajoan agatn lolaki inyo bukai lakinyo. 5Dalapm Hukupm Torat, Musa monyiuh ko kito obai boko botina' inyo bulah dosa nantai gola' ditikapm agatn batu sampai mati. Ubo apo pondapat Duatn mongona'i hal nantai?” 6(Sia' botakutn ubo nantai pakai' moncubo'i Sio oca' sia' ulih monyalahan Sio socaro hukupm.) Apo Yesus mombungku'an bukakng-tubuh Sio, lalu monulis agatn jari-Nyo di tanah.
7Apo sia' torus monyosahan oca' Sio monimbasi. Jadi, Sio bodiritn lalu bopandir, “Sopo ja' di antaro kaitn inyo kinyo kalo bodosa, urakng nanam inyo doholu monikapm botina' nian agatn batu.” 8Lalu, Sio mombungku'an bukakng-tubuh agi', lalu monulis di tanah.
9Lopas sia' mondinga' pomandiran Yesus nantai, sia' botula' doi' siatn nantai, siku'-monyiku', mula'i doi' inyo totuho. Ahirnyo, ija' Yesus agatn botina' nantai cam inyo tinggal di santai. 10Yesus bodiritn lalu bopandir ko botina' nantai, “Di mono sia' nantai? Kata'an conyiant ado siku' pan inyo mohukupm kolai ai?”
11Timbasnyo, “Conyiant mo, Habakng.”
Kato Yesus, “Aku pan co mohukupm kolai. Pulakng cam huatan mula'i ni'in jangan kolai bulah dosa agi'.”
Yesus samo sama'an torakng inyo moonji'i hidup
(8:12-20)
12Yesus bopandir agi' ko urakng banya'. Kato-Nyo, “Aku ninam torakng dunia. Sotiap urakng inyo tuyut Aku, io co paca'an bojalatn di kompotakan, apo io paca'an ado torakng pakai' kohidupannyo.”
13Ado boko pomimpitn agama Yahudi doi' kolompok Farisi inyo bopandir ko Sio, “Ongkah Duatn am inyo bosasi mongona'i diri Duatn siku'. Kosasian Duatn kinyo bondar.”
14Yesus monimbasi sia'. Kato-Nyo, “Biar pan Aku bosasi mongona'i diri-Ku sikuꞌ, kosasian-Ku totap bondar. Obai, Aku tohu doi' mono Aku datakng huatan ko mono Aku botula'. Apo kaitn co tohu doi' mono Aku datakng huatan ko mono Aku botula'. 15Kaitn mohakipi agatn caro duniawi. Apo Aku co mohakipi siku' urakng pan. 16Biar pan Aku mohakipi, koputusan-Ku nantai bondar. Obai, Aku co mohakipi sonsiku'an Ku. Allah Bopai inyo moutus-Ku ado bosamo-Ku. 17Di dalapm Hukupm Torat kaitn ado totulis ubo ni'in: Aman duo urakng bosasi hal inyo samo, jadi kosasian sia' nantai bondar. 18Ado duo sasi inyo bosasi mongona'i diri-Ku, ia'an Aku huatan Bopai inyo moutus Aku.”
19Jadi, sia' bopandir ko Sio, “Di mono kironyo Bopai Duatn?” Timbas Yesus, “Kaitn co mongonal Aku damo Bopai-Ku. Soandainyo, kaitn bobondar mongonal Aku, pasti kaitn mongonal Bopai-Ku jam.”
20Yesus momadahan somuo ni'in watu Io mongajar di tongahlamanan Rumah Allah dampikng tompat posombahan. Apo, conyiant ado siku' urakng pan inyo monangkap Sio obai watunyo bolupm datakng.
Yesus momandiran obai Sio boasal doi' sorugo
(8:21-30)
21Yesus bopandir agi' ko sia', “Aku paca'an botula'. Kaitn paca'an monggoyapi Aku, apo kaitn paca'an mati di dalapm dosa kaitn. Culih kaitn datakng ko tompat Aku botula' nantai.”
