Yohanes 7
7
Pomandiran Yesus somanah ari rayo Pondu' Doutn
(7:1-52)
Yesus monula' watu boko somadikan-Nyo monyiuh oca' Sio monjadi tokonal
(7:1-9)
1Lopas jadi nantai, Yesus bojalatn mongoliliki doerah Galilea. Sio co honda' ko doerah Yudea obai boko pomimpitn agama Yahudi di santai honda' mombunuh Sio. 2Watu nantai, dampikam ari rayo urakng Yahudi, ia'an Ari Rayo Pondu' Doutn. 3Boko somadikan Yesus bopandir ko Sio, “Botula'cam doi' si'itan. Botula'cam ko Yudea oca' boko murid Duatn ulih moniant boko mujisat inyo Duatn labuhan. 4Aman urakng honda' monjadi tokonal, io kinyo moombakan lapo inyo dipulahnyo. Jadi, aman Duatn bulah mujisat, tunju'ancam diri Duatnko somuo urakng di dunia.” 5(Boko somadikan-Nyo bopandir ubo nantai obai sia' pan co pocayo ko Sio.)
6Kato Yesus ko sia', “Watu inyo Allah tontuan pakai' Aku bolupm datakng. Apo hala ado watu inyo pas pakai' kaitn. 7Boko urakng di dunia conyiant alasan pakai' bonci'an kaitn. Apo dunia bonci'an Aku obai Aku hala momadahannyo ko sia' obai porbuatannyo jahat. 8Kaitn ja'am botula' ko pogai nantai. Aku co botula' ko su'utan obai bolupm watu Ku.” 9Lopas jadi bopandir ubo nantai, Yesus totap diapm di Galilea.
Yesus botula' ko Yerusalem socaro diapm-diapm
(7:10-13)
10Apo, lopas jadi boko murid-Nyo botula' ko pogai nantai, lalu Sio hingkas jam, apo soi-botapu' oca' boko urakng co mongotohu'i nantai. 11Boko pomimpitn agama Yahudi boriso'i Sio di pogai nantai. Kato sia', “Di mono kiro Urakng nantai?” 12Boko urakng mula'i boko bongkucapan mongona'i Sio. Ado inyo bopandir, “Sio urakng boi' hati.” Apo inyo bukai bopandir, “Sio kinyo boi'! Sio monyosat'an boko urakng.” 13Apo, conyiant ado urakng inyo borani bopandir torakng-torakan mongona'i Sio obai sia' gola' agatn boko pomimpitn agama Yahudi.
Pomandiran Yesus bondar-bondar doi' Allah
(7:14-24)
14Watu tongahan poraya'an nantai, Yesus botula' mongajar di tongahlamanan Rumah Allah. 15Boko pomimpitn agama Yahudi hiratn bondar. Kato sia', “Ubo apo Urakng ni'in ulih tohu hala? Sio co jumpat sokolah husus Hukupm Torat.”
16Kato Yesus ko sia', “Ajaran-Ku co boasal doi' diri-Ku siku', apo doi' Allah inyo udah moutus Aku. 17Somuo urakng inyo honda' molabuhan kohonda' Allah, sia' paca'an tohu aman ajaran-Ku ni'in bondar-bondar doi' Allah, kata'an bayo doi' diri-Ku siku'. 18Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai. 19Musa udah moonju' ko kaitn Hukupm Torat. Apo conyiant sikuꞌ urakng pan di antaro kaitn inyo monaatinyo. Hibo kaitn honda' mombunuh Aku?”
20Urakng banya' nantai monimbas, “Duatn gogilo obai dirasu'i roh jahat! Conyiant ado urakng inyo honda' mombunuh Duatn!”
