Yoana 8
8
Bekukata Mukikulu Wetaga Meiga.
1Tondo Yesu endile ku muiduko wa Oleve. 2Nu nindunindu endile lingo mu numba nnene zakukumbamina; nu bantu bansania bamuvuilide; nu ekede gansi, nu abegisizie. 3Basanzi nu baFalese bamuvuilide na mukikulu weitaga meiga, bamubikile munkatini muabo, 4babuide Yesu bune, Musozi, tuakata mukikulu wono eitaga meiga. 5Mose atukakizizie mu mulembe bune, Ndi muntu akita bubo nti bamulibula makozi: nu uwe buni bugunatenda? 6Batendile bubo, kumulindika, buno balonde bubemusongela. Tondo Yesu akumbamine, nu asanzile gansi na munue wage. 7Tondo gabeitide kumubuzia, akumbamukile, nu ababuide bune, We uteli na misako za buagi ku muli, alinge kumulibula ikozi. 8Nu akumbamine lingo gansi, nu asanzile gansi na munue wage. 9Nu gabongule ku bubo, batukile umozi umozi, balembene, balingile ku wabezaga mukulu aba nu ku wakuzinda; nu Yesu asigede tugu wenyene, na wozo mukikulu, wabezaga wemana. 10Nu Yesu akumbamukile, abuzizie mukikulu bune, Kuni kubeli? Ndi takuli umozi wakusungia? 11Mukikulu amutendile bune, Mukota, takuli muntu. Yesu amubuide bune, nunne nsikukusungia: enda; ntuage lingo.
Yesu eli Kiengi kia Kisi.
Mat. 5:14-16; Yoana 1:9.
12Yesu ababuide lingo bune, Nne nili kiengi kia kisi: wozo wanyanga ntakenda mu kapilo, tondo abe na kiengi kia kalamo. 13BaFalese bamuakuide bune, Uwe ukuidongekela uwenyene; bulongeki bobe tabuisanana. 14Yesu ababuide bune, Ndi nkuidongekela nnenyene, nti bulongeki buane nti buisa; kubuno nizi kunkutuka, nu kunkuenda; tondo inyue tamuizi kunkutuka, nu kunkuenda. 15Inyue mukusungia ku misako za muntu; tondo nne nsikusungia muntu. 16Tondo ndi nkusungia, lusungio luane luli bulili; kubuno nne nsili nnenyene, nili na Tatane wansingile. 17Nu mu mulembe weinyu muasanzilue buno, bulongeki bua bantu babili buli bulili. 18Nne nkuidongekela nnenyene, nu Tatane wansingile ekundongekela. 19Bamubuide bune, So eli kuni? Yesu ababuide bune, Nne tamunizi, aba Tatane tamumuizi; gamunamenyine songo munamenyine Tatane. 20We atendile moki mamo geigisagia mu numba nnene za kukumbamina ku busio buisuku; nu takuli muntu wamukatile, kubuno nkungu zage zabezaga tazika.
21Ababuide lingo bune, Neiyendela, nu mukandonda, nu mukakua mu misako za buagi bueinyu; tamukavuama kuvua kuko kunkaba. 22BaYuda batendile bune, Ndi eiyite, kubuno ekutenda bune, Tamukavuama kuvua kuko kunkaba. 23Ababuide bune, Inyue muli ba gansi; nne nili wa kuigulu; inyue muli ba kisi kikino; nunne nsili wa kisi kikino. 24Ububo bunamubuide bune, Mukakua mu misako za buagi bueinyu, ndi tamuakatizia buno, nili wozo, kasi mukakua mu misako za buagi bueinyu. 25Bamubuzizie bune, Uwe u nazi? Yesu ababuide bune, Anga bunalingile kumubula aba nu kano kaluma. 26Nili na buingi bua kutenda nu buakumusungia; tondo wozo wansingile eli bulili; nu bubo bunkungua kuage, ububo bunkubula ga kisi. 27Tabamenyine buno, ekusambala musagu welsi. 28Yesu ababuide bune, Gamukasakika Muana wa muntu, mukamenyinina buno, nne u wozo, nu nsikukita kena nnenyene; 29kubuno bindi binsania nkukitaga bubo bukumutananizagia. 30Gatendile bubo, beingi bamukatizizie.
