Yoane 3
3
Yesu na Nĩkodemo
1Neryo habya mundu wʼAbafarĩsayo, omũtabalĩ wʼAbayũda, oyukahulawa mo Nĩkodemo. 2Omundu oyo mwasa uku Yesu omo kiro, ati, Mũkangĩrĩrya, tũnasĩ kʼuli mũkangĩrĩrya oyo walũa ewa Nyamuhanga. Kusangwa sihali mundu oyo wangatoka erikola ebitiko-tiko ebyo ukakola, Nyamuhanga ate haguma naye. 3Yesu mwamũsũbĩrya ati, Kwenene, kwenene, ngabũga nawe, nyiti, Omundu amatendibutwa kandi, siangatoka erilola oko Bwami bwa Nyamuhanga. 4Nĩkodemo mwabũlya Yesu ati, ko mundu angatoka eributwa ati, amabibya mukulu kwehĩ? Angatoka eriingira omo nda ya koyo wuwe nʼeriswabutwa kwehĩ? 5Yesu mwamũsũbĩrya ati, Kwenene, kwenene, ngakubwira nyiti, Omundu amatendibutwa oko magetsi nʼoko Mũlĩmũ, siangatoka eriingira omo Bwami bwa Nyamuhanga. 6Omubiri akabuta omubiri, nʼOmũlĩmũ akabuta Omũlĩmũ. 7Susweke kusangwa mongakubwira nyiti, Litolere imwabutwa kandi. 8Erihunga likabuhirira eyo lyanzĩre, nawe ũkowa erihuha lyalyo, nĩkwa ĩsĩwasĩ eyo lĩkalũa, kutse eyo likaya; kwʼali atya obuli mundu oyo Mũlĩmũ akabuta. 9Neryo Nĩkodemo mwamũsũbĩrya nʼerĩmũbũlya ati, Kwʼemyatsi eyĩ yangabya iti kwehĩ? 10Yesu mwasũbĩrya ati, Uwe uli mũkangĩrĩrya wa Ĩsraelĩ isuliminya emyatsi eyĩ kwehĩ? 11Kwenene, kwenene, ngabũga nawe, ĩtwe tũkabũga ebyo twasĩ, kandi tũkatũla omwatsi wʼebyo twabirilangira, nenyũ sĩmũlĩrĩga erĩtũlago lyetu. 12Namabya ngababwira emyatsi yʼekihugo ĩsĩmũlĩtĩkĩrĩryayo, namababwira emyatsi yʼelubula, mwasyĩkĩrĩryayo muti kwehĩ? 13Sihali omundu oyo wahetukira elubula, yo nʼomugala wʼOmundu oyo wandagala akalũa elubula.
14Ngoko Musa asumbira enzoka yʼendata omo mbwarara, litya Omugala wʼOmundu atolere erisumbirwa endata. 15Neryo Omundundi oyũkamwĩkĩrĩraya abane engebe yʼerikota. 16Kusangwa Nyamuhanga mwanza ekihugo kyʼatya, kyaleka iniaha Mugala wuwe, Ekyusa kiwe, neryo oyũkamwĩkĩrĩraya siahere, nĩkwa abye nʼengebe yʼerikota. 17Kusangwa Nyamuhanga mwatatuma Mugala wuwe omo kihugo eribya Mũtswerĩ wakyo, nĩkwa abye Omũlamya wakyo.
18Oyũkĩkĩrĩraya Omugala sialitswerawa, nĩkwa oyũtetĩkĩrĩrya iniamabitswerwa, kusangwa sĩalĩtĩkĩrĩrya oko Mugala, Ekyusa kya Nyamuhanga. 19Neryo eritswera lyerĩ, ekyakakala kyabiriasa omo kihugo, nʼabandu mobanza omwĩrĩmya kwilaba ekyakakala, kusangwa emĩbĩrĩ yabo yabya mibi. 20Kusangwa obuli mundu oyukakola ebibi akakwa ekyakakala kyʼobusu, kandi sĩalĩhĩka oko kyakakala, emĩbĩrĩ yiwe mibi ĩkasyamĩnyĩkalĩbwa. 21Nĩkwa oyukakola ekwenene akasa oko kyakakala, emĩbĩrĩ yiwe iminyikale kwʼikakolawa omo nzira yʼerĩowa Nyamuhanga.
Yesu na Yoane
22Enyũma wʼemyatsi eyĩ, Yesu nʼabiga buwe mobasa omo kihugo kyʼeYũdea. Eyo, Yesu mwasiba nabo ĩnĩakabatĩsaya. 23Yoane nibya abya akabatĩsĩrya eAĩnonĩ hakũhĩ nʼeSalĩmũ, kusangwa ho habya magetsi mangi; kandi abandu babya bakahĩka nʼerĩbatĩsĩbwa. 24Kusangwa Yoane isialiaguswa omo mũlĩkĩ.
25Neryo obuhaka mobwahuluka omo katĩkatĩ kʼabiga ba Yoane nʼOmũyũda oko mwatsi wʼerĩerya. 26Neryo abiga abo mobahĩka uku Yoane, mobamubwira bati, Mũkangĩrĩrya, oyo wabya haguma nawe eyisirya wʼeYorodanĩ, oyo wahula, lebaya, akabatĩsaya, nʼabandu bosĩ bakamũhĩkako! 27Yoane mwasũbĩryabo ati, Omundu sialibana ekindu ekyo Nyamuhanga atamuha, kĩkalũa elubula. 28Nenyũ muli batũlĩ bʼomwatsi wage ngoko nabũga nyiti, Ingye Sindi Kristo, nĩkwa natumawa embere siwe. 29Oyuwite Omũherũkĩ, nĩ ĩba wʼomũherũkĩ; nĩkwa omwĩra wʼĩba wʼomũherũkĩ, oyo wimene nʼerimuhulikirira, akatsema kutsibu erĩowa omulenge wʼĩba wʼomũherũkĩ. Litya obutseme bwage bwamahĩkana. 30Litolere iniahama, nage inakeha.
Oyũkalũa elubula
31Oyũkalũa endata alengĩre abosĩ, nʼowʼekihugo ni wʼekihugo, kandi akabũga ebyʼekihugo. Oyũkalũa elubula alengĩre abosĩ. 32Akatũla omwatsi wʼebyo abirilangira nʼebyo abĩrĩowa, kandi sihali mundu oyũkalĩga erĩtũlago liwe. 33Oyũkalĩga erĩtũlago liwe, akakangaya ngoko Nyamuhanga ni kwenene. 34Kusangwa oyo Nyamuhanga abirituma akabũga ebĩnywa bya Nyamuhanga, kusangwa Nyamuhanga sialirengera mundu yʼOmũlĩmũ wuwe. 35Tata anzĩre Omugala, kandi abĩrĩhĩra emyatsi yosĩ omo byala biwe. 36Oyũkĩkĩrĩraya Omugala awite engebe yʼerikota; nĩkwa oyutekenga Omugala siendisyalola oko ngebe, nĩkwa erihitana lya Nyamuhanga lĩmwĩkereko kera na kera.
Currently Selected:
Yoane 3: KB80
Tõsta esile
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.