21Yesus monimbas sia', “Aku bayo molabuhan sobuti' porbuatan watu ari Sabat,#7:21: Yesus bomasud watu Sio di doerah Yudea nantai, Sio monyamani urakng watu Ari Sabat (Yohanes 5:1-18). Lopas nantai, boko pomimpitn agama Yahudi honda' mombunuh Sio. lalu somuo kaitn hiratn. 22Musa moonji'i kaitn poraturan oca' bosunant. (Sobondarnyo, poraturan nantai bukainyo doi' Musa apo doi' angki-bayatn kito sobolupm Musa.) Obai nantai, kaitn totap monyunant biar pan watunyo botopatan agatn ari Sabat. 23Aman kaitn totap monyunant watu Ari Sabat, kaitn molabuhan nantai oca' kaitn co molanggar poraturan Musa nantai. Jadi, soharusnyo kaitn jangan godi agatn Aku pas Aku monyamani bukakng-tubuh siku' urakng watu Ari Sabat! 24Jangan mohakipi monurut inyo kotiat'an, apo monurut inyo bondar.”
Urakng gangga'-gua'an aman Yesus nam Rajo Inyo Dijanjian Allah
(7:25-36)
25Lopas jadi nantai, boboropo urakng Yerusalem bopandir, “Pasti urakng ninam urakng inyo honda' dibunuh pomimpitn kito pan? 26Apo, porotian bo! Sio bopandir di pohadapan urakng banya' kotakan bebas. Sia' co mongatoan lapo pan molawatn Sio. Mungkitn bai sia' udah tohu obai Sio nam Kristus, Rajo Inyo Dijanjian Allah? 27Apo watu Kristus datakng, co nyiant ado siku' urakng pan inyo paca'an tohu doi' mono asal-Nyo. Apo somuo kito tohu doi' mono asal Urakng ni'in.”
28Jadi, watu Yesus mongajar di tongahlamanan Rumah Allah, Sio bopandir agatn saro borakng, “Kaitn konal Aku huatan doi' mono asal-Ku! Apo Aku datakng kinyo kohonda'-Ku siku'. Aku diutus Sio inyo bondar. Kaitn co tohuan Sio. 29Apo Aku konal agatn Sio obai Aku datakng doi' Sio. Sionam inyo moutus Aku.” 30Obai nantai, sia' bousaha monangkap Yesus, apo conyiant ado siku' urakng pan inyo ulih moncama'-Nyo, obai watunyo nantai bolupm datakng.
31Apo, di antaro urakng banya' nantai ado banya' jam inyo pocayo ko Yesus. Kato sia', “Aman Kristus datakng nononyo, apo ulih bai Io bulah mujisat lobih doi' Urakng ni'in?”
32Boboropo pomimpitn agama Yahudi doi' kolompok Farisi mondinga' urakng banya' nantai bongkucapan mongona'i Yesus. Jadi, sia' bosamo-samo agatn boko imam kopala' monyiuh boboropo ponjago Rumah Allah oca' botula' monangkap Yesus. 33Jadi, Yesus bopandir ko urakng banya', “Ija' sobontar cam Aku bosamo agatn kaitn. Lopas jadi nantai, Aku paca'an bobali' ko Sio inyo moutus Aku. 34Kaitn paca'an monggoyapi Aku, apo kaitn co paca'an botomu agatn Aku. Obai, kaitn culih datakng ko tompat Aku nononyo.”
35Obai nantai, boko pomimpitn agama Yahudi bopandir ko siku'-monyiku', “Sio ni'in honda' botula' ko mono jadi kito culih monomuan Sio? Kata'an Sio honda' botula' ko boko urakng Yahudi inyo diapm di porantauan kironyo, di antaro urakng Yunani, lalu mongajar urakng Yunani? 36La'apo masud Sio bopandir, Kaitn paca'an monggoyapi Aku, apo kaitn co paca'an botomu agatn Aku. Kaitn culih datakng ko tompat Aku nononyo?”
