Pula 38
38
Seeƴkohaani na dohohse hoosuuɗ ci na beñwaari ɓoktukohaani
1Ƴutta, a waakka hang kassiya, a haɓiɗta keesi seeƴkohaani na dohohse hoosuuɗ ci ; wa nikee kaare, ɓak nu nga ɗah nikee saangal kanak na camban ; njooliini nikka suung kaahay. 2A puliɗta wiic ciŋ wa ŋ koñ ciŋ wa nikiis ci, a puliɗndoh ca ŋ hangi wa haɓɗohu ; a ullaa jen na moos ruumind.
3A haɓiɗta in ci hun naa jen : Tumohaaciŋ weti niiniɗi, peel ci, tumohaaciŋ ñif mi na lisse, furset ciŋ sepet ci na tumohaaciŋ ƴuuƴ ci. A haɓɗoh ca jen moos ruumind.
4A haɓɗiɗta seeƴkohaani giryaas moos ruumind, a deggaa ŋ ɗooƴi, ŋ ooɓ kaadariŋ seeƴkohaani, wa yoorra ŋ leerni po wa teemmba na leerniŋ njooliiniŋ seeƴkohaani.
5A haɓiɗta in nikiis haa kiñi, a ñaakiɗta ca ŋ koñ ci nikiis ciŋ giryaasi, ɗiski ndooɗ ci ɓeksan. 6A haɓiɗta ndooɗ kassiya kanak, a ulla ca na moos ruumind. 7A ɓekka ca ŋ kiñiici ŋ ɓak ciŋ seeƴkohaani, ca nikka ambohaaciŋ wa ne wa ɓayse ɗah. Seeƴkohaani nikee kees, ɗooƴi nikka hulang.
8Ƴutta, a haɓiɗta beñwaari na ɓoktukohse na degohaaniŋ wa, a haɓɗoh ca moos ruumind, a ɓay seetuucaŋ ɓitiɓ ca na teembe ŋ nguɓu Ɗiipa-na-Cohohse#Pula 33:7 ne ɓa panguk, a haɓiɗta ca.
Haɓɗiŋ bayaaliŋ ɗiipi
9A haɓiɗta in ci ɗingohsan bayaali wil Genohaani, a haɓiɗta piis teɗohuuɗ leeŋ eɗfiɗ ndengiɗ ɗingoha ɓak yaah-sing ne fu eɗ pulohaaɗ-noh finho, fu aasee ɗah. Ɓakeem nikee saangal ndaŋkiyaah-yatuus (50). 10Kumbin ci ndaŋkiyaah-kanak ci piis ci tokohsan na tufkohaaci ndaŋkiyaah-kanak ci ca yipohsan haɓɗohuusa moos ruumind, ca raakka koroha na ñoori ca ɓekohsan haɓɗohu haalis.
11Ɓaki lah yaah-ñaahum hennda ɗaa, wa nammba haɓɗohu ɗaa. 12Ɓaki lahoh na muyohaaɗ-noh, hutiiniŋ piis ciŋ wa wa nikee saangal ndaŋkiyaah-kanak na yatuus (25), ca toksan ŋ kumbin ndaŋkiyaah ci yipsan ŋ tufkoha ndaŋkiyaah. Korohaaciŋ ca na ñoor ci nikee haalis.
13Ɓakiŋ aasohaani, ŋ pulohaaɗ-noh nikee saangal ndaŋkiyaah-kanak na yatuus (25). 14-15Ɓak ci kanak ci aasohaani nik ŋ leerniŋ ca, waa nu nga, piis ciŋ wa nikee saangal yasna-kanak na camban, wa raakka kumbin kaahay na tufkohaaciŋ ca.
16Piis ciŋ ɗingiŋ bayaali jen, haɓɗohsee leeŋ eɗfiɗ ndengiɗ. 17Tufkohaaci kumbin ci yipohsee nikee moos ruumind, korohaaci na ñoor ci nikka haalis, haf ciŋ kumbin ci uluusa na haalis. Kumbin ciŋ ɗingiŋ bayaali jen raakee ñoor haɓɗohu haalis.
18Ridooniŋ aasohaaniŋ ɗingiŋ bayaali teɗohsee ooy leeŋ eɗfiɗ ndengiɗ ambsohuuɗ na ooy bulo na ruumind eɗfiɗ na ruumind coy, wa haɓɗuusa findi borode'oh keeh-keeh na borode'ohe. Hutiiniŋ ridooni nikee saangal ndaŋkiyaah, njooliini nikka suung yatuus findi angiiniŋ haf-piis ciŋ ɗingiŋ bayaali.
