Za 21
21
Yeesu wakumonikë ke saambwali li bilaanzi
1Mwa ntaangu yivyookë, Yeesu wumonikooso ke bilaanzi byaandi, mu ndaambu liyaangë bën'teelë Tibelëyaadë. Talo bunë naandi wubëmonikënë : 2Simu li Pyeelë, Tomë bën'teelë ti Cibasë, Natanayeelë wabë musë Kana ku Ngalilee, banë bë Zebedee i bilaanzi bi byooli bimesi bi Yeesu, babë fë cimweekë. 3Simu li Pyeelë wusë tubë : « Miinu yakë n'kwendë mu kuvubë. » Baawu bisë n'kaambë : « Beeso yiviitu tun'kwendë yimunë njeeyi. » Baawu bisë kweendë i bisë makë mu bwaatu, kasi munë bwiilu beenë, baawu bësye bakë cin'velë ko. 4Bunë bwiisi bwatooni kucya, Yeesu wabë faanë, mu ndaambu masi, kasi bilaanzi bësye zaabaangë ko ti wabë naandi. 5Yeesu wusë bëyufulë : « Beeno banë baami, lwabakë litoongwe? » Baawu bisë n'vutulilë « Moniko ». 6Naandi wusë bëkaambë : « Laakaanu n'taambu ku lweeku lu mëbakëlë lu bwaatu i beeno syalubakë. » Baawu bisë lakooso n'taambu i baawu bësye bakooso ko likanë li kuwubasilë mu masi, abu wabë wuwaalë litoongo#21.6 v. 3 i 6 i Lik 5.4-7.. 7Cilaanzi cyo Yeesu kulëzolaangë, wusë kaambë Pyeelë : « Mati Fumu! » Bunë Simu li Pyeelë kwe yuwu mamoomo: « Mati Fumu », naandi wusë be vwaatë cinkutu cyaandi, cibilë wucibotulë mu kuvubë i wuyilaakë mu masi. 8Bilaanzi bimesi bisë vutukënë mu bwaatu, bëlë ke titaangë n'taambu wuwaalë litoongë: baawu bësye ba cinaanu ko yi liloondo. Fë kwaasu ku nkamë li mitakë. 9Bunë baseesi, baawu bisë monë fë yilu mbaasu mbisi i limpa. 10Yeesu wusë bëkaambë : « Lwe n'twaalyaanu mwa litoongo lin'ka lyo beeno lwabakë. » 11Simu li Pyeelë wusë maakë mu bwaatu i wutitë n'taambu fë n'toto wuwaalë litoongë: mu lyakë lyooso, nkamë mëkumë-taanu mbisi tatu. Bosuku litoongo li luvyokililë, n'taambu wusye benzikë ko. 12Yeesu wusë bëkaambë : « Yisaanu lulya. » Cilaanzi ve cibakë likanë li kun'yufulë : « Njeeyi nani wukeeli? » Cibilë baawu bëzaabë ti naandi na Fumu. 13Yeesu wusë belëmë, wuboongë limpa i wusë bëkabilë, naandi wubëvaanë yivaandi mbisi. 14Yabë vyaasi yin'tatu#21.14 20.19,26. yinë Yeesu wuyimonikë ke bilaanzi, kutatikilë bunë kuvulumukë mu nkoongë bëfwa.
Yeesu i Pyeelë
15Fanë bamani kulya, Yeesu wusë kufulë Simu li Pyeelë : « Simu mwaanë Za, njeeyi wun'zolisi kuvyokilë bëmesë aba? » – « Cibeeni a Fumu, njeeyi be zaabë ti miinu yibe kuzolë. » Yeesu wusë tubë : « Keelë mëmemë maami. » 16Naandi wusë n'yufulë vyaasi yimwaali : « Simu, mwaanë Za, njeeyi wun'zolisi? » – « Cibeeni a Fumu yibe kuzolë. » Yeesu wukun'kaambë : « Keelë mëmemë maami. » 17Naandi wun'yufulë vyaasi yin'tatu: « Simu, mwaanë Za, wukun'zolisi? » Pyeelë wukotë mu cyuundë cibilë Yeesu wun'yufulë mu vyaasi yin'tatu : « Njeeyi wun'zolisi. » Naandi wun'vutulilë : « A Fumu njeeyi zabisi makë mooso, njeeyi wuzabisi ti miinu yibe kuzolë! » Yeesu wun'kaambë : « Keelë mëmemë maami#21.17 Mëv 20.18; 1 Py 5.2.. » 18Licyelikë, licyelikë yikukaambë : « Fanë wabë n'teendë njeeyi wulëkaangaangë njeveekë li likaanji i wulëkwendaangë kosuku wulëzolaangë. Kasi fanë wun'nuninë, wun'kwaalë myooko, wun'ka wukukaangë likaanji lyaaku i wukunatë ko njeeyi be kaambu kuzolë. » 19Bunë kwe tubi mamoomo, Yeesu wusulikë buni Pyeelë wun'fwiilë i kuleesi bumpumu bu Nzaambi. Keti, Yeesu wun'kaambë : « N'daandi! »
Yeesu i cilaanzi kulëzolaangë
20Pyeelë wubalukë i wumonë ku mbusaawu cilaanzi cyo Yeesu kulëzolaangë – wunë wukwesënë fëke Yeesu ntaangu ndiiwu i wun'yufulë : « A Fumu, nani wukusumbisye#21.20 13.25.? » – 21Pyeelë wum'monë i wukaambë Yeesu : « A Fumu, mbi bikun'yisilë? » 22Yeesu wun'vutulilë : « Ningë miinu yibe zolë ti naandi wuziingë tee faanë yin'vutukënë, maawu më kun'talë? Njeeyi, n'daandi! » 23Saangu yisë nyambë fë meeyi bitamaanë ti cilaanzi aci cisë n'fwa ko. Kosuku, Yeesu wusye kaambë Pyeelë ti naandi wusë n'fwa ko, kasi naandi wutubë : « Ningë miinu yizolisi ti naandi kuziingë tee yi faanë miinu yin'vutukënë, maawu më kun'talë? »
24Mati cilaanzi be cyoocyo cyaawu cimonë kuta cimbaanji mu mamoomo i wumësonikë i beeso tuzabisi ti cimbaanji cyaandi ci cyelikë#21.24 19.35..
Situkulu
25Yeesu wuvaangooso mpaapë maambu. Ningë bubëkwalulë maawu mu bisonë, limweekë-limweekë, yim'balë ti buloongo n'viipë kupodi ve kufwaanë mëbuuku manë bëfitë sonikë#21.25 20.30..
Currently Selected:
Za 21: NTVIL
Tõsta esile
Share
Kopeeri
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.