Jesu Tondiba Tuona 7
7
Etienni n maadi bi cancantieba taancianli yaa maama
1Bi kopadicianba bado den buali Etienni ki yedi o: «Li tie yeni moamoani bi?»
2Etienni den yedi: «Yinba, n kpiiba leni n baanba, cengi mani! Ti kpiagidi Tienu den doagidi o yuli ti yaaja Abalahama po, wan den ye Mesopotami diema nni yaa yogunu, hali ke o daa fii likani ki gedi ki ban kali Harani dogu nni.#Cil 12.1. 3O Diedo den yedi o: ‹Fii ki ña a diema nni ki ŋaa a diegu yaaba, ki gedi min baa waani a yaa diema nni.› 4Lani, Abalahama den ñani Kalide yaaba diema nni, ki gedi ki ban kali Harani. O baa n den kpe yaa yogunu, U Tienu den teni ke o fii ki ñani likani ki cua yaa diema n tie ne, yin ji ye naankani moala. #Cil 11.31; 12.4. 5U Tienu ki den puni o wan die naani mi naa diema nni, ba taafaagu n baa ŋmaa naani. Ama o den niani o ke o baa ti pa o mi diema yeni man tua wani leni o puoliŋuani n baa ti die yaama, ba ke waa den pia biga lanyogunu. #Cil 12.7; 13.15; 15.18; 17.8. 6U Tienu den yedi o yaala n tie ne: ‹A puoliŋuani baa yaa tie canba mi dielanma nni. Bi nilanba yeni baa ti kuani ba ti yonbidi nni, ki yaa wangi ba fala hali bina kobinaa.#Cil 15.13-14. 7Ama mini U Tienu n baa jia yaa nilanbuolu n kuani ba ti yonbidi nni yeni buudi. Li yaa puoli, n niba baa fii ki ña laa diema nni, ki go cua ki yaa kpiagidi nni mi naa diema nni.› #Ñam 3.12. 8Lani, U Tienu den kuani ku koanciagu ŋantaado leni Abalahama. Lani yaa po, Abalahama n den mali Isaaka, o den kuani o ku koanciagu o madi daniili. Isaaka n den mali Jakob, o den kuani o yeni. Jakob den mali piiga n jabilie, lani n tie ti yaajanba, ki kuani bani mo kuli. #Cil 17.10-14; 21.2-4; 25.26; 29.31—35.18.
9Ti yaajanba den pia li nunponbiadili bi waalo Josefi po. Bi den kuadi o, ke bi gedini o Ejipiti ti yonbidi. #Cil 37.11,28; 39.2,21. 10Ama U Tienu den ye leni o ki gaa o, wan ye yaa fala nni kuli. O go den puni o mi yanfuomoanma ki teni ke Ejipiti bado Faraon mani leni o, ki dini o li bali ke o tua Ejipiti guveneeri, ki go die wani Faraon diegu kuli.#Cil 41.39-41.
11Lani n pendi, mi koncianma den baa Ejipiti nni leni Kanana#7.11 Isidayeli yaaba diema den ye yaa tinga n yi Kanana, yaa ka Palesitini nni. nni kuli. Fala den ye boncianla. Ti yaajanba den luo li bonjekaala. #Cil 42.1-2. 12Jakob den gbadi ke mi jiema ye Ejipiti po, ki kpa soani ti yaajanba likani yenma. 13Ban guani likani miliema, Josefi den waani o kpeliba wan tie yua, Faraon moko den bandi Josefi n tie yaa nibuolu yua. #Cil 45.1,16. 14Lani, Josefi den soani ke bi yini o baa Jakob leni o deni yaaba kuli yaaba n den pundi piilele n nibimuu yeni, ke bi cua o kani. #Cil 45.9-10; 17.18; Cil 46.27. 15Jakob den gedi Ejipiti, ki kpe lipo, wani leni ti yaajanba. #Cil 46.1-7; 49.33. 16Bi den tugi ba ki gedini ba Sikemi ki ban piini ba Abalahama n den daa yaa takuli nni Hamori bijaba kani. #Cil 23.3-16; 33.19; 50.7-13; Jos 24.32.
17U Tienu n baa tieni wan den niani Abalahama yaa ñoanianu yaa yogunu n den nagidi, li sua ke ti buolu den yabidi ki pugidi pugidi Ejipiti nni. #Ñam 1.7-8. 18Hali yaa yogu ke baditoa, yua n kaa bani Josefi po, den ti dini Ejipiti bali. 19O bado yeni den janbi ti buolu ki wangi ti yaajanba fala, ki teni ke bi lu bi canpanda ke ban da ye. #Ñam 1.10-11,22.