19Ridooni toksan ŋ kumbin ci nikiis ci haɓɗohu moos ruumind, ci yipsan ŋ tufkohaaci nikiis ciŋ ca nam haɓɗohu moos ruumind ; korohaaci na ñoor ci nikee haalis, haf ciŋ kumbin ci uluusa na haalis. 20Tatohaaci amban Genohaani ŋ kehƴi na ciŋ ɗingiŋ bayaali jen, nikee moos ruumind.
In ci kaɗ ŋ haɓɗuukiŋ Genohaani
21In cii ceɗ kaɗ ŋ haɓɗuukiŋ Genohaani hooliɗi, ɗiski atoh ci fiisohu Ambtiɗohiŋ Kooh ɗaaku, findi Musaa nakohee wa.
Ɓi ɓaah ŋ cuuɓiŋ Lewi ɓeɗ taambkohee kindi ; Itamaar kuɓkiŋ Aaruna seeƴkiɗohi, a yi adgohee ɓa.
22Ɓoyi haɓiɗ in ci Nikiɗi nakee Musaa jen, a Betsalel, kuɓkiŋ Uri, yi setiŋ Hur, a ɓaahee ŋ cuuɓiŋ Yudaa.
23Oholiyaab kuɓkiŋ Ahisamaak yi ɓaah ŋ cuuɓiŋ Daan, a yi ɓaatɗohee ɗe. A ƴaar herñiɗ ŋ pesit atoh moɗiɗ na fer in moɗiɗ te a miniɗ moɗsin lool na piis bulo na ruumind eɗfiɗ na ruumind coy, na leeŋ eɗfiɗ ndengiɗ.
24Wi Ɗiski Hooliɗi haɓɗasse, ini kaɗ ngaŋ urus jen te e Israayel ci eɗoha, wa kilo urus teemet-yasna-kaahay na kilo ndaŋkiyaah-yasna-kanak na yasna-kanak (877), na garam teemet-kaahay (300), ca ɓeesu ŋ ɓeesohaacaŋ Ɗiska Hooliɗa. 25Haalsa ƴaar ca kindu eɗohee, wa kilo haalis junni-kaahay na kilo ndaŋkiyaah na yasna-kanak (3017), na garam teemet-yasna-kanak na ndaŋkiyaah-yatuus (750), ca ɓeesu ŋ ɓeesohaacaŋ Ɗiska Hooliɗa.
26Haf nu nga ɗah eɗohee garam haalis yatuus, ɓa ɓees ca ŋ ɓeesohaacaŋ Ɗiska Hooliɗa. Ƴaar nu raakeen kiis ndaŋkiyaah-kanak (20) kaɗta ɗafuk ŋ bindka ɗah, eɗohha, ɓa nikee ƴaar junni-teemet-yasna-yino na junni-kaahay na teemet-yatuus na ndaŋkiyaah-yatuus (603.550).
27Kilo haalis junni-kaahay (3000) ceɗ naayɗu haɓɗoha tufkohaaci teemet ciŋ kumbin ciŋ Genohaani hooliɗi na kumbin ciŋ ridooni nik ŋ ɗooƴi. Yino nu nga ɗah haɓɗohuusa kilo haalis ndaŋkiyaah-kaahay (30). 28Kilooci ndaŋkiyaah na yasna-kanak ci (17) tasee na garam teemet-yasna-kanak na ndaŋkiyaah-yatuus ci (750) haɓɗohuusa korohaaci, ulohuusa haf ciŋ kumbin ci, haɓɗohuusa ñoor ciŋ ridooci toku ŋ kumbin ci.
29Moosi Israayel ci eɗohee nikee kilo junni-kanak na kilo teemet na kilo ndaŋkiyaah-kanak na nikiis (2124). 30Weɗ moosi haɓɗohu tufkohaaci nik ŋ aasohaaniŋ Ɗiipi-na-Cohohse, na seeƴkohaani moosi na giryaasiŋ wa, na in ciŋ seeƴkohaani ; 31weɗ nam haɓɗohu tufkohaaciŋ ɗingiŋ bayaali na ciŋ aasohaaniŋ wa, na tatohaaci amb Genohaani ŋ kehƴi na ci amb ɗingiŋ bayaali.
Currently Selected:
Pula 38: YM
Tõsta esile
Share
Kopeeri
Want to have your highlights saved across all your devices? Sign up or sign in
© Wycliffe Bible Translators, Inc