युहन्ना 5
5
वाताम्खादा येसुआ कातुक अ़नुसाओ
1खोन्किना यहुदिचिओ अ़चुचानुचाओ निम्पाङ येसु यरुसलेम म़खारा। 2यरुसलेम सहरादा भेरा लाप्तिखोप्निओ वाङ्खा अ़च़क्दा वाताम्खा याक्याङ, मो हिब्रु य़ङ्दा बेथस्दानि लो। मोदा पाच्कातात सिकुवाचि म़याक्याङ। 3मो सिकुवादा दोप्म़क, पेसोला माङ्लो लाङ्छुक ख़न्माखात्मा सारिमाआ लाउओ ब़द्धे कातुक म़नाचि म़धुवाङा। [मोचिआ चाक्वा खाउग़रि लोङ निकिना अ़हुङाङा। 4देकिनालो निनाम्हाङ पापाओ अ़क्छा अ़चुकाफाआ अ़दु-अ़दु वाताम्खादा धाकि चाक्वा लोङ्सुप़ङुचि। लोङ्साङाओ ग़रि झारादाङ्का बुया वाताम्खादा कावाङ, दियाको सारिमाआ लाउओ नुछाङ मो नुवालावाङा।]
5मोदा अथतिस्कादोङ बुयादाङ्का रोआङाओ अ़क्छा म़ना युङाङा। 6येसुआ मो मोदा धुवाङाओ अ़खा, खोन्कि बुयादाङ्का मो रोआङाओ अ़सिन्ताकि येसुआ मो अ़सेना, “दि खाना नुमा त़स़याङ?”
7कारोक्आ खोक्को लासुलो, “हाङ्पो, खाउग़रि चाक्वा लोङ, अ़ङ्का वाताम्खादा कापाक साङ्छाङ मात्द़ङ। अ़ङ्का खात्ङाङाहिदा अ़ङ्कादाङ्का बुया नि म़ना चाक्वादा वाङ्लाप।”
8येसुआ मो अ़लोवा, “पुवालोन्ता, आम्थ़ङ्खा ओक्तुकि कोला!” 9मोन्ग़रिङा मो म़ना नुवालावा, खोन्कि मोसाआ अ़थ़ङ्खा ओक्तुकि खारालावा।
मो काचि लिसाओ लेन सावातोम्खा-लेन ओ। 10खोन्ओसा नुसाओ मो म़ना यहुदि बुसुवाचिआ अ़लोवा, “आय़ सावातोम्खा-लेन ओ, खाना आम्इम्खा खुन्मा य़ङ्हुप्आ त़प़नान।”
11मेन खोसाआ खोचि लासुलोचि, “साङ्आ अ़ङ्का अ़नुसाङ, खोक्कोसाआङा ऩलोवाङ, ‘आम्इम्खा खुयुकि कोला’।”
12मोचिआ खो अ़सेना, “खाना ‘आम्इम्खा खुयुकि कोला’नि कालो म़ना साङ ओ?”
13मेन नुवाओ मो म़नाआ खोक्को साङ्ओ निकिना मान्सिन्युक्तु। देकिनालो मोदा म़ना मुक्लाचि म़युङाङाओसा येसु मोदाङ्का म़खारालोन्ताचिआयुङ्सा।
14खोन्किना येसुआ निनाम्हाङ ब़क्खाखिम्दा मो अ़धिराकि अ़लोवा, “खाखो, खाना त़नुवायुङ्सा। हान्दाङ्का हेवा मान्मुदा, खोन्कि खानाएदा च़लोक अ़अ़त्पा अ़तानिन्ने।”
निनाम्हाङ्ओ अ़चुछालाम्पा ह़ङ्म़ङ
15खो कानु ना येसुओ निकिना मो म़ना खाराकि यहुदि बुसुवाचि खाएत्तुचि। 16खोन्ओसा यहुदिचिआ येसु ल़क्मा अ़पुक्ता, देकिनालो खोक्कोसाआ ओ काचि सावातोम्खा-लेन्दा अ़मुवायुङ्सा। 17खोन्कि येसुआ मोचि म़लासुलोचि, “अ़ङ्पापा ओन्ग़रितारि काचि म़मुयाङ, खोन्कि अ़ङ्काछाङ काचि मुङाङा।” 18खोन्ओसा यहुदि बुसुवाचिआ येसु च़लोक सेत्मा अ़लाप्ता, देकिनालो खोक्कोसाआ सावातोम्खा-लेन काक्मा काचि ओन्ङा माआङ, मेन आप्पि निनाम्हाङ्एनान अ़क्निओ मुवान्चिन्कि खोक्कोसाआ निनाम्हाङ अ़ङ्पापानि म़य़ङा।
