San Juan 2

Guꞌ tub fandang tub gyedz nu la Caná

1Na ornu bi bzaꞌ chon dzi nu yuꞌ fandang tub gyedz nu la Caná lo yu ni Galilea. Laab lat zeꞌ ri ñaa Jesuuz. 2Nunu niꞌ ziꞌl mnii gaꞌ dey lo Jesuuz nu lo de yu nu rsyaꞌ lom nu cha dey lo fandang zeꞌ. 3Na ornu blazh ñup ni urbyay nu goꞌ dey, orzeꞌ na ñaa Jesuuz rab mim:

―Blazh ñup ni urbyay ―nam.

4Orzeꞌ na gaꞌ Jesuuz rab mi ñaam Li:

―Ña, ¿lagu rniir riidz zeꞌ lo̱? Nigul shuub dzi nu gzac mbecy de gyel lily ne̱ ―nam.

5Orzeꞌ na gaꞌ ñaam rab mi de moz nu yuꞌ lo fandang zeꞌ:

―Bicy der la ziꞌl coz nu gniiñ ―nam.

6Na, zeꞌ nguaa gaꞌ shuup reꞌ nu byaa nu gyitaꞌ. Nañ reꞌ zeꞌ rguꞌ de mbecy Israeel nis par nu rnaa dey nunu par nu rgyiib dey la coz gal nu rnii leey ni dey. Zeꞌ tub ga de reꞌ zeꞌ rzuꞌ tub cyaal gaynal, o tub setent litr nis nañ ñi. 7Orzeꞌ na Jesuuz rab mi de moz zeꞌ:

―Bduꞌ der nis nañ de reꞌ re gal dzaa lañ ―nam.

Orzeꞌ de yu zeꞌ pchaa dey ñi gal ruꞌ lañ. Orzeꞌ nis zeꞌ byac ñi ñup ni urbyay. 8Orzeꞌ na gaꞌm rab mi dey:

―Na bdaꞌ der nis ii gua nu der goꞌ yu nu riib ic lo fandang ―nam.

Orzeꞌ gua nu dey ñi goꞌ yu nu riib ic zeꞌ. 9Orzeꞌ yu nu riib ic zeꞌ bicy yu preb nis nu byac ñup ni urbyay zeꞌ, sinu wangad lagy lay ca bruuñ. Tees de moz nu bdaꞌ nis zeꞌ gud lagy dey ca bruuñ. Orzeꞌ yu nu riib ic zeꞌ bredz yu yu nu nac nob zeꞌ. 10Orzeꞌ nay rab yuy:

―Dela mbecy nu loga la rbic dey ñup nap ni urbyay goꞌ de mbecy nu rdeꞌ lo fandang. Na ornu dzi bi goꞌ shaad dey ñup nap zeꞌ, orzeꞌ rbic dey de ñup corient goꞌ dey. Zeꞌ ru bzeeñ ru ñup nap gashtal na rbic ru goꞌ dey ―nay.

11Ndeꞌ nusuriidz nu bicy mi nu loga la tub gyedz nu ri lo yu ni Galilea nu la Caná. Zeꞌ blyuum gyel lily nim lo de mbecy, nunu de yu nu rsyaꞌ lom bicy cup zir dey consuel lom.

12Na ornu bded zeꞌ, orzeꞌ bruum Caná gush nez mi zam nu ñaam, gal nu de bicy mi, gal nu de yu nu rsyaꞌ lom za num dey par Capernaum. Zeꞌ pcyiiñ mi la be dzi.

Jesuuz bzu nap mi yuꞌ nu driib zily de mbecy Israeel Ñgyoozh

13Na ornu sñuu ga shuub dzi nu chuꞌ de mbecy Israeel saꞌ ni Pas, orzeꞌ Jesuuz yam par Jerusaleeng. 14Na ornu brim Jerusaleeng, orzeꞌ guꞌm loliꞌ ni yuꞌ nu driib zily de mbecy Israeel Ñgyoozh. Orzeꞌ byap mi de mbecy nu rut tor, nu shily, gal nu begy ni de mbecy. Nunu byapaꞌm de mbecy nu nguaa lo mez nu rchaa tiñ ni de mbecy nu bruu reñaꞌ lugaar. 15Na ornu bzaac mi de coz zeꞌ, orzeꞌ bzaam tub chicot nu duu lyaar. Orzeꞌ nu ndeꞌ pcyuu num dey, nu tor niy, gal nu shily niy. Bloom dey ich loꞌ ni yuꞌ zeꞌ. Orzeꞌ ptush las mi tiñ ni de yu nu rchaa tiñ zeꞌ nunu blaagy yaam mez ni dey. Orzeꞌ brush las tiñ ni dey. 16Zeꞌ de yu nu rut begy zeꞌ nam rab mi dey:

―Bloo der de bañcyug ii lugaar ii. Cueꞌ gyicy der yuꞌ ni Ñgyoozh uza̱ par tub yagyiꞌ ―nam.

17Orzeꞌ de yu nu rsyaꞌ lom byezaꞌ lagy dey zeꞌ nu rniiñ lat riidz ni Ñgyoozh: “Ya̱ rzu ferta̱ nu nac yuꞌr gashtal wagagye̱e̱ ga̱ꞌ la̱”, rniiñ.

18Orzeꞌ de yu zub lo ni de mbecy Israeel bdugyiꞌ dey lom:

―¿La ñuu muesht lyuur lo̱ de̱ par nu gabe nu ricy cup ru rishbeey nu ricy ru de coz ii? ―na dey.

19Orzeꞌ na gaꞌm rab mi dey:

―Ptily der yuꞌ ni Ñgyoozh ii. Orzeꞌ ya̱ zu napa̱ ñii nañ chon dzi tuubaꞌ tir gal nu nañ ―nam.

20Orzeꞌ na de mbecy Israeel rab yum:

―Cyuu zub shuup ñaꞌn guꞌ dey bicy yu riiñ, gazeꞌ nu byaꞌ lo yuꞌ ni Ñgyoozh ii. Zeꞌ ru naꞌr nu nañ chon zi dzi bi gzu nap ru ñii ―na dey.

21Tees yuꞌ ni Ñgyoozh nu bzat Jesucrisht, ndeꞌ cuerp nim. 22Tees ornu byabañ mi, orzeꞌ de yu nu rsyaꞌ lom byezaꞌ lagy dey nu bi mniim nu ni gac ñii. Orzeꞌ guña lagy dey de riidz ni Ñgyoozh gal nu de riidz nu mnii Jesuuz.

Jesuuz rad lagy mi la na nañ lardoo dela mbecy

23Lat nu Jesuuz rded mi Jerusaleeng, lat saꞌ ni Pas, tonaꞌ la zigy mbecy bicy cup dey consuel lom nu nac de nusuriidz nu bicy mi. 24Tees Jesuuz wangyicy cup mi consuel lo dey gun gud lagy mi lac mod na dela mbecy. 25Ni tub la mbecy walagy ñi nu nii dey lom mod nu na de mbecy, gun ub mi rad lagy mi la na nañ lardoo dela dey.

Actualmente seleccionado:

San Juan 2: zpz

Destacar

Copiar