LITANGA 5
5
Visukululwi via Adamu
(1 Zin. 1:1-4)
1Yaga namita agivisukululwi via Adamu. Lwa Nyasaye yalomba umundu, ya mulomba mulifwana lilie. 2Yalomba musaza nu mukali, navagasiza, kandi navagulika “Umundu numukali.” 3Lwa Adamu yaali ni mihiga 130, yanyoora mwana muyaayi uwamufwana, kandi yamugulika lieta Sezu. 4Inyima wa yago, Adamu yamenya mihiga jindi 800. Yanyoora avana vandi vayaayi na vakana 5ma yakuza naveeye ni mihiga 930.
6Lwa Sezu yaali naveeye ni mihiga 105, yanyoora mwana muyaayi Enosi, 7kandi yamenya mihiga jindi 807. Yanyoora avana vandi vayaayi na vakana 8ma yakuza naveeye ni mihiga 912.
9Lwa Enosi yaali ni mihiga 90, yanyoora mwana muyaayi Kenani, 10kandi yamenya mihiga jindi 815. Yanyoora avana vandi vayaayi na vakana 11ma nakuza naveeye ni mihiga 905.
12Lwa Kenani yaali ni mihiga 70, yanyoora mwana muyaayi, Mahalaleli, 13kandi yamenya mihiga jindi 840. Yanyoora avana vandi vayaayi na vakana 14ma nakuza naveeye ni mihiga 910.
15Lwa Mahalaleli yaali ni mihiga 65, yanyoora mwana muyaayi, Jaredi, 16kandi yamenya mihiga jindi 830. Yanyoora kandi avana vandi vayaayi na vakana 17ma nakuza naveeye ni mihiga 895.
18Lwa Jaredi yaali ni mihiga 162, yanyoora mwana muyaayi Enoka, 19kandi yamenya mihiga jindi 800. Yanyoora avana vandi vayaayi na vakana 20ma nakuza naveeye ni mihiga 962.
21Lwa Enoka yaali ni mihiga 65, yanyoora mwana muyaayi Mezusela. 22Inyima wa yago, Enoka yatia malago ga Nyasaye ku mihiga 300 kandi yanyoora avana vandi vayaayi na vakana. 23Yamenya mihiga 365. 24Yatia malago ga Nyasaye mu limenya lilie liosi, kandi yatulaho, kigira Nyasaye yamuvugula.
25Lwa Mezusela yaali ni mihiga 187, yanyoora mwana muyaayi Lameki, 26kandi yamenya mihiga jindi 782. Yanyoora kandi avana vandi vayaayi na vakana 27ma nakuza naveeye ni mihiga 969.
28Lwa Lameki yaali ni mihiga 182, yanyoora mwana muyaayi, 29kandi yavoola, “Kutura ku lirova lia Yahova yalaama, mwana uyu alakoletera vosoosi kutura ku miyinzi jiitu midinyu.” Kunangwa yamugulika Nuhu#5:29 Nuhu: Mu Luheburaina livoora vosoosi.. 30Lameki yamenya mihiga jindi 595. Yanyoora avana vandi vayaayi na vakana 31ma nakuza naveeye ni mihiga 777.
32Inyima wa Nuhu yaali ni mihiga 500, yanyoora avana vayaayi vavaga, Shemu, Hamu, na Jafeza.
Currently Selected:
LITANGA 5: LOGOOLI
Tõsta esile
Share
Copy
Want to have your highlights saved across all your devices? Sign up or sign in
©Bible Society of Kenya, 2019