19येसुआ मोचि म़लोचि, “अ़नुछ्याङा अ़ङ्का खानानिन लोनानिन। अ़चुछाआ आप्पि दित्छाङ मुमा अ़ऱन, मेन अ़चुपाआ दि अ़मुओ खोसाआ खा, अ़चुछाछाङ मोवात्निङा च़। 20देकिनालो अ़चुपाआ अ़चुछा सोमाअ़तुक, खोन्कि खोक्कोसाआ आप्पि अ़मुओ झारा अ़चुकाचि अ़चुछा खाङ्अ़मेत। ओदाङ्का तोक्पो काचिचि खोक्कोसाआ अ़चुछा खाङ्अ़मेत, खोन्किना खानानिन त़दोम्तिन्दान। 21देकिनालो पापाआ म़सुवादाओचि देत्नि म़खोन्तुलोइसुचिकि मोचि ह़ङ्म़ङ म़प़चि, मोवात्निङा अ़चुछाआछाङ साङ प़मा स़, खो अ़लुक्निन्ओ ह़ङ्म़ङ प़। 22मोन्ओन्ङा माआङ पापाआ साङ्छाङ छ़ङ ऩछेन्तुन, मेन झारा छ़ङ्छेन्मा पाङ अ़चुछा अ़पुवायुङ्सा। 23खोन्कि देत्नि मोचिआ पापा साया अ़मेत, मोवात्निङा झारासाआ अ़चुछा साया अ़मेत्ने। साङ्आ अ़चुछा साया अ़मेत्तुन, खो काछुत पापाछाङ साया अ़मेत्तुन।
24 अ़नुछ्याङा अ़ङ्का खानानिन लोनानिन, साङ्आ अ़ङ्य़ङ एनु खोन्कि अ़ङ्का काछुत साकोङ्छ़ङ मु, मोएदा अ़लुक्निन्ओ ह़ङ्म़ङ याक्याङ। मो लाहि अ़पाक्निन, मेन मो स़मादामादाङ्का ह़ङ्म़ङ्दा वाङायुङ्सा। 25अ़नुछ्याङा, अ़ङ्का खानानिन लोनानिन, ओवाको ग़रि तायाङ, मोन्ग़रि म़सुवादाओचिआ निनाम्हाङ्ओ अ़चुछाओ अ़य़ङ अ़एन, खोन्कि काएन्चि म़ह़ङ। मो ग़रि ओन्ग़रिङा ओ। 26देत्नि पापा आप्पिएदा ह़ङ्म़ङ प़मा सावा याक्याङ, मोवात्निङा खोक्कोसाआ अ़चुछाछाङ अ़धुन्ओ ह़ङ्म़ङ प़माओ सावा अ़पुवायुङ्सा। 27खोन्कि खोक्को छ़ङ्छेन्मा पाङ अ़पुवायुङ्सा, देकिनालो खोक्को म़नाओ अ़छा ओ।
28 ओ य़ङ्दा मान्दोम्दादानिन्चिन, देकिनालो ग़रि तायाङ, मोन्ग़रि एप्मादाओचि झारासाआ खोक्कोसोओ अ़चुय़ङ अ़एन, 29खोन्कि बुङ्खाया म़लोन, साङ्चि अ़नुवाक काचि म़मुवायुङ्सा मोचि ह़ङ्म़ङ्ओ निम्पाङ म़लाखोन्लोन, खोन्कि साङ्चि अ़त्लो काचि म़मुवायुङ्सा मोचि छ़ङ्छेन्माओ निम्पाङ म़लाखोन्लोन।
30 अ़ङ्का आप्पि दित्छाङ मुमा अ़ऱऩङ। देत्नि अ़ङ्का एनुङ, मोवात्निङा अ़ङ्का छ़ङ्छेन्ङा। खोन्कि अ़ङ्छ़ङ्छेन्मा नुलोक कान, देकिनालो अ़ङ्का अ़ङ्मिन्मावा च़मा अ़लाम्ऩङ, मेन अ़ङ्का काछुत्ओ अ़चुमिन्मावा च़ङा।
31 अ़ङ्का आप्पि अ़ङ्तुक्वादा सालुम्स़ङ प़ङ्नालो अ़ङ्सालुम्स़ङ्ओ अ़लुङ अ़मेत्तुन। 32मेन अ़ङ्तुक्वादा सालुम्स़ङ काप़ निङा म़युङ्याङ। खोन्कि अ़ङ्का सिन्तुङ्योङ, अ़ङ्तुक्वादा खोक्कोसाआ दियाको सालुम्स़ङ अ़प़, मो सालुम्स़ङ्ओ अ़लुङ मेत्तु।
