Jan 5
5
Jesu paagi o joa mi fuodima daali
1Lani n pendi, Jesu den doni ki gedi Jerusalemi Jufinba jaanma siiga jaanyenma po. 2Jerusalemi yeni nni den pia ku ñinbuogu ki kuu leni i Pe Buliñoabu. Hebilu maama nni ku ñinbuogu yeni den yi Betisata ke janamuu#5.2 Li janli leni ku ciagu kuli tie bonyenla. A jana bi ti cadi. ye ku kunkuni. 3A yiama boncianla den dua a jana yeni soangu nni, bine den tie juama, bine diama, bine waba, [bine mo ti gbanankpiendi danba. Bi den guu mi ñima n langidi, 4kelima yogunuba maleki yen jiidi ku ñinbuogu yeni niinni ki langidi mi ñima. O yaa langidi ma, yua n kpa kua lienni yen paagi, ba wan pia yaa yianu kuli.]
5Jayendo den ye likani ki yia hali piitaa n binanii. 6Jesu den laa o ke o dua, ki go bani ke o ye likani ke li waagi, ke o buali o: «Naani a bua ki baa laafia?»
7O yiamo yeni den guani ki yedi o: «Canbaa, mii pia yua n baa kuani nni ku ñinbuogu nni mi ñima yaa langidi yaa yogunu. N yaa nagidi ki baa kua, nitoa yen kpa kua ki ŋaa nni.» 8Jesu den yedi o: «Taa a kaagu ki yaa cuoni.» 9Lanyogunu liga o joa yeni den baa laafia. O den gbabi o kaagu ki taa ki tugi ki cuoni.
10Li daali yeni den tie U Tienu fuodima daali. Lanwani, Jufinba den yedi yua n baa laafia yeni: «Dinla tie fuodima daali. Li kua ŋan tugi a kaagu.» #Neh 13.19; Jer 17.21. 11O den guani ki yedi ba: «Yaa nilo n paagi nni n yedi ke min taa n kaagu ki yaa cuoni.» 12Lani, bi den buali o: «Laa nilo tie ŋme, yua n yedi a ŋan taa a kaagu ki yaa cuoni yeni?» 13Yua n den baa laafia naa den bani Jesu n tie yua, kelima li sua ke ku niligu ye likani ke Jesu kua ku niinni ke waa go laa o.
14Lan yeni waamu Jesu den tuogi o U Tienu diegu nni ki yedi o: «Diidi ki le, a baa laafia, ŋan da go tieni tuonbiadi, ke yaala n bia ki cie line n da cuo ŋa.» 15O joa yeni den gedi ki waani Jufinba ke yua n paagi o tie Jesu. 16Lani yaa po, Jufinba den wangi Jesu fala kelima o den tiendi laa bonbuolu mi fuodima daali.
17Jesu den yedi ba: «N Baa baa ki tuuni hali moala, nmoko tuuni.» 18Laa maama po Jufinba den lingi ki pugidi ki bua ki kpa o. Laa ji den tie kelima o miidi mi fuodima daali kuali bebe ka, ama li tie ke o go tua ke U Tienu n tie o Baa. Lani n tie ke o nua o yuli ke o de leni U Tienu.
