Tobit 7
7
CAB. 7
1As tra v’ad er jeet gys Ecbatane, haink ad gys thie Reguel, as veeit Sara ad: as lurg daue v’er n’oltaghey ’cheilley, chur ee lhee stiagh ad ’sy thie.
2Eisht dooyrt Reguel rish Edna e ven, Dy jeeragh ta’n dooinney aeg shoh goll-rish Tobit my ghooinney mooinjerey!
3As vrie Reguel jeu, Cre veih ta shiu, vraaraghyn? Dooyrt adsyn rish, Ta shinyn jeh mec Nephthalim, ta nyn gappee ayns Nineve.
4Eisht dooyrt eh roo, Vel enn eu er Tobit yn dooinney mooinjerey ain? As dooyrt adsyn, ta enney ain er. Eisht dooyrt eh, Vel eh ayns slaynt vie?
5As dooyrt ad, T’eh chammah bio, as ayns slaynt vie: as dooyrt Tobias, T’eh yn ayr aym’s.
6Eisht lheim Reguel seose, as hug eh paag da, as cheayn eh.
7As hug eh bannaght er, as dooyrt eh rish, T’ou uss mac dooinney onneragh as mie; agh tra v’eh er chlashtyn dy row Tobit doal, v’eh seaghnagh, as cheayn eh.
8As myrgeddin ren Edna e ven as Sara e inneen keayney. Marish shoh ghow ad roo dy aggindagh; as lurg daue v’er varroo rea jeh’n chioltane hoie ad palchey dy veaghey er y voayrd. Eisht dooyrt Tobias rish Raphael, Vraar Asarias, loayr jeh ny reddyn shid dooyrt oo er y raad, as lhig da’n vyssness shen ve dy tappee er ny chooilleeney.
9Er shen hoilshee eh’n chooish da Reguel: as dooyrt Reguel rish Tobias, Ee as iu, as jean cree mie:
10Son te cooie dy lhisagh oo poosey my inneen: ny-yeih insh-yms yn irriney dhyt.
11Ta mish er-reish my inneen y choyrt ayns poosey da shiaght deiney, quoi hooar baase yn oie shen hie ad stiagh huic: ny-yeih, ec y traa t’ayn, jean uss cree mie. Agh dooyrt Tobias. Cha n’ee-ym veg ayns shoh, derrey nee mayd coardail as loo yn derrey yeh gys y jeh elley.
12Dooyrt Reguel, Gow ee eisht maghey shoh cordail rish y cliaghtey, son t’ou dooinney mooinjerey eck, as t’ee lhiat, as dy der y Jee dy vyghin speedeil mie diu ayns dy chooilley nhee.
13Eisht deie eh er Sara e inneen, as haink ee gys e hayr, as ghow eh yn laue eck, as hug ee dy ve ben da Tobias, gra, Cur-my-ner, gow ee cordail rish Voses, as leeid er-sooyl ee gys dt’ayr; as vannee eh ad;
14As gyllagh er Edna e ven, as goaill pabyr, va bargane-nashtee er ny scrieu, as er ny hickyraghey.
15Eisht ghow ad toshiaght dy ee.
16Lurg shen deie Reguel er Edna e ven, as dooyrt eh ree, Huyr, kiartee shamyr elley, as cur lhiat stiagh ayns shen ee.
17Tra v’ee er n’yannoo myr v’eh er hirrey urree, hug ee lhee stiagh ayns shen ee: as ren ee keayney, as hyrmee yn voir jeir e neen, as dooyrt ee ree,
18Bee dy yien mie, my inneen; dy der y Chiarn jeh niau as thalloo boggey dhyt son y seaghyn shoh t’ayd: bee dy mie, my inneen.
Currently Selected:
Tobit 7: YNAPBR
Tõsta esile
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017