Tobit 6
6
CAB. 6
1As myr v’ad goll er nyn yurnah, haink ad ’syn astyr gys yn awin Tigris, as ghow ad aaght ayns shen.
2As tra hie yn dooinney aeg sheese dy niee eh-hene, lhiem eeast ass yn awin, kiarit dy stroie eh.
3Eisht dooyrt yn ainle rish, Gow yn eeast. As ghreim yn dooinney aeg yn eeast, as hayrn eh gys y thalloo eh.
4Dooyrt eh rish, Foshil yn eeast, as gow yn cree as yn aane as y gall, as tasht seose ad dy kiarailagh.
5Myr shen ren y dooinney aeg myr va’n ainle er ghra rish; as tra v’ad er ghreddey yn eeast, dee ad eh: eisht hie ad ny-neesht roue derrey haink ad er-gerrey dy Ecbatane.
6Eisht dooyrt y dooinney aeg rish, Vraar Asarias, cre-hon ta cree as aane as gall yn eeast?
7As dooyrt eh rish, Mychione y cree as yn aane, my ta jouyl ny drogh spyrryd boirey ’nane erbee, shegin dooin jaagh ’yannoo jeh kiongoyrt rish y dooinney ny’n ven, as cha bee’n persoon shen arragh er ny heaghney.
8Er-son y gall, te mie dy ooillaghey dooinney ta bolg er e hooillyn, as bee eh er ny lheihys.
9As tra v’ad er jeet er-gerrey da Rages,
10Dooyrt ainle rish y dooinney aeg, Vraar, yn laa t’ayn jiu ghoys mayd aaght marish Reguel, dty ghooinney mooinjerey; ta echey myrgeddin un ynrican inneen, enmysit Sara; loayr-yms er-e-son dy vod ee ve currit dhyts son ben.
11Son she dhyts ta’n chairys huic bentyn, fa dy nee uss ynrican ta jeh’n kynney eck.
12As ta’n ven aeg aalin as creeney: nish er-y-fa shen eaisht rhym, as neem’s loayrt rish e hayr; as tra hig mayd reesht veih Rages nee mayd y poosey ’yannoo: son ta fys aym nagh vod Reguel ee y phoosey rish fer erbee elley cordail rish leigh Voses, negooish ve toilliu baase, er-y-fa dy vel cairys yn eiraght bentyn dhyts roish dooinney erbee elley.
13Eisht dreggyr y dooinney aeg yn ainle, Ta mee er chlashtyn, vraar Asarias, dy vel y ven aeg shoh er ny ve currit da shiaght deiney, ooilley jeu hooar baase ayns shamyr ny lhiabbagh-poosee.
14As nish, ta mish yn ynrican mac t’ec m’ayr, as ta mee faitagh, er aggle, my hem stiagh huic, dy n’oym baase, myr yn eallagh roie: son shynney lesh spyrryd olk ee, nagh vel gortagh persoon erbee, agh ad shen ta cheet huic: shen-y-fa ta mish neesht ayns aggle dy bee’m marroo, as my ayr as my voir y choyrt (by-chyndagh rhym) lesh seaghyn gys yn oaie: son cha vel mac arragh oc dy nyn oanluckey.
15Eisht dooyrt yn ainle rish, Vel oo er yarrood ny saraghyn hug dt’ayr dhyt, dy beign dhyt ben y phoosey jeh dty chynney hene? er-y-fa shen eaisht rhym, O my vraar; son bee-ish er ny coyrt dhyts son ben; as nagh jean uss scansh jeh’n spyrryd olk; son yn oie t’ayn noght vees ee er ny coyrt dhyts ayns poosey.
16As tra vees oo er jeet stiagh ayns y shamyr-poosee, gowee oo leoie jeh’n ghreesagh, as ver oo paart jeh cree as aane yn eeast ny lhie er, as nee oo jaagh ’yannoo lesh:
17As soaree yn jouyl eh, as chea er-sooyl, cha jig eh reesht dy bragh arragh: agh tra hig oo stiagh huic, irree-jee ny-neesht seose as guee-jee gys Jee ta myghinagh, as vees chymmey echey erriu, as sauee eh shiu: nagh gow aggle, son t’ee er ny ve kiarit dty chour er-dyn toshiaght; as nee uss ish y choadey, as hed ee mayrt; as ny sodjey na shoh, ta mee smooinaght dy nymmyrk ee cloan dhyt. Nish tra cheayll Tobias ny reddyn shoh, hug eh graih j’ee, as ren e chree dy breeoil lhiantyn huic.
Currently Selected:
Tobit 6: YNAPBR
Tõsta esile
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017