Jan 17
17
Jesu jaandi o ŋoadikaaba po
1Jesu n den maadi laa maama, o den yaadi ki diidi tanpoli po ki yedi: «N Baa, u yogunu pundi. Kpiagi a Bijua, ke a Bijua mo n kpiagi a. 2A dini o li bali ke o die bi nisaaliba kuli, ke wan pa ŋan puni o yaaba kuli yaa miali n kan gbeni. 3Yaa miali n kan gbeni tie, ban bandi fini bebe, yua n tie U Tienu moamoani, ki go bandi ŋan soani yua, Jesu Kilisiti. 4N den kpiagi a ki tinga po, ki soani ki dudi ŋan den puogi nni yaa tuonli. 5Moala, fini Baa, ŋan kpiagi nni a kani leni min den kpa pia yaa kpiagidi a kani ke ŋanduna daa ye.
6N doagidi a yeli ŋan den puni nni yaa niba kani ŋanduna siiga. Bi den tie a yaa yaaba, ke a den puni nni ba. Bimo tuo ki kubi a maama. 7Moala bi bandi ke ŋan puni nni yaala kuli ñani a kani. 8N caa ba ŋan den soani nni yaa tondu, bi mo gaa ki bandi ke n ñani a kani moamoani, ki go daani ke fini n soani nni. 9N mia ŋa bi yaa po yo. Mii mia ŋa ŋanduna po ka, ama n mia ŋa ŋan puni nni yaaba yaa po yo, kelima bi tie a yaa yaaba. 10Min die yaala kuli tie a yaala, ŋan die yaala kuli mo tie n yaala. N baa ti kpiagidi kelima bi yaa po. 11N kan go yaa ye ŋanduna nni. Ama bani wani baa yaa ye ŋanduna nni. Mini, n caa a yaa kane. Baa U Tienu yua n gagidi ki ŋani, kubi ba kelima a yeli nni, ŋan den puni nni yaa yeli yeni. Teni ban yaa tie yendo, nani tinba n tie yendo maama. 12Min den ye leni ba, n den kubi ba kelima a yeli paalu po, ŋan puni nni yaa yeli yeni. N den kubi ba ke bi siiga ba yendo ki bodi, li yàá yua n den baa bodi yaa ka. Lani n tie i Diani n yedi yaala n tieni#17.12 Li maadi Judasi Isikarioti yaa maame. Diidi Pisomi 41.9-10; 109.8.#Ps 41.9; Jan 13.18.. 13Moala n kpendi a kani. N maadi lani ki da ye ŋanduna nni, ke min pia yaa pamanli n dagidi bi niinni. 14N caa ba a tondu. Ŋanduna yaaba nani ba, kelima baa go tie ŋanduna yaaba, nani mini n ki tie ŋanduna yua maama. 15Mii mia ke ŋan ñani ba ŋanduna nni ka. Ama ke ŋan yaa kubi ba, o Biado n da paadi ba. 16Nani min ki tie ŋanduna yua maama, bani moko ki tie ŋanduna yaaba yene. 17Gagidi ki ŋanbi ba i moamoani nni. A maama tie i moamoani. 18Nani ŋan den soani nni ŋanduna nni maama, nmoko soani ba ŋanduna nni yene. 19N gagidi ki ŋanbi n yuli a po, ke bani moko n gagidi ki ŋanbi a po i moamoani nni.
20Mii mia ŋa bani bebe yaa po ka, n go mia ŋa yaaba n baa tuo ki daani nni, kelima bi yaa maama po moko yaa po. 21Min mia ŋa bi po yaala tie line: bikuli n yaa tie yendo nani fini Baa n ye n niinni, ke nmoko ye a niinni maama. Bani mo n yaa ye ti niinni, ke ŋanduna yaaba n daani ke fini n soani nni. 22N puni ba ŋan puni nni yaa kpiagidi, ke ban yaa tie yendo nani tinba n tie yendo maama. 23Mini, n ye bi niinni, a mo ye n niinni; Teni ban tua yendo cain, ke ŋanduna yaaba n bandi ke fini n soani nni, ki bua ba nani ŋan bua nni maama. 24Baa, ŋan puni nni yaaba yeni, min baa yaa ye naankani, n bua bani moko n yaa ye lankane. Lani n tie ban yaa nua n kpiagidi, ŋan puni nni yaadi, kelima a den bua nni hali ke ŋanduna daa tagi. 25Baa yua n tiegi, ŋanduna yaaba naa bani a, ama mini n bani a. Bine mo bandi ke fini n soani nni. 26N den teni ke bi bandi a yeli. N go baa teni ban bandi li, ke ŋan bua nni yaa buama n yaa ye bi pala nni, ke mini mo n yaa ye bi niinni.»
Currently Selected:
Jan 17: BGP
Tõsta esile
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.