युहन्ना 4
4
सामरि मेत्छामाएनान येसु म़चेवाओ
1युहन्नादाङ्का येसुआ ब़द्धे काखेङ्चि म़मुङुचि खोन्कि बप्तिस्मा म़प़ङुचिनि फरिसिचिआ अ़एना। 2(अ़नुछ्या येसुआ ना माआङ मेन खोक्कोसोओ अ़चुकाखेङ्पाचिआ बप्तिस्मा म़प़ङुचि।) 3खोन्कि येसुआ ओ अ़सिन्ताकि खोक्को यहुदिया अ़छिरादाकि गालिल्दा म़लासाखारा।
4मेन खोक्को सामरिया लियाङ्सा खात्मादोराङा। 5खोन्कि खोक्को सामरियाओ सुखारनि लोवाङाओ सहरादा म़तादिसा। मो सहरा याकुब्आ अ़छा योसेफ प़ओ व़क्ओ अ़च़क्दा छुक्ताङा। 6मोदा याकुब्ओ अ़कुपारि याआङा। येसु कोन्माआ होत्तुकि मो कुपारिओ अ़च़क्दा म़युङा। आप्फात अ़दाक्वालेन लिसायुङ्सा।
7अ़क्छा सामरि मेत्छामा चाक्वा भात्सि मोदा ता। येसुआ मो मेत्छामा अ़लोवा, “अ़ङ्का चाक्वा दुङ्मा पुवाङ।” 8मोन्ग़रि खोक्कोसोओ अ़चुकाखेङ्पाचि सहरादा चामायु खित्सि म़खारायुङ्सा।
9खोन्कि सामरि मेत्छामाआ खोक्को लो, “खानानिन अ़क्छा यहुदि खोन्कि अ़ङ्का सामरि मेत्छामा ओ। देत्नि सामरि मेत्छामाएदा चाक्वा दुङ्मा त़दोत्निङ्नि?” (मोसाआ खोक्को ओवात्नि लो देकिनालो यहुदिचिआ सामरिचिएनान देत्छाङ मान्च़याङ्चि।)
10येसुआ मो लासुलो, “खाना निनाम्हाङ्ओ अ़चुआसिखा खोन्कि खानाएदा चाक्वा कादोत म़ना साङ्ओ निकिना त़सिन्तुओदे खाना खोक्को त़दोत्तुओ खोन्कि खोक्कोसाआ खाना ह़ङ्म़ङ्ओ चाक्वा त़पुवाओ।”
11मो मेत्छामाआ खोक्को लो, “हाङ्पो खानानिन्एदा अ़अ़क्खा मात्द़ङ, खोन्कि कुपारिछाङ ग़ङ्याङ। खोन्कि खानानिन्आ खादाङ्का मो ह़ङ्म़ङ्ओ चाक्वा त़तारुम? 12दि खानानिन आन्सुन्तुम याकुब्दाङ्काछाङ तोक्पो त़मुन्येन? खोसाआ आन्कान्का ओ कुपारि ऩमेत्तिन्प़न्काकिना खो आप्पि, खोन्कि खोसोओ अ़छाचि खोन्कि खोसोओ अ़सायाम्पोक्चिआ ओ कुपारिदाओ चाक्वा अ़दुङा।”
13येसुआ मो अ़लासालोवा, “ओ चाक्वा कादुङ झारा वामित्मा म़लास़। 14मेन साङ्आ अ़ङ्का प़ङ्ओ चाक्वा दुङु, मो देम्खाछाङ वामित्मा अ़स़निन। खाक्को चाक्वा अ़ङ्का मो प़ङ, मो मोएदा अ़लुक्निन्ओ ह़ङ्म़ङ्ओ निम्पाङ लोन्याङ्ओ बोन्वा लि!”
