Lik 2
2
Nesans Zezi
(Mat 1.18-25)
1Pandan sa letan, Sezar Ogis#2.1 Sezar Ogis ti lanperer Ronm depi lannen 29 avan Zezi-Kri, ziska lannen 14 apre Zezi-Kri. ti'n ordonn tou dimoun dan Lanpir Romen pou al anrezistre zot. 2Sa ti premye resansman, dan letan Kiriniis, ki ti gouverner Lasiri. 3Tou dimoun ti al anrezistre zot, sakenn dan son prop lavil.
4Alor, Zozef osi ti kit Nazaret dan Galile, pour al dan Zide, dan lavil David, ki ti apel Betlehenm. Annefe, Zozef ti en desandan David. 5I ti al laba pour anrezistre li avek Mari, son fiyanse, ki ti ansent.
6Pandan ki zot ti Betlehenm, letan ti'n arive pour Mari ganny son baba. 7I ti donn nesans son premye ne, en garson. Mari ti anvlop li dan en drapo. I ti depoz li dan en manzwar, akoz ti napa plas pour zot dan lotel.
En Lanz I Aparet avek bann Berze
8Dan sa menm rezyon, ti annan bann berze. Zot ti pe pas lannwit deor pou vey zot troupo mouton. 9En lanz Senyer ti aparet devan zot. Mazeste Senyer ti klate otour zot, e zot ti ganny en gran lafreyer. 10Me lanz ti dir zot, “Pa per! Mon annan en bon nouvel pour zot, ki pou donn lepep antye en gran lazwa: 11Ozordi en Sover in ne dan lavil David. Li menm Kris, Senyer. 12La siny koman zot ava kapab rekonnet li: Zot ava war en pti baba anvlope dan en drapo, pe dormi dan en manzwar.”
13Deswit, en gran larme lanz ti zwenn avek sa lanz. Zot ti loue Bondye. Zot ti dir, 14“Laglwar Bondye lao dan lesyel! Lape lo later pour dimoun ki i kontan.”
Bann Berze I Al Betlehenm
15Kan bann lanz ti'n kit zot pour retourn dan lesyel, sa bann berze ti dir ant zot, “Annou al ziska Betlehenm, pou war sa ki'n arive, sa ki Senyer in fer nou konnen.”
16Zot ti depese pour ale. Zot ti war Mari, Zozef ek sa pti baba ki ti pe alonze dan en manzwar. 17Kan bann berze ti war sa, zot ti rakont sa ki bann lanz ti'n dir zot konsernan sa pti zanfan. 18Tou dimoun ki ti antann sa ki bann berze ti dir, ti etonnen. 19Me Mari ti gard tou sa bann parol dan son memwar e medit bokou lo la.
20Apre sa, bann berze ti retournen. Zot ti rann glwar Bondye. Zot ti remersye li pour tou sa ki zot in tande e war, parey lanz ti'n anons zot.
Prezantasyon Zezi dan Tanp
21Wit zour apre son nesans, sa pti baba ti ganny sirkonsi. Zot ti apel li Zezi, non ki lanz ti dir avan ki son manman ti ansent#2.21 War Lev 12.3; Lk 1.31..
22Kan zour ti'n arive pour zot ganny pirifye dapre Lalwa Moiz#2.22 War Lev 12.6., Mari ek Zozef ti anmenn Zezi Zerizalenm e prezant li devan Senyer. 23Annefe, parey in ekri dan Lalwa Senyer: Tou Garson premye ne, pou ganny konsakre pour Senyer#2.23 War Egz 13.2,12.. 24Parey lalwa i osi demande, zot ti ofer en sakrifis: En per tourtrel, oubyen de zenn pizon#2.24 War Lev 12.8..
Kantik Simeon
25Ti annan en zonm dan Zerizalenm ki ti apel Simeon. I ti en zonm zis ki ti annan respe pour Senyer. I ti pe esper konsolasyon pep Izrael e Lespri Sen ti avek li. 26Lespri Sen ti'n fer li konnen ki i pa pou mor avan ki i war Mesi ki Senyer ti'n promet.
