Yoana 7
7
Bato ba Yesu Bekutunda Kuenda ku Yelusalema ku Kisagulo kia Bayuda.
Lk. 9:51-62.
1Nu gasilile bubo Yesu endaga mu Galela; asombile kuenda ku Yudaya, kubuno baYuda balondaga kumuita. 2Kisagulo kia baYuda, kisagulo kia nusu kiabezaga buigi. 3Bato bage bamubuide bune, Tuka gano, nu wende ku Yudaya, buno beigisibua bobe bamone ku mulimo ukukita. 4Takuli muntu ukukita mulimo nu kugubisa, ndi ekutunda kumenyua. Ndi ukukita mulimo wono, nti widolesia ku kisi. 5Kubuno aba bato bage tabamukatizizie. 6Yesu ababuide bune, Nkungu zane tazika; tondo nkungu zeinyu zakuka bindi binsania. 7Ba ga kisi tabekumusomba; tondo nne, bekunsomba, kubuno nkubalongekela buno, milimo zabo zili mibi. 8Endazi ku kisagulo: nsikuenda ku kisagulo kikio, kubuno nkungu zane tazika. 9Nu gababuide bubo, eikalile ku Galela.
Yesu Ekutuka ku Galela, Ekuenda ku Kisagulo kia Nusu.
10Tondo gendile bato bage ku kisagulo, we endile ku lumbisombiso, bantu tabamenyine. 11BaYuda bamulondile ga kisagulo, nu babuide bune, Kuni kueli? 12Babezaga bekuizuzuma ku kabamba kage: bamozi batendile bune, Eli muntu musoga; bango bune, Kilo, tondo we ekuengelelaga musanganano. 13Tondo takuli muntu watendile ku bango bantu, kubuno bakule baYuda boba.
14Munkatini mua kisagulo Yesu engide mu numba nnene za kukumbamina, nu eigisizie. 15BaYuda bangamine, batendile bune, Kubuni muntu wono ekumenya masanzo, nu ntegisizibue? 16Yesu abakuide bune, Meigisia menkuigisia ta mane, tondo meli tugu ma wozo wansingile. 17Ndi muntu ekutunda kukita kusombola kua Kalaga, nti anamenyinina mamo meigisia, ndi mekutuka kua Kalaga, aba ndi nkuitendela nnenyene. 18Wozo ukuitendela ekulonda lutanuno luage wenyene: tondo wozo ukulonda lutanuno lua wamusingile, wozo nti uwisanana, nu mueli nti tamuli buengelezi. 19Ndi Mose ntamukasile mulembe, tondo takuli umozi wanzile wozo mulembe? Nu buni bumukulonda kunita? 20Musanganano bamutendile bune, Uwe uli na musumbu: nazi ukulonda kukuita? 21Yesu abatendile bune, Nakitile mulimo umozi, nuinyue bansania muangamine nago. 22Mose amukasile kumonesibua (takuatukile ku Mose, kuatukile ku basonguluinyue); mukumonesagia mu busi bua sabato. 23Ndi muntu amonesibua busi bua sabato, buno mulembe unakua; buni bumukunongelua, ndi kubuno nonezie muntu mu busi bua sabato? 24Tamusungie muntu ku kilungi, tondo musungiazi ku buisa.
25Bamozi ba Yelusalema batendile bune, Ndi wono tugu ugubakulonda buno bamuite? 26Tondo we ntekubisa buakutenda, nu tabamubula buampa. Embe bakulu beizi lebelebe buno, we eli Klisto? 27Tondo isue tuizi kuatukile wono, tondo gakavua Klisto, takuli wizi kuakatuka. 28Yesu alalukile mu numba nnene za kukumbamina nu eigisizie bune, Munizi, nu muizi kunatukile; nne nsivuilide nnenyene; tondo wozo wansingile eli bulili nu tamumuizi. 29Tondo nne nimuizi; kubuno natukile kuage, nuwe uwansingile. 30Balondile kumukata; tondo takuli wavuamine kumukata: kubuno nkungu zage zabezaga tazika. 31Tondo mu musanganano wozo bantu beingi bamukatizizie; nu batendile bune, Ndi gakavua Klisto, akakita migeleko kutinga zikukita wono? 32BaFalese gabongule ku kuizuzuma musanganano ku bibio bitondo bia misagu zage, basankoga banene nu baFalese basingile bakoloboyo kuenda kumukata. 33Yesu ababuide bune, Nili neinyu nkungu nkeke, nu nende kua wansingile. 34Mukandonda, nu tamukamonako: nu kuko kunkaba tamukavuama kuvuako. 35BaYuda batendene buabo buabo bune, Muntu wono ekuenda kuni kututamumoneko? ende ku bantu babalanganine ku Geleka, nu akeigisia baGeleka? 36Buni buli bubuno buatenda bune, Mukandonda, nu tamukamonako; nu kuko kunkaba tamukavuama kuvuako?
Yesu Ekutenda Magala ma Muuza Wasililila.
Yoana 4:14; Misako 2:2-4.
37Busi buzinda bua kisagulo, buabezaga busi bunene, Yesu emanukile, alalukile neiyuki inene bune, Ndi muntu eli na mpusia avue kuane, nu anue. 38Wono wankatizia anga bukutenda masanzo nuzi za mazi ma kalamo zikagelaga mueli. 39Tondo atendaga bubuno ku musagu wa Muuza, buno babo bamukatizia bakagukasua: kubuno Muuza abezaga ntevua; kubuno Yesu abezaga nteganunua.
Bantu Bekuakania Yesu.
40Gongule bango bantu ku moki mamo, batendile bune, Lebelebe we eli mulengania. 41Bango batendile bune, We eli Klisto. Tondo bango bamozi batendile bune, Buni bunatukila Klisto ku Galela? 42Ndi masanzo tamekutenda buno, Klisto akatuka mu kikanga kia Davidi, nu ku Betelehema, muino wabezaga wa Davidi? 43Kuabede malekanuko munkatini mua bantu ba musanganano ku kabamba kage. 44Nu bamozi ba kubeli batundile kumukata, tondo takuli muntu umozi wamukatileko.
45Nububo bakambi basubizie ku basankoga banene nu baFalese; bababuide bune, Kubuni tamuavua nage? 46Bakambi bababuide bune, Tukila kunsania takuli muntu umozi ukutendaga anga wozo. 47BaFalese bababuide bune, Inyue nuinyue musengelelua? 48Banazi ku bakulu nu baFalese bamukatizizie? 49Tondo bantu ba musanganano wono bateizi mulembe basuililua. 50Nikodemo ababuide bune (wozo wamuvuilide mu kindi, abezaga umozi wa ku babo), 51Ndi mulembe weitu ukusungagia muntu ntelinga kungililua nu kumenya buakitile? 52Bamuakuide bune, Uwe nuwe uli wa ku Galela? Londa, nu umenye ndi mulengania anavuama kutuka ku Galela. 53Na muntu na muntu nawasubizie ku numba zage.
Currently Selected:
Yoana 7: NTKI57
Tõsta esile
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.