15मो मेत्छामाआ खोक्को लो, “हाङ्पो अ़ङ्का मो चाक्वा प़नि खोन्कि अ़ङ्का वामित्मा अ़स़ऩङ, खोन्कि ओदा चाक्वा भात्सि बान्मायुङ्मा अ़दोत्निन्ने।”
16येसुआ मो अ़लोवा, “खाराकि आम्खिम्हाङ्पा बुत्तुबात्तु।”
17मो मेत्छामाआ लासुलो, “अ़ङ्खिम्हाङ्पा मात्द़ङ।” येसुआ मो अ़लोवा, “आम्खिम्हाङ्पा मात्द़ङ निकिना खाना त़य़ङाओ अ़नुछ्याङा ओ। 18देकिनालो आम्को पाच्कापाङ आम्खिम्हाङ्पाचि म़लिसाचिआयुङ्सा, खोन्कि आइमित मो खानाएनान युङ्याङ्ओछाङ आम्खिम्हाङ्पा माआङ। खाना अ़नुछ्या त़य़ङाओ।”
19मो मेत्छामाआ खोक्को अ़लोवा, “हाङ्पो खानानिन निनाम्हाङ्य़ङ खाकालुओवा अ़ङ्का लुङाङा। 20आन्काओ सुन्तुम्चिआ ओ भ़ऱदु निनाम्हाङ अ़ब़क्ता, मेन खानानिन यहुदिचि त़य़ङिन, निनाम्हाङ ब़क्खा यरुसलेम्ङा ओ।”
21येसुआ मो अ़लोवा, “मेत्छामा, अ़ङ्का साकोङ्छ़ङ मुवाङ, ग़रि तायाङ, मोन्ग़रि खानानिन ना ओ भ़ऱदु, ना यरुसलेम्दा पापा निनाम्हाङ त़ब़क्तुम। 22खानानिन सामरिचि दि त़ब़क्तुम्योम मो त़सिन्तिमिन। आन्कान्का दि ब़क्तुम्का मो आन्कान्का सिन्तुम्का, देकिनालो कालेन यहुदिचिदाङ्का ता। 23मेन ग़रि तायाङ, खोन्कि मो ग़रि ओन्ग़रिङा ओ, खोन्कि अ़छ़ङ काब़क्चिआ लावादा खोन्कि अ़छ़ङ्दा पापा निनाम्हाङ अ़ब़क। देकिनालो ओवाको काब़क्चिङा पापा निनाम्हाङ्आ म़लामुचि। 24निनाम्हाङ लावा म़मुयाङ, खोन्कि खोक्कोसोओ अ़चुकाब़क्चिआ लावादा खोन्कि अ़छ़ङ्दा खोक्को ब़क्मादोत।”
25मो मेत्छामाआ खोक्को लो, “अ़ङ्का सिन्तुङ्योङ, खाउग़रि मसिह म़तायाङ, मोन्ग़रि खोक्कोसाआङा आन्कान्का झारा य़ङ खाऩएत्तिन्का।” मसिह ख्रिस्तनि अ़लो।
26खोन्किना येसुआ मो अ़लोवा, “खानाएनान काचेप, अ़ङ्का खोक्कोङा ओ।”
27मोन्ग़रि येसुओ अ़चुकाखेङ्पाचि म़ता, खोन्कि खोक्को अ़क्छा मेत्छामाएनान म़हान्ताङाओ अ़खाकिना दोम्तुदोचि। मेन “खानानिन मोएदा दि त़लामुम्योम?” माङ्लो “खानानिन मो मेत्छामाएनान देकि त़चेविन्येन?”निकिना साङ्आछाङ मान्सेन्अ़दा।
28खोन्कि मो मेत्छामाआ अ़चाक्वा दावा छिरुदोकि सहरादा लासाखारा खोन्कि म़नाचि लोचि, 29“बानानिन्कि अ़क्छा म़ना खानुम, खोक्कोसाआ अ़ङ्का मुङ्च़ङ्ओ झारा काचिचि खाऩएत्ताङ। मात्दे, खोक्को ख्रिस्त ना माआङ?” 30खोन्कि मोचि सहरादाङ्का म़लोन्ताकि खोक्कोएदा म़खारा।
31मोवात्नि लिसाङाओ ग़रि अ़चुकाखेङ्पाचिआ खोक्को अ़लोवा, “रब्बि, दि-दि चानिन।”
32मेन खोक्कोसाआ मोचि म़लोचि, “अ़ङ्काएदा चामायु चा युङ्याङ, मोसोओ अ़तुक्वादा खानानिन्आ त़सिन्तिमिन्येन।”
33खोन्ओसा अ़चुकाखेङ्पाचि अ़क्छा निएदा म़य़ङा, “साङ-साङ्आ खोक्को चामायु अ़खुत्ता हे?”
