Uumama 31
31
1Yakobooni aka ilmaani Labani, Yakobooni ya hori abba kenna ch'ufa fud'ate horeeni jette d'agaye. 2Inni ammalle aka Labaniini iti hammaachu jiru arge. 3Jennaani AABBO Waaqi waan jed'eeni, Lafafi worra keesaa d'alatteti gali; anini si woliini jira.
4Duuba Yakobooni qonqo gara Rahelifi Leani jirtuti erge waan jed'e, Arjaala fulla reeni jirtuti nati koota; 5anini aka abbaani keesani aka duri kaani nati dansa intahiini ya arge, ammo ha taatu, Waaqi abba kiyya taka na illakimne. 6Isani imbeetani, aka anini danfe abba keesani hojad'e, 7ammo inni na sobe waan anini sila argad'u maro kud'ani garagalche na dabse. Ammo ha taatu, Waaqi aka inni na balleesu iti illakimne. 8Yo Labaniini, Reeni shaafi ch'ufti tante jed'e, reeni ch'ufti shaafa d'alte; ammalle yo inni, Kalaaditiini ch'ufti tante jed'ele, reeni ch'ufti kalaaditi d'alte. 9Waaqi akanaani ree abba keesani iraa fuud'e naa kenne.
10Gaafa toko ka reeni rimu jirtu, anini, oobjad'e korbeeyyi laleesa shaafa d'ad'alati goobdu arge. 11Malaikaani Waaqa oobjuuni na yaamte waan jette, Yakobo! Anini, Yaa jed'e. 12Isiini waan naani jette, Laali, korbeeyyiini goobu jirtu tunini ch'uftinu shaafafi kalaaditi. Wonti akanatiifi waan Labaniini si tolche ch'ufa ya arge. 13#Uum 28.18-22Anini Waaqa ka Betheliti siti mullate, fulla atini d'akha mudde nati kakhatte. Amma kurfefad'u, kai, lafa ati iti d'alatteti gali.
14Jennaani Rahelifi Leani waan jetteeni, Nu d'aalafi yokhaani woma tokole worra abba keenna keesa inqamna? 15Inni aka nyaapa nu inheregu? Wonti akanatiifi inni nu gurgure, hori qarat'a keenna ch'ufa hobaase. 16Horiini Waaqi abba keenna iraa fuud'e ch'uftinu ya keennafi ka ijoolle teenna tahe. Amma waan Waaqi siini jed'e ch'ufa tolchi.
17-18Duuba Yakobooni kureffate aka lafa abba ufii Kanaaniti galu. Ijoolle isaatiifi nad'eeni isaale gaala yaabachiise, reefi waan Mesopotamiati horate ch'ufa ufi dura oofe. 19Ato Yakobooni kae ingodaaniini, gaafa toko Labaniini hooliye isaa dabassa woyaani mid'aasani iraa ch'iruu d'aqe, jennaani Raheliini mana abba seente waan harkaani mid'aasani ka aka Waaqa kad'atani duraa hatte. 20Yakobooni Labani mala iti d'aate, ato iti inhiminu, 21waan ufi qabu ch'ufa fud'ate hurrise baqate galaana Frati taake gara lafa gaareeni ta Gileaditi qajeele.
Aka Labaniini Yakobo reebe
22Eeguma guyyaani sadi dabre, Labaniini aka Yakobooni baqate d'agaye. 23Jennaani jara ufii ka d'iira fud'ate haga guyya torba reebe lafa gaareeni ta Gileaditi d'aqabe. 24Halkanuma suni Waaqi oobju keesa Labaniti mullate waan jed'eeni, Waan taatu, waan hamtufi toltule tokole Yakobooni injed'ini. 25Yakobooni waaro isaa gaara irati d'aabate, Labanileeni, jara isaa woliini, waaro lafa gaareeni ta Gileadi irati d'aabate.
26Labaniini waan Yakobooni jed'e, Atini maafi mala nati d'aate dubra tiyya, aka nad'eeni lola keesati boojiani, fuute itiini d'aabatte? 27Atini maafi mala nati d'aate d'ossaani na baqatte? Ato atini sila nati himte, anini jila guddo sii tolche kiraarifi dibbeeni si sirbe, duuba nagayaani si gad'iisa. 28Atini maafi daalloofte dubra tiyyafi akhakhowani tiyyale d'ungo na d'owarte? 29Anini dandae sila wo si tolcha, ammo edda Waaqi abba keeti waan naani jed'e, Waan hamtufi toltule tokole Yakobo intolchini. 30Anini aka atini guddo worra keesaniti galu feetu imbeekha, ammo maafi waaqoota kiyya, ka anini manati kad'ad'u, hatte deemataani?
31Yakobooni waan jed'e, Anini sodaad'e waan atini dubra tante irreeni naraa fud'attu sehe. 32Yo nama tokole waaqoota tante ta atini baantu suni irati argani ha ijeesani. Kuno, fiit'a teenna tana durati waan ati kanke seetu barbaadi fud'ad'u jed'e. Yakobooni aka Raheliini waaqoota Labani hatte quba inqabu.