33 खानानिन्आ म़नाचि युहन्नाएदा सेइसि त़छुत्तुम्च़म, खोन्किना खोसाआ अ़छ़ङ सालुम्स़ङ प़युङ्सु। 34-35युहन्ना लेराङाओ खोन्कि छेङ्छेङ्छेङ्वाओ कुपिवाको मुवाङा, खोन्कि खानानिन खोसोओ अ़साम्दा थुत्मेत्लो ऩङानुमा त़छेन्तुम। खानानिन त़लेरिन्ने निम्पाङ अ़ङ्का ओ य़ङ खाएत्नाङ्नानिन। मेन अ़ङ्का खानानिन त़तुप्तुम्नेनि मिन्ङाङाओ सालुम्स़ङ म़नाओ माआङ। 36देकिनालो अ़ङ्काएदा खाक्को सालुम्स़ङ युङ्याङ, मो युहन्नाओदाङ्का तोक्पो मुयाङ। खाक्को काचिचि तालासि अ़ङ्पापाआ अ़ङ्का ऩपुवाङ्युङ्साङ, मो काचि अ़ङ्का मुङ्योङ, खोन्कि अ़ङ्पापाआ अ़ङ्का ऩछुत्ताङ्ओ निकिना मोचिआङा अ़ङ्तुक्वादा सालुम्स़ङ अ़प़याङ। 37अ़ङ्का काछुत अ़ङ्पापाआङा अ़ङ्तुक्वादा आप्पि सालुम्स़ङ अ़पुवायुङ्सा। मेन खोक्कोसोओ अ़चुय़ङ खानानिन्आ देम्खाछाङ मान्एन्त़युक्तुम, खोन्किना खोक्कोसोओ अ़चुङाइवा देम्खाछाङ मान्खाङ्त़युक्तुम। 38खोक्कोसोओ अ़चुय़ङ खानानिन्एदा अ़युङ्निन, देकिनालो साङ खोक्कोसाआ अ़छुत्ता, खानानिन खोक्कोएदा साकोङ्छ़ङ त़मुन्मिन। 39खानानिन साम्कालिन्दा त़लामुम्योम, देकिनालो मोदा अ़लुक्निन्ओ ह़ङ्म़ङ तोक्तुम्नि खानानिन त़मिनिन। अ़ङ्तुक्वादा सालुम्स़ङ काप़ मो साम्कालिन्ङा ओ! 40खोन्नुछाङ ह़ङ्म़ङ तोक्सि अ़ङ्काएदा तामा आम्नुओ ऩङाछित।
41 अ़ङ्का म़नाचिएदाङ्का साऩङ्वा अ़लाम्ऩङ। 42मेन निनाम्हाङ्ओ अ़चुसोम्तुक्मा खानानिन्एदा मात्द़ङ्नि अ़ङ्का सिन्तुङ्योङ। 43अ़ङ्का अ़ङ्पापाओ अ़चुऩङ्दा ताङ्युङ्साङ, मेन खानानिन्आ अ़ङ्का मान्लोक्त़दाङ्ऩङ। नि साङ आप्पिओ अ़ऩङ्दा तानालो मो त़लोउम। 44खानानिन अ़क्छा निएदाङ्का साऩङ्वा तोक्मा त़लामिन, मेन अ़क्छा ओन्ङा निनाम्हाङ्एदाङ्काओ साऩङ्वा तोक्मा त़लामिमिन्नालो देत्नि अ़ङ्का साकोङ्छ़ङ मुमा त़ऱनि?
45 ओ मान्मित्दानुम, अ़ङ्का पापा निनाम्हाङ्ओ अ़चुबुदा खानानिन लाहि पाक्नानिन। खानानिन लाहि कापाक ना निनाम्हाङ्य़ङ खाकालु मोसा ओ, खोएदा खानानिन सोम्कुवा त़मुन। 46खानानिन्आ निनाम्हाङ्य़ङ खाकालु मोसा साकोङ्छ़ङ त़मुम्ओदे अ़ङ्काछाङ साकोङ्छ़ङ त़मुवाङ्ऩङ्ओ। देकिनालो खोसाआ अ़ङ्तुक्वादा छाप्तुयुङ्सु। 47मेन खानानिन खोसाआ छाप्तुओदा साकोङ्छ़ङ त़मुन्मिन्नालो अ़ङ्य़ङ्चिदा देत्नि साकोङ्छ़ङ त़मुन?”
Currently Selected:
युहन्ना 5: bap
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.