Pula 37
37
Wahndeeniŋ Ambtiɗohi
1Betsalel ɓayya hang kassiya, a haɓiɗta Wahndeeniŋ Ambtiɗohi. Hutiiniŋ wa nikee suung kanak na camban, angiini nikka suung na camban, njooliini nikka suung na camban. 2A ullaa na urus koceet ŋ ɗooƴi na finhoori, a haɓɗiɗtaa banda urus ŋ finhoori po wa willa.
3A haɓɗiɗtaa inaa nikiis haa kiñi, ca nikee urus, kot nu nga ɗah, a ñaakiɗta yino nga, ɓak nu nga ɗah raakka kiñi kanak. 4A haɓiɗta ɓi ndooɗ kassiya, a ulla ca na urus. 5A taambiɗta ca ŋ ɗooƴ kiñiica ne wahndeena min ɓayu.
6A haɓɗiɗtaa kunoha, ɗiski na romkohse, wa nikee urus koceet ; hutiiniŋ wa nikka suung kanak na camban, angiini nikka suung na camban. 7-8Na urseem, a tiɓpa po a puliɗta nataal seruben ŋ ɓak nu nga ŋ ɓak ci kanak ciŋ angiiniŋ wa. 9Ca yurhiɗkohee yurhiɗkoh, ca hiirra ŋ ɗiski na romkohse, ca raɗissa paɓ ciŋ ca ŋ ɗafki, ca ɗippaa.
Taaɓliŋ mbuuruuci
10A ɓayya hang kassiya, a haɓiɗta taaɓli, hutiiniŋ wa nikee suung kanak, angiini nikka suung yino, njooliini nikka suung na camban. 11A ullaa na urus koceet, a haɓɗiɗtaa banda urus po wa willa.
12A haɓɗiɗtaa kaadar, angiiniŋ wa nikee santimeetar yasna-kaahay, a haɓɗiɗtaa banda urus po wa willa.
13A haɓɗiɗta taaɓli inaa haa kiñi nikiis, ca nikee urus, a tummba ca ŋ koñ ciŋ wa nikiis ci, teemb ŋ kot ciŋ wa. 14Kiñiici nikee ŋ sero kaadari, ne ndooɗ ci na ɓayohse taaɓli taambɗu nga ca. 15Ŋ ineem, a haɓiɗta ndooɗ kassiya kanak, a ulla ca na urus, ɓayohaa wa.
16A haɓiɗta in ci nikan ŋ ɗafuk taaɓli : Palaat ci, na kaas ci, na koppaaci na meemeeci, ca jen ca haɓɗohsee urus koceet ; koppaaci na meemeeci nikka tumoha anaah ci na seeƴkohse.
Degohaaniŋ laampaaci
17Betsalel ɓayya urus koceet a tiɓpaa po a puliɗta degoha laampa na tasiŋ wa na faani na koppaaci na pos ci rangsukaaɗiici na ci rangsukiɗ ci. Ca jen ceɗ ɓaahee ini ca tiɓohu.
18Wa raakka naak yasna-yino ŋ faaniŋ wa, kaahay ŋ ɓaki singi, kaahay ŋ ɓaki ñaahmi, ca nikka sal kaahay. 19Naak ci yasna-yinooci, waa nu nga raakka koppa kaahay findi amand na posohe, waa nu nga ɗah raakka ɓi pos rangsukaaɗi na ɓi pos rangsukiɗ.
20Faaniŋ wa raakka koppa nikiis findi amand na posohe, waa nu nga ɗah na pos ciŋ wa rangsukaaɗiici na ci rangsukiɗ ci. 21Ooɓ sal nu nik raakka pos rangsukaaɗi ŋ faaniŋ degohaaniŋ laampaaci, po sal ci kaahay ci jen raakka.
22Pos ci rangsukaaɗiici na naak ci jen nikee urus koceet tiɓuuɗ, ca na ini tas ŋ degohaaniŋ laampaaci jen ceɗ ɓaah ini ca tiɓohu.
23A haɓɗiɗtaa laampa yasna-kanak, a nammbaa haɓɗiɗ tanaaƴ na tumoha ƴuuƴ ; ca haɓɗohu urus koceet. 24A ɓay kilo urus koceet ndaŋkiyaah-kaahay (30) weɗ a haɓɗoh degohaaniŋ laampaaci na in ci hun naa jen.
Suusohaaniŋ cuuraayi
25Ƴutta, a haɓiɗta seeƴkoha, suusoha cuuraay. A haɓɗoha hang kassiya, wa nikee kaare, ɓak nu nga nikka suung yino te njooliini nikee suung kanak.
A puliɗtaa wiic ciŋ wa ŋ koñ ciŋ wa ŋ ɗafki, a puliɗndoh ca ŋ hangi wa haɓɗohu.
26A ullaa na urus koceet ŋ ɗafki na wiic ci, a nammba ul ɓak ciŋ wa jen ; a haɓɗiɗtaa banda urus po wa willa.
27A haɓɗiɗtaa inaa haa kiñi kanak ŋ ooɓ bandaani, in ceem nikee urus. Ɓak nu nga raakka yino, ne ndooɗ ci ɓayohsana taambɗu nga ca. 28Ŋ ineem, a haɓiɗta ndooɗ kassiya kanak, a ulla ca na urus.
Cuuraayi na diwi na hoolɗohse
29A haɓiɗta diwi na hoolɗohse hoolɗuuɗ ci, wa nikka in hoolɗuuɗ wuu Kooh, a nammba haɓiɗ cuuraayi hooliɗi eeñiɗi na dohse ŋ seeƴkohaani, a haɓiɗ ca findi haɓɗoh eeñɗoha keeh-keeh na haɓɗohe.
Currently Selected:
Pula 37: YM
Tõsta esile
Share
Kopeeri
Want to have your highlights saved across all your devices? Sign up or sign in
© Wycliffe Bible Translators, Inc