Jan 4
4
Jesu leni Samari diema pua
1 Farisieninba den gbadi ke yaa niba n den tua Jesu ŋoadikaaba ke o batisi ba, yabi ki cie Jan yaaba. 2Ama Jesu wani o ba ka den batisi bi niba, o ŋoadikaaba n den batisi ba. 3Wan den bandi ke bi yedi yeni, o den ñani Jude ki baa guani Galile diema nni.
4Li den tie tiladi wan tagi Samari diema nni. 5Lani, o den pundi Samari dogu yuu n yi Sikari. Laa dogu den kuu leni Jakob n den puni o bijua Josefi yaa kuanu.#Cil 33.19; Jos 24.32. 6Jakob n den gbini yaa caali mo den ye likani. Jesu den cuoni ki coagi, ki kali li caagbanli po. Li den bua ki pundi u yensiinu.
7Samari pua den cua li caali kani ki baa yidi mi ñima. Jesu den yedi o: «Pa nni min ño.» 8Li den sua ke o ŋoadikaaba kua u dogu nni ki baa n daa mi jiema. 9Samari pua yeni den buali o: «Li gaa lede ke fini yua n tie Jufi mia mini Samari pua, ke min pa ŋa ŋan ño?» O den yedi yeni kelima Jufinba naa den pia ŋantaadi leni Samari yaaba.#Esd 4.1-5; Neh 3.33-34. 10Jesu den guani ki yedi o: «A yaa bi bani U Tienu paabu n tie yaala leni mini yua n yedi a: ‹Pa nni min ño› yeni n tie yua, fini n bi baa mia. Lani, o bi baa pa a yaa ñima n pia li miali.» 11O pua yeni den yedi o: «Canbaa, ŋaa pia loangu, ke li caali mo nan ñua. A baa baa yaa ñima n pia li miali le? 12Naani a tama ke a cie ti yaaja Jakob yua n den puni ti li naa caali? Wani o ba n den ñuni li ñima, wani, o bijaba leni o yandi kuli.» 13Jesu den guani ki yedi o: «Yua n ñuni mi naa ñima kuli, u ñuñuunu go baa cuo o. 14Ama yua n ñuni min baa pa o yaa ñima kuli, u ñuñuunu kan go cuo o abada. Min baa pa o yaa ñima baa tua ñinbunli o niinni, ki yaa pudi ki puubi hali yaa miali n kan gbeni nni.» 15O pua yeni den yedi o: «Canbaa, pa nni laa ñima, ke u ñuñuunu n da go cuo nni, ke min da go cua ne ki luuni.»
16Jesu den yedi o: «Gedi ki ban yini a calo ne.» 17O pua yeni den guani ki yedi o: «N naa pia joa.» Jesu den yedi o: «A maadi moamoani leni ŋan yedi ke ŋaa pia joa, 18kelima a den kuni jabimuu ke bi tua a ciaba. Ŋan ye leni yua moala naa tie a calo. Lani yaa po, a maadi moamoani.»
19O pua yeni den yedi o: «Canbaa, n sua ke a tie saawalipualo. 20Ti yaajanba den kpiagidi U Tienu li naa juali po. Ama yinba Jufinba yedi ke tiladi bi niba n baa yaa kpiagidi U Tienu naani tie Jerusalemi.»
21Jesu den yedi o: «Pua, daani n maama. U yogunu kpendi ke yi kan go yaa kpiagidi Baa U Tienu li naa juali po, bi Jerusalemi po. 22Yinba Samari yaaba, yii bani yin kpiagidi yaala, ama tinba Jufinba wani, ti kpiagidi tin bani yaala, kelima mi tindima baa ña Jufinba kane. 23Ama u yogunu kpendi, u pundi ba moala, ke yaa niba n kpiagidi Baa U Tienu moamoani, baa yaa kpiagidi o bi pala nni leni i moamoani. Baa U Tienu lingi yaaba n baa yaa kpiagidi o yene. 24U Tienu tie fuoma. Lani yaa po, li tie tiladi ke yaaba n baa yaa kpiagi o kuli n yaa kpiagidi o bi pala nni leni i moamoani.» 25O pua yeni den yedi o: «N bani ke U Tienu n Gandi Yua n baa cua. Wani, ban yi yua Kilisiti yeni. O yaa cua, o baa waani ti li bonla kuli.» 26Jesu den yedi o: «Mini yua n maadi leni a yeni n tie wani.»