33Labaniini waaro Yakobo seene soqe woma d'abe; ta Leatiifi nad'eeni hojattu lamaanile seene sule keesa woma d'abe; eegee ta Raheli d'aqe. 34Raheliini isa durati, ato inni ind'ufini, Waaqoota Labani taani fuute subba gaalaani fahani keesa keete ira teete. Labaniini waaro ch'ufa garagalche soqe, ammo woma keesaa d'abe. 35Raheliini waan abbaani jette, Aabbo, anini ch'eera si ind'amne, ammo aada uwa qaba, tanaafi sii olkau dad'abe. Labaniini haga soqe soqe woma d'abe.
36Yakobooni miira yakate waan jed'e, Anini ch'ubbu tami hojad'e, yokhaani seera kami ch'abse, ka atini aka nyaapa na reebdu? 37Waan anini qabu ch'ufa ya sot'e, waan mana keeti ka bade maani agarte? Kuno, arma kayi, waan agarte fuula worra kiyyafi keeti dura, aka worri naafi sii nama d'uga qabu argu. 38Ganna diddama ka nu woliini teenne, reeni tante tokoleeni taka insaleesine, yokhaani anini korbeeyyi tante taka inyaanne. 39Yo bineensi ree tante narati nyaatu ch'ufa anini taka sitiini ind'umne, ammo tiyya fulla sii kaye. Yo guyya taanaani yokhaani halkani taanaani hori kanke hatani, atini naraa fed'atta. 40Guyya heddu sii jed'e, guyya aduuni due halkani d'aamochaani due hiriba d'abe. 41Ganna diddama ka nu woliini teenne ch'ufa anini akasuma gaargale. Ganna kud'ani afuri dubra teeti jed'e hojad'e, ammalle ganna jaa ree sii tisse. Kama anini waan kana ch'ufa si tolche, atini maro kud'ani waan anini argachuu male garagalchite. 42Ato Waaqi abbooti tiyya, Waaqa Abrahamuuni yaamate Isaaqooni sodaate na woliini jiraachuu baate, atini sila arra kale harka duwa na ingalchiini. Ammo Waaqi ya d'iba kiyyafi huji anini harka kiyyaani hojad'ele ch'ufa arge, duuba edda wollaala siti mure.
Aka Yakobofi Labaniini wold'aqani
43Jennaani Labaniini waan Yakobooni jed'e, Dubarti tuni ilmaani tiyya; ijoolleeni isiileeni tiyya, reeni tulleeni ch'ufti tiyya. Wonti atini asi agartu tuni ch'ufti tiyya. Ammo amma dubra tanaafi ilmaani isiitiifi waan tahu inqabu. 44Kooti, dubbanne wold'ageenna: aka wold'ageetiini teenna tunini d'ugaa taatu, d'akha wolti guurre suniini garsiimna.
45Jennaani Yakobooni d'akha toko fuud'e, aka akheekha old'aabe. 46Inni worra fiit'a isaa yaame, D'akha wolti guura jed'eeni, duuba worri wolti guure wolgubbaa naqe d'aatu suniti gololfatani. 47Labaniini fulla suni Yegar-Sahadutha jed'e, ammo Yakobooni Galeedi jed'eeni. 48Jennaani Labaniini waan Yakobooni jed'e, D'akhaani wolti guurani kunini arra d'uga teenna taha, tanaafi fulla suni Galeedi jed'ani. 49Labaniini ammalle waan jed'e, AABBO Waaqi nu qorqorate nu tissinna, yo nu gargari baanele. Tanaafi fulla suniini Mispa jed'ani. 50Ammalle Labaniini waan jed'e, Yo atini dubra tiyya hiyyoomsite, yokhaani nad'eeni d'ibi fuute, hojja anini achi injiraannele Waaqi quba nu qaba beekhi. 51D'akha anini jiddu teenna wolgubbaa naqe kuno kana, akheekhileeni kana. 52D'akhafi akheekhi kunini nuu d'uga. Anini gama kiyyaani d'akha kana dabre si inhad'u, atileeni gama keetiini d'akha kanafi akheekha kana bira dabarte na inhad'ini. 53Waaqa Abrahamutiifi Waaqi Nahori jiddu teenna tae ha d'uga arguti. Jennaani Yakobooni maqa Waaqa abbaani isaa Isaaqooni sodaateeni kakhu kakhate, 54sorio gaara gubbaa qale, worra isaa ch'ufa gololaa wolti yaame. Sagale nyaannaani halkani suni achuma bulani. 55Lafti bariite jennaani Labaniini akhakhowanifi dubra isaa d'ungate eebise kae gale.
Aka Yakobooni Esau aragtaa kurfae
Currently Selected:
Uumama 31: BOR
Tõsta esile
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.