LITANGA 4
4
Kaini na Habili
1Maku Adamu yaali harara nu mukali weve Hawa. Hawa yavereka ma niyivura mwana muyaayi, ma navoora, “Yahova amali kongonya konyoora mwana muyaayi.” Maku yamugulika lieta lilie “Kaini.” 2Lwinyima Hawa yivura kandi mwana wundi muyaayi lieta lilie Habili. Habili yaali mwayi wa magondi, na Kaini yaali umulimi. 3Lwa vaali ni vakamenya ku ing'inga, Kaini yavugula ku ligesa lilie ma nahaana ku Yahova kuli Isadaka. 4Habili yavugula kememe chu kutanga kwivulwa ku magondi geege naasinza ma navugura inyama indahi ligali nahaana ku Yahova kuli isadaka. Yahova yaavugilira kandi nayanza Habili ni sadaka yeeye, 5navuzwa yasura Kaini harara ni isadaka yeeye. Kaini yaali nu vutima uvululu ligali, kandi navihilirwa ligali. 6Maku Yahova yavolera Kaini “Kigira ki oveeye nu vutima? Kandi kigira ki uvihilirwa? 7Niiva wakakoli vulahi, ngano ndakakuvugiliriyi, navuzwa kigira umali kokora vudamanu, ugwiyi mu vwoni. Uvwoni vulakwamiiha, navuzwa ivi kuduuka uvuguuti.”
8Maku Kaini yavolera Habili amwavo weve, “Genda kuzie kogenda mu mulimi.” Lwa vaali nivaveeye uwene yeyo, Kaini yingilira Habili amwavo weve ma namwiita.
9Maku Yahova yateva Kaini, “Amwavo woovo Habili aveeye hayi?” Naye yativura, “Inzi si manyi mba. Inzi mbeeye mulindi wa mwavo wange?”
10Maku Yahova yateva, “Kigira ki umali kokora kindu kidamanu yiki? Amasahi ga amwavo woovo gwaniraa ku inzi kutura kumalova kuli mwoyo gulangiliraa kutunga kisaalia. 11Kalunu ivi umali kulamwa kutura ku lirova limali kwalaminya munwa kumila masahi ga amwavo woovo Habili wa witi. 12Niiva ulageliza kutaga vitagwa, si ulagesa mba. Ulagendagenda vugira kuva ni limenya ku lirova.”
13Kaini yavolera Yahova, “Likalagirwa liange liveeye linene ligali kuvita kegero. 14Ivi umali kungunga kutura ku lirova kandi ndivisa kutura imbiri woovo. Ndagendagenda mukivala, kandi mundu woosi onyoora alaanzita.”
15Navuzwa Yahova yavolera Kaini, “Si gaveeye ndio mba. Niiva mundu woosi alakwita, ndavanza kisaalia kuye haali saba.” Kunangwa Yahova yavika kimanyiru ku Kaini kwiganihiza mundu woosi umunyoola avuli kumwita. 16Maku Kaini yazia kutura imbiri wa Yahova, nazia komenya mukivala cha Nodu#4:16 Nodu: Yili ni lieta lie kivala mu Luheburaina, liveeye kovora “Kogendagenda.” ekeveeye Ivugwi wa Edeni.
Visukululwi via Kaini
17Kaini yaali harara nu mukali weve ma naavereka vanyoola mwana muyaayi ma ni vamugulika lieta lilie Enoka. Maku Kaini yumbaka Lidaala Linene ma naaligulika lieta liu muyaayi weve. 18Enoka yaali nu mwana muyaayi lieta lilie liali Iradi. Iradi naye niyiivura Mehujaeli, na Mehujaeli niyiivura mwana muyaayi ma namugulika lieta lilie Mezushaeli; na Mezushaeli naye niyiivura Lameki. 19Lameki yaali na vakali vaviri, lieta liu mulala liali Ada ni lieta liu wundi liali Zila. 20Ada yivula Jabali, uwaali guuga wa vandu vamenya mu mahima kandi vaatugaa imitugu. 21Amwavo weve yalangangwa Jubali, uwaali guuga wa vandu vosi avaari avimbi vaakuba vukana na amadulere. 22Zila yivula Tubali Kaini uwaali muturi wi vindu viosi viu mugasa ni vivia. Mbozo wa Tubali Kaini yalangwa Naama.
23Lameki yavolera vakali veve,
“Ada na Zila, muhuliri makuva gange:
Inzi mali kwita muyaayi musoleri kigira yaanguya.
24Niiva vandu 7 valitwa mulivanza kisaalia kulitwa lia Kaini,
Avandu 77 valitwa mulivanza kisaalia ku liitwa liange.”
Sezu#4:24 Sezu: Yili ni lieta liu Luheburaina; liveeye kovora, “Kuhaana.” na Enosi
25Adamu yaali harara nu mukali weve Hawa na viivula mwana wundi muyaayi na yamugulika lieta lilie Sezu kigira mukali weve yavoola, “Nyasaye umali kumba mwana muyaayi wundi havogono vwa Habili, uwa Kaini yita.” 26Sezu yivula mwana muyaayi na yamugulika lieta lilie Enosi. Kutura ing'inga yene yeyo, avandu vatanga lisigamira lieta litakatifu lia Yahova.
Currently Selected:
LITANGA 4: LOGOOLI
Tõsta esile
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fet.png&w=128&q=75)
Want to have your highlights saved across all your devices? Sign up or sign in
©Bible Society of Kenya, 2019