22Jadi, boko pomimpitn agama Yahudi bopandir, “Kata'an Sio honda' bunuh diri ai? Mungkitn nantai sobabnyo Sio bopandir, ‘Kaitn culih datakng ko tompat Aku botula' nantai.’ ”
23Yesus bopandir ko sia', “Kaitn boasal doi' babah, apo Aku boasal doi' pucu'. Kaitn doi' dunia ni'in. Aku bukatnnyo doi' dunia ni'in. 24Nantai sobabnyo Aku bopandir ko kaitn obai kaitn paca'an mati di dalapm boko dosa kaitn. Obai, aman kaitn co pocayo Aku ninam Sio Inyo Ado, jadi kaitn paca'an mati di dalapm dosa kaitn.”
25Kato sia' ko Sio, “Sopo sobondarnyo Duatn ni'in?”
Timbas Yesus, “Doi' mulonyo, Aku udah monjolasan ko kaitn mongona'i diri-Ku! 26Ija' ado banya' hal mongona'i kaitn inyo honda' Ku padahan huatan inyo honda' Ku hakipi. Apo, Aku ongkah monyampaian ko kaitn di dunia ni'in, boko hal inyo Ku dinga' doi' Sio inyo moutus Aku, Sio nianam inyo bondar.” 27(Sia' co mongoroti obai Sio bopandir ko sia' mongona'i Allah Bopai.)
28Jadi, Yesus bopandir, “Watu kaitn moninggian ‘Ana' Monsio’, kaitn paca'an tohu obai Aku nanam Sio Inyo Ado nantai. Kaitn paca'an tohu jam obai Aku co bulah la'apo doi' kohonda' diri-Ku siku'. Aku bayo mongatoan lapo inyo diajaran Bopai ko aku. 29Sio inyo moutus Aku ado bosamo-Ku. Sio co moninggalan Aku sonsiku'an, obai Aku hala molabuhan la'apo inyo monyonangan hati-Nyo.”
30Lopas jadi Yesus momandiran somuonyo nantai, banya' urakng pocayo ko Sio.
Yesus lobih pontikng doi' Abrahapm
(8:31-59)
Yesus mombebasan urakng doi' hukupan dosa
(8:31-38)
31Lalu, Yesus bopandir ko boko urakng Yahudi inyo udah pocayo ko Sio. Kato-Nyo, “Aman kaitn sotia monuruti ajaran-Ku, boroti kaitn bondar-bondar murid-Ku. 32Kaitn paca'an mongotohu'i kobondaran huatan kobondaran nianam paca'an mombulah kaitn monjadi merdeka.”
33Timbas sia', “Koi ni'in koturutan Abrahapm. Koi co kalo monjadi pacal sopo pan! Ubo apo Duatn ulih bopandir obai koi paca'an dibebasan?”
34Kato Yesus ko sia', “Pondinga'an bobondarcam pandir-Ku ni'in! Somuo urakng inyo bulah dosa, sia' samo agatn pacal dosa. 35Siku' urakng pacal bukainyo anggota koluarga inyo totap, apo siku' Bobia' ninam anggota koluarga somanah-manahnyo. 36Jadi, aman Ana' Allah, mombulah kaitn merdeka, jadi kaitn pan bondar-bondar merdeka. 37Memang, Aku tohu kaitn ni'inan koturutan Abrahapm. Apo, kaitn honda' mombunuh Aku obai kaitn co monorima' ajaran-Ku. 38Aku momadahan boko hal inyo Bopai-Ku tunju'an ko aku. Apo kaitn molabuhan boko hal inyo kaitn dinga' doi' bopai kaitn.”
Urakng inyo kinyo pocayo agatn Yesus, sobondarnyo jumpat Rajo Sitatn
(8:39-47)
39Kato sia' ko Sio, “Bopai koi ni'in Abrahapm!”
Kato Yesus ko sia', “Soandainyo kaitn bobondar ana' Abrahapm, pasti kaitn paca'an bulah koboi'an samo sama'an Abrahapm. 40Aku monyampaian kobondaran ko kaitn, ia'an kobondaran inyo Ku dinga' doi' Allah. Apo kaitn honda' mombunuh Aku. Abrahapm co kalo molabuhan sama'an nian! 41Jadi, kaitn kinyo bondar ana' Abrahapm, obai kaitn tuyut bopai inyo bukai.”
Timbas sia', “Koi bukainyo boko ana' kampakng. Siku' mo Bopai koi, ia'an Allah!”