31Yesu abuide baYuda babo bamukatizizie bune, Ndi muikala mu idagi liane, nti museli beigisibua bane nunse; 32nu nti muamenyinine bulili, nu bubo bulili nti buamukandula. 33Bamuakuide bune, Tuli kikanga kia Abalahama, tatuabezaga bakobe ba muntu aba nu kano kaluma; nu buni bukutenda bune, Tuabe bakandulua? 34Yesu ababuide bune, Lebelebe, lebelebe, nkumubula bune, Muntu unsania ukukitaga misako za buagi nti eli mukobe wa buagi. 35Mukobe ntekuikalaga mu numba bindi binsania: tondo muana ukuikalagamo bindi binsania. 36Kubuno ndi Muana amukandula, nti mukakandulua nunse. 37Nizi buno, muli kikanga kia Abalahama; tondo mukulonda kunita, kubuno iyuki liane talikuingila mu muli. 38Nne nkumubula binsania binamonineko ku Tatane; nuinyue mukukita binsania bimungule kubio ku soinyue. 39Bamuakuide bune, Tateisue eli Abalahama. Yesu ababuide bune, Songo muli bana ba Abalahama, songo mukukita misako za Abalahama. 40Tondo kano kaluma mukulonda kunita, nne muntu ukumubula bitondo bia bulili bimungule ku Kalaga: Abalahama ntakitile bubo. 41Mukukita misako za soinyue. Bamubuide bune, Isue tatuabutilue mu butazi; tuli na Tateisue umozi tugu Kalaga. 42Yesu ababuide bune, Songo Kalaga eli Soinyue, songo munatundile: kubuno natukile kua Kalaga; nsiedusizie nnenyene, tondo we uwansingile. 43Kubuni inyue tamukumenyinina bunkutenda? Kubuno tamukuvuama kungua idagi liane. 44Inyue muli na soinyue, Liabo u Satana, mukutunda kukita ntundo mbi za soinyue. Mukulinga we abezaga muiti, ntemene mu bulili, kubuno we nteli na bulili mueli. Gekueka buza, akuitendela buage wenyene; kubuno we eli muza, nu eli isi wa boza. 45Tondo kubuno nkutenda bulili, inuye tamukinkatizia. 46Nazi wa kumuli ukunkokomeka buno, nili muagi? Ndi nkutenda bulili kubuni tamukunkatizia? 47Wozo wa Kalaga ekunguaga malagi ma Kalaga: inyue tamukumongua, kubuno inyue tamuli ba Kalaga. 48BaYuda bamuakuide bune, Ndi tatukutenda buligo buno uli muSamalia, nu uli na musumbu? 49Yesu ababuide bune, Nsili na musumbu; tondo nkuanza Tatane, nuinyue mukumbenga. 50Tondo nsikulonda lutanuno luane nnenyene; kuli umozi ukululonda nu ukusungia. 51Lebelelebe, lebelebe, nkumubula bune, Ndi muntu anza idagi liane ntakamona lukuo. 52BaYuda bamubuide bune, Kano kaluma tuamenyinina nunse buno, uli na musumbu. Abalahama akule, nu balengania bakule, nu uwe ukubula buno, wanza idagi liane ntakamona lukuo. 53Ndi uwe uwatinga tateisue Abalahama wakule? nu balengania bakule: nu uwe lino nazi? 54Yesu abakuide bune, Ndi nkuiganuna nnenyene, kasi lutanuno luane luli buliabulia: tondo Tatane ukuganunaga, nuinyue mukuibulaga buno eli Kalaga weinyu; 55nuinyue tamumuizi: tondo nne nimuizi; nu ndi nabula bune, Nsimuizi, nti nili muza anga inyue: tondo nimuizi, nu nkuanzaga idagi liage. 56Soinyue Abalahama abogilebogile gamonine busi buane; nu gabumonineko, abogilebogile. 57BaYuda bamubuide bune, Uwe uteba na miaka makumi matano, nu ndi wamuene ku Abalahama? 58Yesu ababuide bune, Lebelebe, lebelebe, nkumubula bune, Gabezaga Abalahama ntebutua nti nili. 59Basongezie makozi buno, bamulekelemo; tondo Yesu eibisile nu atukile mu numba nnene za kukumbamina.
Currently Selected:
Yoana 8: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.