Jesu doagidi wani U Tienu Bijua n pia yaa bali
19Lanwani, Jesu den yedi ba: «N yedi yi i moamoani, Bijua kan fidi ki tieni liba kelima o yuceli paalu po. O tiendi wan laa ke Baa tiendi yaala bebe. Wani Baa n tiendi yaala kuli, Bijua moko baa yaa tiendi lane. 20Li tie kelima Baa bua Bijua ki wangi o wani o ba n tiendi yaala kuli. O go baa waani o yaa bonbuolu n cie line ke li baa paki yi. 21Nani Baa n yen fiini bi tinkpiba ki teni ban guani ki yaa fo maama, yeni moko Bijua puuni li miali wan bua yuakuli. 22Baa mo kan jia ti buudi leni oba kuli, o dini Bijua yo li bali wan jia ti buudi kuli. 23Lani, ke bi niba kuli n yaa jigindi Bijua nani ban jigindi Baa maama yeni. Yua n kaa jigindi Bijua kuli, waa jigindi Baa yua n den soani o. 24N yedi yi i moamoani, yua n cengi n maama, ki daani yua n soani nni, pia yaa miali n kan gbeni. O kan cua ti buudi po, ama o ñani mi kuuma nni ki kua li miali nni. 25N yedi yi i moamoani, u yogunu kpendi ki pundi ba moala, ke yaaba n kpe baa gbadi U Tienu Bijua nialu. Yaaba n baa gbadi u mo kuli baa yaa fo. 26Nani Baa n pia li miali o niinni maama, o teni ke Bijua moko pia li miali o niinni yene. 27O go dini Bijua li bali wan yaa jia ti buudi kelima o tie o Joa Bijua. 28Lan da paki yi. U yogunu kpendi ke yaaba n ye a takula nni kuli baa gbadi o nialu 29ki ña bi takula nni. Yaaba n den tieni yaala n ŋani baa fii ki yaa fo, yaaba n den tieni yaala n bia baa fii ban jia ba ti buudi ki cuo ba. #Dan 12.2. 30N kan fidi ki tieni puu n yuceli po. N ja ti buudi nani min gba U Tienu kani maama. N ja yaa buudi n tiegi, kelima mii lingi ki baa yaa tiendi n yaa yanbuama, kali yua n soani nni yaa yanbuama.
Yaala n doagidi Jesu bali
31N yaa tieni n yuli po siedi, n siedi ki tie moamoani. 32Toa ye, yua n tiendi n po siedi. N bani ke wani n tiendi n po yaa siedi tie moamoani. 33Yi den soani bi tondiba Jan kani ke o den tieni siedi i moamoani po. #Jan 1.19-27; 3.27-30. 34Nisaalo siedi ki tie n po tiladi ka, ama n yedi yeni ke yin tindi. 35Wani Jan n den tie yaa fidisanga n co ki yieni. Yi den tuo ki mangi yi pala o yenma nni u yogunu waamu. 36Ama n pia yaa siedi n cie Jan n den tieni n po yaa siedi. Lani n tie min tuuni yaa tuona na, Baa n den puogi nni ke min yaa tuuni ya ki dudi yeni. Laa tuona n tieni n po siedi ke Baa soani nni. 37Baa yua n den soani nni yeni, wani o ba moko tieni n po siedi. Yi daa gbadi o nialu, yi daa laa o mo. #Mat 3.17; Mrk 1.11; Luk 3.22. 38O maama mo naa ye yi pala nni, kelima yi naa tuo ki daani wan soani yua yeni. 39Yi cogi ki kpaagi i Diani po bonŋanla, kelima yi tama ke yi baa baa yaa miali n kan gbeni lienni. Laa Diani n tiendi n po siedi. 40Ba yeni, yii bua ki cua n kani ki baa li miali.
41Mii lingi bi nisaaliba ka n kpiagi nni. 42N bani yi, yii pia U Tienu po mi buama yi pala nni. 43N cua ki tie n Baa tondo, ama yii tuo nni. Ama nitoa yaa cua o yuceli cuama, yi baa tuo o. 44Yi tuo ki baadi ti kpiagidi yiyaba kani, ama yii lingi yaa kpiagidi n ñani U Tienu yua n ki pia lielo kani. Yin tiendi maama yeni, yi baa gaa lede ki dugi n po? 45Yin da tama ke mini n tie yua n baa kuli yi Baa kani. Yua n kuliti yi, lani n tie Musa, yin bili yi dugidi yua yaa kani. 46Yi yaa den daani Musa maama po, yi bi den baa daani n yaa maama moko. Wan den diani yaa maama yeni maadi mini yaa maame. 47Ama yin ki daani wan den diani yaama po yeni, yi nan baa gaa lede ki daani min maadi yaa maama po?»
Currently Selected:
Jan 5: BGP
Tõsta esile
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.