42Kato Yesus ko sia', “Soandainyo Allah bondar Bopai kaitn, pasti kaitn paca'an mongasihi Aku. Obai, Aku datakng doi' Allah. Huatan, Aku datakng bukainyo kohonda'-Ku siku', apo kohonda' Sio inyo moutus Aku. 43Mapo kaitn co mongoroti pomandiran-Ku? Ninam sobabnyo: Obai kaitn co honda' mondinga' bobondar ajaran-Ku. 44Kaitn ninam boko poana'an Rajo Sitatn! Io nam bopai kaitn nan. Kaitn honda' monuruti kohonda' bopai kaitn nantai. Doi' mulonyo io nam pombunuh. Io co kalo ado hubukan agatn boko hal inyo bondar obai conyiant ado inyo bondar di dalapm dirinyo. Pas io bulah kotumbukan, nantai wajar, obai sipatnyo ongkah bulah kotumbukan nam. Sio nianam bopai boko tumbukan. 45Apo, Aku momandiran kobondaran ko kaitn. Obai nantai, kaitn co pocayo agatn pomandiran-Ku. 46Sopo di antaro kaitn inyo ulih mombutian obai Aku bulah dosa? Aman Aku mongatoan kobondaran, hibo kaitn co pocayo pomandiran-Ku? 47Urakng inyo boasal doi' Allah honda' mondinga' Pomandiran Allah. Apo kaitn bukainyo boasal doi' Allah, nianam sobabnyo kaitn co honda' mondinga'an pandir-Ku.”
Yesus udah adoam sobolupm Abrahapm
(8:48-59)
48Boko pomimpitn agama Yahudi monimbas Yesus, “Pasti bondaram, aman koi mongatoan obai Duatn ninam urakng Samaria huatannyo korasu'an sitatn!”
49Timbas Yesus, “Aku cuku korasu'an sitatn. Apo Aku mohormati Bopai-Ku huatan kaitn co mohormati Aku. 50Aku co bogoyap hormat pakai' diri-Ku. Apo ado Sobuti' inyo honda' oca' Aku dihormati. Sio nianam inyo mohakipi. 51Porotian boboi' cam inyo Ku pandiran ni'in: Somuo urakng inyo monuruti pomandiran-Ku, sia' co paca'an mati somanah-manahnyo.”
52Boko pomimpitn agama Yahudi nantai bopandir ko Yesus, “Watu ni'in koi tohu obai Duatn bondar-bondar korasu'an sitatn! Obai, Abrahapm udah mati, ubo nian jam boko nabi. Apo Duatn mongatoan: somuo urakng inyo monuruti pomandiran-Ku, sia' co paca'an mati somanah-manahnyo. 53Pasti Duatn co lobih pontikng doi' bopai koi Abrahapm inyo udah mati. Somuo nabi pan udah matiam! Sopo Duatn ni'in?!”
54Timbas Yesus, “Soandainyo Aku goyap hormat pakai' diri-Ku siku', jadi hormat nantai conyiant ado rotinyo. Inyo mohormati Ku nianam Bopai-Ku, ia'an Sio inyo kaitn sobut sobagai Allah kaitn nan. 55Padohal, kaitn co mongonal-Nyo. Apo Aku mongonal Sio. Soandainyo Aku bopandir: Aku co mongonal Sio, jadi nantai boroti Aku urakng tumbukan, samo sama'an kaitn! Apo, Aku mongonal Sio, huatan Aku monuruti pomandiran Sio. 56Bopai kaitn Abrahapm kotakng sonang obai io paca'an moniant ari kodatakan-Ku. Sio udah moniantnyo, lalu io sonang!”
57Boko pomimpitn agama Yahudi nantai bopandir ko Yesus, “Umur Kolai bolupm sampai lima' puluh tohutn. Mustahil Kolai udah moniant Abrahapm?”
58Kato Yesus ko sia', “Pondinga'an boboi'cam inyo Ku pandiran ni'in: Sobolupm Abrahapm dilahiran, Aku udah Adoam!” 59Pas sia' mondinga' Yesus bopandir bunyi nantai, sia' monguti' boko batu pakai' monikapm Sio sampai mati. Apo Yesus monggolinsi, lalu botula' moninggalan Rumah Allah.
Currently Selected:
Yohanes 8: TBDS
Tõsta esile
Share
Copy
Want to have your highlights saved across all your devices? Sign up or sign in