34येसुआ मोचि म़लोचि, “अ़ङ्का काछुत्ओ अ़चुमिन्मावा च़मा खोन्कि खोक्कोसोओ अ़चुकाचि तामालामाङा अ़ङ्चामायु ओ। 35दि खानानिन, ‘हान्छाङ चारकादोङ्वात युङ्याङ, खोन्कि चा हेक्मा ग़रि लिनि त़य़ङिमिन?’ मेन अ़ङ्का खानानिन लोनानिन आम्नुओ म़क होआनुम्कि व़क्चि चोआनुम्च़म, चा हेक्मा ग़रि लिसायुङ्सा। 36साङ्आ चा कोउ मोसाआ अ़लुङ तोक्तुयुङ्सु, खोन्कि अ़लुक्निन्ओ ह़ङ्म़ङ्ओ निम्पाङ अ़सिवा कोउयुङ्सु, खोन्ओसा कावेत खोन्कि काकोप अ़क्नि अ़चुऩङानु। 37ओवात्नि ‘अ़क्छाआ वेत्तु, खोन्कि नितात्आ हेक्तु,’ निओ य़ङ ओदा अ़छ़ङ लि। 38अ़ङ्का खानानिन मोदा हेक्सि छुत्नानिन, खादा खानानिन्आ काचि मान्मुत़युक्तुम। निचिआ काचि अ़मुवायुङ्सा, खोन्कि मोचिओ अ़चुकाचिओ अ़सिवा खानानिन्आ त़कोउम्युङ्सुम।”
39“अ़ङ्का दे चुवाङ्ओ झारा काचिचि खोक्कोसाआ अ़ङ्का खाऩएत्ताङ” निओ मो मेत्छामाओ अ़सालुम्स़ङ्आ मो सहरादा सामरिचिएदाओ ब़द्धेसाआ खोक्को साकोङ्छ़ङ अ़मुवा। 40खोन्ओसा मोन्ग़रि सामरिचि खोक्कोएदा म़ता, खोन्कि मोचिआ खोक्को मोचिएनान “युङिन्ने”नि अ़लोवा, खोन्कि खोक्को ह्वा लेन मोदा म़युङा। 41खोन्किना खोक्कोसोओ अ़चुय़ङ्आ नि ब़द्धेसाआ खोक्को साकोङ्छ़ङ अ़मुवा। 42मोचिआ मो मेत्छामा अ़लोवा, “ओन्ग़रि खाना त़य़ङाओ य़ङ्आ ओन्ङा आन्कान्का साकोङ्छ़ङ मुन्काओ माआङ, मेन आन्कान्का आप्पि एनुम्काओसाआ अ़नुछ्या खोक्को हेन्खामादाओ कालेन्पा ओ निकिना आन्कान्काआ सिन्तुम्का।”
तोक्पो छान्हाङ्पाओ अ़छा नुमाय़ङ
43ह्वा लेन्किना मोदाङ्का खोक्को गालिल म़खारा। 44(येसु म़य़ङा, “आप्पिओ अ़तेन्दा निनाम्हाङ्य़ङ खाकालु साया ऩमेत्तुन।”) 45खोन्नुछाङ खोक्को गालिल्दा म़ता, खोन्कि खोक्कोसाआ यरुसलेम्दा चानुचाओ ग़रिदा दे अ़मुवाओ मो झारा काचि अ़खाओसा गालिलिचिआ खोक्को साऩङ्वा अ़मेत्ता, देकिनालो मोचिछाङ चानुचादा म़खारायुङ्साओ।
46खोन्किना खोक्को गालिल्ओ काना सहरादा म़लासाता। मोदा खोक्कोसाआ चाक्वा अङ्गुरा माङ्वा अ़मुवाओ। गालिल्ओ कफर्नहुम्दा अ़क्छा हाङ काचि काफा युङाङा, खोसोओ अ़दुवाछा-छा तुआङा। 47येसु यहुदियादाङ्का गालिल्दा म़बानायुङ्सानि एनुकि मो खोक्कोएदा खारा, खोन्कि “अ़ङ्छाएदा बानानिन खोन्कि नुनिप़नि”नि बुउ। देकिनालो मोसोओ अ़छा स़मादामा मुवाङा।
48येसुआ मो अ़लोवा, “खानानिन झारा बुन खोन्कि म़दोम्दाओ काचिचि मान्खाङ्माङ्तारि साकोङ्छ़ङ त़मुन्मिन।”
49मो हाङ्काचि काफाआ खोक्को लो, “हाङ्पो, अ़ङ्छा स़मादामा बुयाङा बानानिन।”
50येसुआ मो अ़लोवा, “खारा, आम्छा ह़ङ।” येसुआ अ़लोवाओ य़ङ्दा मो म़ना साकोङ्छ़ङ मुवा, खोन्कि अ़लाम वाङा।
51खोन्किना खाराङाहिदा लाम्दा खोसोओ अ़हारुक्चिआ अ़तुआकि खोसोओ अ़छा ह़ङानि खो खाअ़एत्ता। 52खाक्को ग़रिदाङ्का नुमा पुक्तु निकिना खोसाआ मोचि सेनुचिहिदा मोचिआ अ़लोवा, “आखोमाङ अ़क साङादाङ्का अ़माङ्धिन्आ मो लेरु।” 53खोन्किना येसुआ मो “आम्छा ह़ङ”नि अ़लोवाओ ग़रिदाङ्काङा नुवाओ निकिना अ़पाआ सिन्तु। खोन्ओसा खो खोन्कि खोसोओ झारा अ़खिम्लुम्पा साकोङ्छ़ङ म़मुवा।
54यहुदियादाङ्का गालिल्दा ताकिना येसुआ अ़मुवाओ ओ ह्वादुओदुओ म़दोम्दाओ बुन ओ।
Currently Selected:
युहन्ना 4: bap
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.