Jesu Tondiba Tuona 6
6
Bi gandi jabilele ban yaa todi Jesu tondiba
1Laa dana nni, Jesu ŋoadikaaba den pugidi pugidi, ke yaa Jufinba n maadi Gireki maama den yenbidi, kelima yaa Jufinba n tie dentieba yaa den boagidi daali kuli todima, bi yen kandi yaa Jufinba n maadi Gireki maama yaa kpepuona kaa puuni ba. 2Bi piiga n niliediba den yini bi ŋoadikaaba kuli ki yedi ba: «Laa pundi tin cedi U Tienu maama wangima, ki yaa tendi mi jiema. 3Lani yaa po, ti kpiiba, gandi mani yi siiga nibilele, bi niba n tiendi yaaba yaa po o siediŋamo, yaaba n gbie leni o U Tienu Fuoma Yua leni mi yanfuoma. Ti baa puogi ba laa tuonli, 4ama tinba wani baa pa ti yula i jaandi leni U Tienu maama wangima po.»
5Laa maama den mangi li nitaanli kuli. Bi den gandi Etienni, yua n gbie leni U Tienu Fuoma Yua, ki go pia li dandanli o Diedo po, Filipi, Prokori, Nikanori, Timono, Pamenasi leni Nikola yua n den tie nilamo, Antiosi yua, ki nan lebidi ki ŋoadi U Tienu. 6Bi den cuani laa jabe Jesu tondiba kani, ke bi maani bi po bi nii, ki jaandi ki mia U Tienu.
7U Tienu maama den yadi ki pugidi, Jesu ŋoadikaaba den pugidi hali boncianla Jerusalemi, bi kopadicianba boncianla den tuodi ki ŋua Jesu.
Bi cuo Etienni
8Etienni den gbie leni U Tienu ŋanbili leni u paalu, ki tiendi bi niba siiga mi bancianma leni sinankeenciami. 9Bi nitianba yaaba n tie li bali maama bangima dieyenli yaaba, ban yi yaaba bi Nifaabikaaba, den fii ki nia leni Etienni. Bi den taani leni yaa Jufinba n ñani Sireni leni Alekisandri dogi nni leni yaaba n ñani Silisi leni Asi diema nni kuli. 10U Tienu Fuoma Yua den puni Etienni mi yanfuoma ke o maadi, ke bi kan den fidi ki nia leni o. 11Lane ke bi den suu bi jaba li suuli ke bi pua o po mi faama ki yedi: «Ti gbadi ke o maadi ti masugidi Musa leni U Tienu po.» 12Bi den lengidi bi niba leni a nikpela leni li bali maama banda yama. Lani, bi den cua ki bibi Etienni ki cuo o ki gedini o bi cancantieba taancianli po. 13Bi go den teni ke bi siedifaadanba pua o po mi faama ki yedi: «O naa joa sugidi u naa kaangagidiŋamu, ki go sugidi li bali maama kaa cedi. 14Ti go den gbadi ke o yedi ke Jesu, Nasareti yua yeni, baa bolini U Tienu diegu na ki lebidi Musa n den bili ti po yaa bogida.» 15Bi cancantieba yaaba n kaa bi taancianli kani kuli den diidi Etienni, ki laa ke o nunga tie nani maleki yaaga yeni.
Currently Selected:
Jesu Tondiba Tuona 6: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.