20Lanyogunu bi den mali Musa, ke o ŋani U Tienu nintuali. Bi den kubi o o baa deni ŋmaalitaa. #Ñam 2.2. 21Ban den ti luni o, Faraon bisalo den taa o o yuceli po ki kubi o nani o bijacele yeni. #Ñam 2.3-10. 22Bi den bangi Musa Ejipiti yaaba cogu leni bi yanfuobanma kuli. O den pia u paalu mi maama leni a tuona nni kuli.
23Wan den pia bina piinaa, li den kua o pali nni wan gedi ki ban le o buolu, Isidayeli yaaba. #Ñam 2.11-15. 24O den pundi ki laa ke Ejipiti yua faligidi Isidayeli yua. Lani, o den gaa Isidayeli yua koanli ki pua ki kpa yua n waani o fala yeni ki tuu o o panli. 25O den tama ke o kpiiba Isidayeli yaaba baa bandi ke U Tienu baa gaa ba kelima wani yaa nuu yaa po, ama baa den bandi. 26Lan den fii ki faa, o den laa Isidayeli yaaba siiga nibilie ke bi pua biyaba. O den moandi ki baa teni ban goa ki mangi leni biyaba, ki yedi ba: ‹Yinba yi tie buoyendu, be n teni ke yi faligidi yiyaba?› 27Yua n den faligidi o lielo den tudi#7.27 Tudi: Yaa ka pieni. Musa ki yedi o: ‹Ŋme dini a li bali ŋan tua ti yudaano leni ti bujialo? 28Naani a bua ki kpa nni nani wonli nni ŋan den kpa Ejipiti yua maama yeni bi?› 29Laa maama po Musa den sani ki gedi ki ban ye Madiani diema nni. O den mali bonjalalie lipo. #Ñam 18.3-4.
30Bina piinaa n den pendi Musa den ye Sinayi juali fanpienma nni. O den laa yaa fatuugu n co ke maleki den doagidi o yuli o po u mupienu nni. #Ñam 3.1-10. 31Musa den laa laa bonla ke li paki o. Wan den nagidi ki baa diidi bonŋanla, o den gbadi o Diedo nialu ke o yedi: 32‹N tie a yaajanba Tienu, Abalahama, Isaaka leni Jakob Tienu.› Ti jawaandi den cuo Musa ke o digibi kaa tuo ki baa diidi. 33O Diedo den yedi o: ‹Piti a cacaadi kelima ŋan se yaa kaanu yeni tie tingagidikaaga. 34N laa n niba fala Ejipiti nni, ki go gbadi bi dunli, ki jiidi ki baa faabi ba. Ŋan cua moala, n baa soani a Ejipiti.›
35Musa yeni tie ti yaajanba n den yie yua ki yedi o: ‹Ŋme dini a li bali ŋan tua ti yudaano leni ti bujialo?› Wane, ke U Tienu den soani ke o tua bi yudaano leni bi candaano kelima yaa maleki n den doagidi o yuli o po ku fatuugu nni yaa paalu po. #Ñam 2.14. 36Wani Musa den tieni mi bancianma leni sinankeeninba Ejipiti nni leni mi Ñincianmoanma nni, ki ñani Isidayeli yaaba, ki go tiendi mi bancianma leni sinankeeninba mi fanpiencianma nni hali bina piinaa. #Ñam 7.5; 14.21; Coa 14.33. 37Wani Musa tie yua n den yedi Isidayeli buolu: ‹U Tienu baa fiini yi siiga o saawalipualo yua n tie nani mini.› #Tia 8.15,18. 38O den ye leni Isidayeli yaaba nitaanli mi fanpiencianma po leni ti yaajanba yeni leni U Tienu maleki yua n den maadi leni o Sinayi juali kani. O den baa li miali maama, ki soagini ma ti po. #Ñam 19.1—20.17; Tia 5.1-33.