Yesus samo agatn ara'i inyo moonji'i kohidupan
(7:37-44)
37Ari toahir doi' pogai Pondu' Doutn nantai udah datakng watunyoam. Nantai ari inyo kotakan pontikng doi' pogai nantai. Di tongahlamanan Rumah Allah, Yesus bodiritn lalu bopandir borakng, “Sopo aja' inyo korahakan, datakng ko Aku pakai' minum! 38Sopo aja' inyo pocayo ko Aku, io samo sama'an pomandiran ni'in inyo totulis di Buku Suci: ‘Boko aliran ara'i inyo moonji'i hidup paca'an mongalir doi' dalapm hatinyo.’ ”#7:38: Ayat doi' Buku Suci inyo dimasud Yesus ado banya' komungkitan: Yesaya 44:3; 55:1; 58:11; Yehezkiel 47:1-12; Yoel 3:18; Zakharia 13:1; 14:8; Koluaran 17:6; Bilangan 20:11. 39(Agatn pomandiran nantai, Yesus bomasud Roh Allah. Somuo urakng inyo pocayo ko Yesus paca'an monorima' Roh Allah. Apo watu nantai, Roh Allah bolupm ditorima' sia' obai Yesus bolupm dimuliaan.)#7:39: Masudnyo di ayat ni'in, Yesus bolupm dimuliaan di kayu salib DAMO Yesus bolupm dimuliaan ko tompat inyo bokuaso di sorugo.
40Boko urakng mondinga' pomandiran Yesus nantai. Ado boboropo inyo bopandir, “Pasti Sio ninam Nabi inyo koi tantian!” 41Inyo bukai bopandir, “Pasti Sio ni'inan Kristus, Rajo Inyo Dijanjian Allah!” Apo inyo bukai agi' bopandir, “Bukai! Kristus nantai kinyo datakng doi' Galilea. 42Buku Suci mongatoan obai Kristus nantai koturutan Rajo Daud. Buku Suci pan mongatoan obai Kristus boasal doi' laman Betlehem, kampukng laman Daud.” 43Jadi, urakng banya' botikakng agatn siku'-monyiku' mongona'i Sio. 44Boboropo urakng honda' monangkap Sio, apo conyiant siku' urakng pan inyo ulih moncama'-Nyo.
Boko pomimpitn urakng Yahudi kinyo pocayo obai Yesus nam doi' Allah
(7:45-52)
45Timpu boko ponjago Rumah Allah nantai datakng agi', imam kopala' huatan kolompok urakng Farisi nantai bopandir ko sia', “Mapo kaitn co mombaba' Io kosi'itan?”
46Timbas boko ponjago nantai, “Bolupm kalo ado urakng inyo mongajar momadahan boko hal ubo Sio nantai!”
47Boko urakng Farisi bopandir ko sia', “Kata'an kaitn pan disosatan Io jam ai? 48Conyiant ado siku' urakng pan di antaro boko pomimpitn damo urakng Farisi inyo pocayo ko Sio. 49Apo urakng banya' ni'in inyo co mongonal Hukupm Torat, Allah paca'an mohukupm sia'!”
50Lalu, ado di antaro sia', Nikodemus, salah siku' urakng Farisi inyo kalo datakng ko Yesus.#7:50: Tiat Yohanes 3:1-21. Kato Nikodemus ko kolompok pomimpitn nantai, 51“Monurut Hukupm Torat, kito culih mohukupm siku' urakng pan sobolupm kito mondinga' huatan mongotohu'i la'apo porbuatan-Nyo.”
52Timbas sia', “Kata'an kolai ni'in doi' Galilea jam? Poriso'icam Buku Suci. Kolai paca'an tohu obai conyiant nabi inyo datakng doi' doerah Galilea!”
Botina' inyo bomporajoan
(7:53–8:11)
53Lopas jadi nantai, sia' pulakng ko rumahnyo masikng-masikng.
Currently Selected:
Yohanes 7: TBDS
Tõsta esile
Share
Copy
Want to have your highlights saved across all your devices? Sign up or sign in