1. Mose 6
6
Daut Vedoawnis de Menschen
1Un daut passieed, aus de Menschen sikj oppem Ieedboddem vemieeden, un an Dajchta jebuaren worden, 2doa sagen de Säns Gottes, daut de Dajchta de Menschen scheen wieren, un see neemen sikj dee too Frues, dee see wullen. 3Un Gott säd: Mien Jeist saul nich eewich met däm Mensch rechten, doa hee doch Fleesch es; un siene Doag sent 120 Joa. 4Aun jane Doag wieren Riesen oppe Ieed, un uk nohäa, aus de Säns Gottes no de Dajchta de Menschen enjinjen un dise an jebäade. Daut sent de Helden, dee vonne oole Tieden häa wieren, de Mana von Riem jewast sent. 5Un Gott sach, daut de Menschen äare Boosheit groot oppe Ieed wia un aulet Sennen un Jedanken en sienem Hoaten däm gaunzen Dach blooss bees es. 6Un daut deed Gott leet, daut hee däm Mensch oppe Ieed jemoakt haud, un daut deed am en sienem Hoaten wee. 7Un Gott säd: Ekj well däm Mensch, däm ekj jeschaufen ha, vom Ieedboddem vetiljen, vom Mensch bat toom Vee, bat de Krupende un bat de Väajel unjrem Himmel; dan daut deit mie leet, daut ekj an jemoakt ha. 8Oba Noah funk Jnod enne Uagen Gottes.
Daut bekauntmoaken de Sintflut – De Arche woat jebut
9Dit es daut Jeschlajcht Noah: Noah wia een jerajchta, vollkomna Maun unja siene Metmenschen; Noah waundeld met Gott. 10Un Noah jebua 3 Säns: Sem, Ham un Jafet. 11Un de Ieed wia ver Gott vedorwen, un de Ieed wia voll Jewault. 12Un Gott sach de Ieed, un kjikj, dee wia vedorwen; dan aulet Fleesch haud sien Wajch oppe Ieed vedorwen.
13Un Gott säd to Noah: Daut Enj von aulem Fleesch es ver mie jekomen; dan de Ieed es voll Jewault derch an; un kjikj, ekj well ar met de Ieed vedoawen. 14Moak die eene Arche von Gofaholt; met Komasch saust du de Arche moaken un dee von bennen un von buten met Pekj vepekje. 15Un aulsoo saust du ar moaken: 300 Ellen saul de Arche lank sennen, 50 Ellen äare Breed un 30 Ellen huach. 16Een Fensta saust du enne Arche moaken, un bat to eene Elle huach, unjrem Dak, saust du von bowen moaken; un de Däa de Arche saust du en äare Sied moaken; met eenem unjastem, tweeden un dredden Stockwoakj saust du an moaken. 17Dan ekj, kjikj, ekj brinj de Wotastreem äwa de Ieed, om aulet Fleesch unjrem Himmel too vedoawen, en däm een Läwensfrodem es; aules, waut oppe Ieed es, saul unjagonen. 18Oba met die well ekj mien Bunt opprechten, un du saust enne Arche gonen, du un diene Säns un diene Fru un de Frues diene Säns met die. 19Un von aulem Läwendjen, von aulem Fleesch, twee von aule saust du enne Arche brinjen, om dee met die aum Läwen too erholen; een Menlichet (hee) un eene Frulich (see) sellen see sennen. 20Vonne Väajel no siene Oat un vom Vee no siene Oat, von aule Krupende oppem Ieedboddem no siene Oat: twee von aule sellen no die nengonen, om an aum Läwen too erholen. 21Un du, nemm die von aule Speise, de jejäten woat un saumel daut bie die toop, daut dee die un an too Noarinj es. 22Un Noah deed daut; no aulem, waut Gott am befoolen haud, aulsoo deed hee.
Currently Selected:
1. Mose 6: PBJHF
Tõsta esile
Share
Copy
Want to have your highlights saved across all your devices? Sign up or sign in
© SW-Radio e.V.