39Ama ti yaajanba naa den tuo ki ŋua Musa n den yedi ba yaala. Bi den yie o maama. Bi pala nni bi den bua ki guani ki gedi Ejipiti. 40Bi den yedi Alono: ‹Duadi ti po yaa tieni n baa yaa cuoni ti liiga, kelima Musa yaa joa n ñani ti Ejipiti diema nni yeni tii bani yaala n tieni o.› #Ñam 32.1. 41Laa dana nni bi den duadi yaa bulo n tie ki naabiga nannanli, ki padi o po a pada, ki mangi bi pala kelima bi nii n tieni yaala po. #Ñam 32.2-6. 42Lane U Tienu den lebidi ki ŋaa ba, ki cedi ke bi kpiagidi tanpoli ŋmaali, nani lan diani bi saawalipuaba tila nni maama:
‹Yinba, Isidayeli buolu,
Naani yi den padi n po ti yandi leni a pada buoli kuli
Yin den ye mi fanpienma nni bina piinaa bi? #Amo 5.25-27.
43Yi den tugi o bulo Moleki gbandieli
Ki go tugi o bulo Lefana yaa ŋmabiga,
Yin den tagi yaa buli nannana ki baa kpiagidi ŋa.
Lani yaa po, n baa teni ban gedini yi ti yonbidi hali Babilonni diema liiga.›
44Ti yaajanba den pia siedi gbandieli mi fanpiencianma nni. Musa den tii li nani U Tienu n den puogi o maama, ke li tie yenma leni wan den waani o yaa nannanli. #Ñam 25.9,40. 45Li yaa puoli, Josue n den gobidi ti yaajanba yaaba den kuani li gbandieli yeni mi naa diema nni. Bi den diedi yaa nibuoli n den ye ne kelima U Tienu den deli ki ñani ba bi nintuali. Li gbandieli yeni den ye ne hali ki pundi Davidi yogunu. #Jos 3.14-17. 46Davidi den baa li ŋanbili U Tienu kani ki mia o ke wan pa o u sanu wan ŋanbi wani Jakob Tienu po u yekaanu. #2Sam 7.1-16; 1Baj 17.1-14. 47Ama yua n den maa o po li dieli den tie Salomon. #1Bad 6.1-38; 2Baj 3.1-17. 48Leni lani kuli tanpolijoma Tienu naa ye bi nisaaliba n maa yaa dieli nni nani o saawalipualo n yedi maama:
49O Diedo yedi:
‹Tanpoli tie n bali kalikaanu,
Ki tinga mo tie n taaŋmaakaanu.
Yi baa maa n po be yaa diebuolu?
Bi, le n baa tua n fuodikaanu? #Esa 66.1-2.
50N yaa nuu ka tagi likuli?›
51Yinba u tupaalu danba, yi tie nani a jifola yeni yi pala nni leni yi tuba po. Yi yiedi U Tienu Fuoma Yua po yogunu kuli nani yi yaajanba n den tiendi maama. #Esa 63.10. 52O laa saawalipuale ke yi yaajanba ki faligi o? Bi den kpa yaaba n den tuodi ki wangi o Niteginka cuama. Moala, yi janbi o ki kpa o. 53Yi den baa U Tienu bali maama, o malekinba n den soagini yi yaama, ama yii tuo ki kubi ma.»
Bi lugidi Etienni a tana ke o kpe
54Bi cancantieba taancianli yaaba n den gbadi Etienni maama yeni, bi pala den beni hali ke li kandi ke bi cegini bi ñina o po. 55Ama Etienni den gbie leni U Tienu Fuoma Yua ki den yaadi ki diidi tanpoli po ki laa U Tienu kpiagidi, ki go laa Jesu ke o se U Tienu jienu. 56O den yedi: «Diidi mani, n laa ke tanpoli luodi, ke o Joa Bijua se U Tienu jienu.» 57Lane bi den biini bi tuba ki tiani, ki taani ki bibi o yenma, 58ki ñani o u dogu nni ki ban lugidi o a tana. Bi siedinba den bili bi tiayiekaadi ban den yi yaa jawaalo Soli taana kani. 59Ban den lugidi Etienni a tana yaa yogunu, o den jaandi ki yedi: «N Diedo Jesu, ŋan gaa n naano.» 60Lani, o den gbaani ki kpaani ki yedi: «N Diedo, da tuni ba ti naa tuonbiadi.» O den yedi yeni ki kpe.#7.60 Gireki maama nni li yedi: «Guani,» nani bi Gulimanceba yaa bua ki yedi: «O kpe,» bi yen yedi: «Waa ye,» bi «O cabi.»
Soli den saa moamoani ban ku Etienni yeni po.
Currently Selected:
Jesu Tondiba Tuona 7: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.