Popular Bible Verses from Luka 14

Share

“Ko ai lava he tino e hau ki a te au, ka hē mafai ke kavea ia ma oku hoko, vaganā e hili atu tona alofa mai ki a te au, i lo ki tona tamana ma tona mātua, tana āvaga ma tana fānau, ona uho ma ona tuafafine, ma ke pa lava ki tona lava ola.

Ko ai lava he tino e hē ia amoa tona hātaulo ma mulimuli mai ki a te au, e hē mafai ke kavea ia ma oku hoko.

Auā ko nā tino e loto fakamaualuga, ka fakamaulalogia, ka ko nā tino e lotomaulalo, ka fakaeke ki luga ma kavea ma tagata takutakua.”

E vēnā foki lava ona hē mafai e he tino o koutou ke kavea ma oku hoko, vaganā e ia tiakia ana mea uma lele.

“Kāfai he tino e fia fau hona fale maualuga lahi, e mua nofo ki lalo oi fuafua pe fia te tau, ke ia kitea ai pe lava tana tupe ke fai ai te gāluega ke uma. Kāfai e hē ia faia vēnā, ka hē ia mafaia oi fakauma te fale kāfai e uma te faiga o te fakavae; oi ka fakatauemu ai ki a te ia nā tino uma na ki lātou kiteagia. Ka lea vē ki lātou, ‘Ko te tagata tēnei na kāmata oi fau e ia he fale, kae e hēki ia mafai oi fakauma.’

Kae kāfai e fai hau kaiga, valakaulia nā tino mātitiva, nā pipili, nā tino e hē kātoatoa nā itūtino, ma nā tino tāuaho; oi fakamanuia ai koe, auā e hē ki lātou mafaia oi toe totogi atu koe. Ko koe ka totogi atu e te Atua i te aho e ia toe fakatutūa ai mai te oti, nā tino nae āmiotonu.”

“Ko te māhima e lelei, kae kāfai te māhima kua uma tona kokona, e mafai vēhea nei ke toe fakakokona? E hē aogā mo te kelekele pe mo te fakapalagāvao e fakalelei ai te kelekele, ma e togi ki fafo. Kāfai e i ei ni outou taliga, fakalogo mai la.”