27Lanyogunu, o ŋoadikaaba den guani ki cua. Li den paki ba leni wan boe leni o pua yeni, ama oba ki den buali: «A bua be?» Yaa ka, «Be yaa po ke a maadi leni o?»
28O pua yeni den ŋaa o cuali, ki guani ki kua u dogu nni ki yedi bi niba: 29«Cua mani ki ban le yaa nilo n waani nni min tieni yaala kuli. Waa baa yaa tie U Tienu n Gandi Yua ka?» 30Bi niba den ñani u dogu nni ki cua Jesu kani.
31Lanyogunu Jesu ŋoadikaaba den yedi o: «Canbaa, a di.» 32Ama o den yedi ba: «N pia yin ki bani yaa jiema ki baa je.» 33Lani, o ŋoadikaaba den buali biyaba: «Naani niloba cuani o po bonjekaala bi?» 34Jesu den yedi ba: «N yaa jiema tie min yaa tiendi yua n soani nni yanbuama, ki yaa tuuni o tuonli hali ki dudi. 35Yii tua ke ŋmaalinaa ka sieni yin taani ti kpaandi? Ama mini wani n yedi yi, yaadi mani ki nuali i kuani n beni maama. Li pundi yin taani ti kpaandi. 36Yua n yendi baadi o panpaani ki taagi ti kpaandi yaa miali n kan gbeni po, ke yua n buli leni yua n yendi kuli, n taani ki mangi bi pala. 37Ban pua yaa kpanjama na tie moamoani: ‹One buu, one mo yendi.› 38N soani yi ke yin yendi yin ki den soani yaala yaa po. Nitoaba den soani li tuonli, moala yimo taani ti kpaandi, kelima bi den soani.»
39Samari diema yaaba, yaaba n den ye laa dogu nni, niba boncianla den tuo ki daani Jesu, kelima o pua yeni den yedi ba: «O waani nni min den tieni yaala kuli.» 40Samari niba yaaba n den cua Jesu kani yeni den mia o ke wan sedi leni ba. O go den tieni likani danalie. 41Yaaba n tuo ki daani o den pugini hali boncianla, kelima ban den gbadi yaa maama o kani po. 42Bi den yedi o pua yeni: «Moala, laa ji tie ŋan bi waani ti yaa maama bebe ka teni ke ti tuo ki daani o, tinba ti ba gbadi o maama, ki bandi ke moamoani wani n tie ŋanduna Candaano.»
Jesu paagi o bado koanbali bijua
43Laa dalieda n den pendi, Jesu den fii ki ñani lankani ki gedi Galile diema nni. 44Wani o ba den yedi ke bi kan kpiagi saawalipualo o dandogu nni. #Mat 13.57; Mrk 6.4; Luk 4.24. 45Wan den pundi Galile, laa diema yaaba den gaa o cangu bonŋanla, kelima bimoko den gedi Jerusalemi ki jaani mi Pendima jaanma, ki laa wan den tieni yaala kuli laa jaanma yogunu. #Jan 2.23. 46Jesu den guani ki gedi Galile yaa Kana, wan den teni ke mi ñima lebidi ki tua duven naankani yeni.
O bado koanbali den ye Kafarnawum dogu nni ke o bijua yia. #Jan 2.1-11. 47Li koanbali yeni n den gbadi ke Jesu ñani Jude diema nni ki cua Galile diema nni, o den cua o kani ki mia o ke wan yegi leni o ki gedi Kafarnawum, ki ban paagi o bijua kelima o nagini mi kuuma. 48Jesu den yedi o: «Yi yàá laa mi bancianma leni li bonlindinkaala yaa ka, yi kan daani nni.» 49Li koanbali den yedi o: «Canbaa, cua tin yegi ki gedi ke n biga daa kpe.» 50Jesu den yedi o: «Kuni, a biga baa laafia.» O joa yeni den daani Jesu n maadi o yaa maama, ki kuni. 51Wan den ye u sanu nni, o naacenba den tuogi o ki waani o ke o biga baa laafia. 52O den buali ba wan li baa laafia yaa yogunu. Bi den waani o ke wonli li yenlebidile, ke o gbananbiendi den kagidi o po. 53Ki biga baa den bandi ke li den tie lanyogunu cap, ke Jesu yedi o: «A biga baa laafia.» Wani leni o deni yaaba kuli den tuo ki daani Jesu.
54Lani n tie Jesu n den tieni yaa bancianliema, wan den ñani Jude diema nni ki guani Galile diema nni.
Currently Selected:
Jan 4: BGP
Tõsta esile
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.