27Sa zour, dirize par Lespri, Simeon ti antre dan Tanp. Kan paran Zezi ti'n anmenn zot zanfan dan Tanp pour fer sa ki lalwa ti demande, 28Simeon ti pran li dan son lebra e loue Bondye. I ti dir:
29Senyer!
Aprezan les mwan, ou serviter,
kit sa later anpe dapre ou parol.
30Annefe, mon lizye in war ou delivrans
31ki ou'n prepare devan tou bann pep,
32en lalimyer pour ekler bann nasyon
e laglwar ou pep, Izrael.
33Papa ek manman Zezi ti etonnen ler zot ti antann sa bann parol ki Simeon ti'n dir lo Zezi. 34Simeon ti beni zot. Apre, i ti dir avek Mari:
Sa pti zanfan in ganny swazir
pour abes e relev bokou dimoun dan Izrael.
I pou en siny kontradiksyon.
35Ensi, sa ki pe pase
dan leker bokou dimoun
ava ganny revele.
Kanta ou, Mari, en lepe pou transpers ou leker.
Profetes Ann
36Ti annan osi en profetes ki ti apel Ann, fiy Fanyel, sorti dan tribi Aser. I ti tre vye. I ti'n viv avek son mari zis pour 7 an. 37I ti'n reste vev. Aze 84 an, i pa ti kit Tanp. I ti kontinyen servi Bondye, lizour koman aswar; i ti zennen e priye.
38Dan sa menm moman, Ann ti arive. I ti konmans loue Bondye, e koz lo sa zanfan avek tou bann ki ti pe esper delivrans Zerizalenm.
Retour pour Nazaret
39Kan Zozef ek Mari, ti'n fer sa ki Lalwa Senyer ti demande, zot ti retourn Galile, dan zot prop lavil ki ti apel Nazaret. 40Sa zanfan ti grandi. I ti vin for, ranpli avek lasazes, e lagras Bondye ti avek li.
Zezi dan Tanp
41Toulezan, Zozef ek Mari ti annan labitid al Zerizalenm pour lafet Pak. 42Kan Zezi ti'n ganny 12 an#2.42 Pour en Zwif, 12 an ti laz matirite relizyez. War Egz 12.1-27; Det 16.1-8., zot ti anmenn li avek zot, pour asiste lafet dapre koutim Zwif.
43Kan lafet ti'n fini, zot ti retournen. Me Zezi ti'n reste Zerizalenm, san ki son paran ti remarke. 44Zot ti prezimen ki i ti avek bann vwayazer. Zot ti'n marse pandan en zournen antye, kan zot ti rod li parmi bann fanmir ek bann zanmi. 45Me zot pa ti trouv li. Alor, zot ti retourn Zerizalenm e kontinyen rod li.
46Trwa zour plitar, zot ti war li dan Tanp, pe asize parmi bann profeser lalwa. I ti pe ekout zot e pe poz zot kestyon. 47Tou dimoun ki ti antann li, ti etonnen par son lentelizans ek son bann repons. 48Kan son paran ti war li, zot ti sirprann. Son manman ti dir li, “Mon garson! Akoz ou'n fer sa avek nou? Ou papa ek mwan, nou'n rod ou partou, e nou ti byen trakase.”
49Zezi ti reponn zot, “Akoz zot ti pe rod mwan? Zot pa konnen ki mon annan travay dan lakaz mon Papa?”
50Me zot pa ti konpran sa ki i ti pe dir zot.
51Zezi ti retourn Nazaret avek zot. I ti kontinyen obei zot. Son manman ti gard tousala dan son leker.
52Zezi ti grandi fizikman. I ti progrese dan lasazes devan Bondye e devan zonm.
Currently Selected:
Lik 2: BSK
Tõsta esile
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.