San Juan 10

Jesuuz nam gal nu na tub yu nu rña shily

1Orzeꞌ na Jesuuz:

―Tees ya̱ rishli rne̱e̱ nu de yu nu wayuꞌ par gyeroꞌ ni chicyer ni shily, zeꞌ chuꞌy par reñaꞌ lugaar ni chicyer, yu zeꞌ nac yu tub gubaan, nunu nac yu mbecy a̱ꞌ nap. 2Tees yu nu rzuꞌ par gyeroꞌ ni chicyer ni shily, yu zeꞌ nac yu yu nu rña ma. 3Gun yu nu ca gyeroꞌ ni chicyer zeꞌ rshaal yu roꞌ zeꞌ ornu ruꞌña yu nu rña de shily zeꞌ. Orzeꞌ shily zeꞌ reñ ma nu zaab tiꞌy rniiy. Orzeꞌ rbedz yu ma tub ga la ma niy nu nu la ma. Orzeꞌ rbooy ma nañ chicyer zeꞌ. 4Na ornu bi blazh bruu dela ma, orzeꞌ yu nu rña ma rzay par lo ma. Orzeꞌ de shily zeꞌ za ca ma ich yu gun yuꞌ lo ma tiꞌy ornu rniiy. 5Tees de ma zeꞌ wacha ca ma ich mbecy nu a̱ꞌ yuꞌ lo ma, sinu druu chu ma loy, gun a̱ꞌ yuꞌ lo ma tiꞌy, gun nac yu mbecy a̱ꞌ yuꞌ lo ma ―nam.

6Jesuuz mniim de riidz tiily zeꞌ lo dey, tees wangyet lagy dey cuen lac yaruuñ.

Jesuuz nac mi biñ nu nap rña shily

7Orzeꞌ ndeꞌ nu Jesuuz mnii gaꞌm tuubaꞌ tir:

―Ya̱ rishli rne̱e̱ lo der: ya̱ na gal nu na gyeroꞌ ni chicyer zeꞌ nu rzuꞌ de shily. 8Dela de yu nu biid lo zir gazeꞌ ya̱, mas mnii dey nu nac yu yu nu rña shily, guc dey gubaan, nunu guc dey mbecy a̱ꞌ nap. Tees de shily wangyicy cuen ma dey. 9Ya̱ na gal na gyeroꞌ ni chicyer zeꞌ. De yu nu chuꞌ gyeroꞌ zeꞌ, gruu mbañ yu. De yu zeꞌ na dey gal nu na shily: nu rzuꞌ ma nañ chicyer, nunu druu gaꞌ ma, nunu rad gyizh nu row ma.

10’De gubaan ryiid yu par nu gyicy ziꞌl yu gubaan, nunu par nu cut yu, nunu par nu nit loy; tees ya̱ yapa̱ par nu grica̱ gyel mbañ ni der, nunu par nu gyicy cup zaꞌ la der ñii.

11’Ya̱ na gal nu na tub biñ nu nap rña shily. Zeꞌ biñ nu nap rña shily zeꞌ, shet ic mi nu gat mi nu nac de shily zeꞌ. 12Benu tub moz nu ryash ni nu rña de shily, zeꞌ ndeꞌ walab fis niy, nunu shily zeꞌ walab niy ma, zeꞌ benu zac yu nu yad tub lob, orzeꞌ zeeñ gay de shily zeꞌ. Gash yu carer gyay. Orzeꞌ lob zeꞌ shet ruꞌ ma de shily zeꞌ, nunu tush las ma de ma. 13Orzeꞌ moz zeꞌ gruu chuy lo de shily zeꞌ, gun nu nac tiñ ziꞌl ricy yu riiñ, walab nu rcay de ma.

14’Zeꞌ ya̱ naca̱ biñ nu nap rña de shily. Gal nu ya̱ yuꞌ lo̱ de ma ne̱, nunu yuꞌ lo gaꞌ de ma ya̱, 15niꞌ ziꞌl Ñgyoozh uza̱ yuꞌ lom ya̱, nunu niꞌ ziꞌl ya̱ yuꞌ lo̱ Ñgyoozh uza̱. Nunu ya̱ shet ica̱ nu gata̱ nu nac de shily ne̱. 16Nunu yuꞌ gaꞌ shily ne̱: bañ nu sac lat tub nac de bañ nu yuꞌ ii. Niꞌ de ma zeꞌ rlagy ñi nu cha te̱ꞌ ma. Orzeꞌ de ma zeꞌ zuub gyidag de ma ne̱ nunu gyac se tub nac ziꞌl de ma. Orzeꞌ gyac se tub ziꞌl ya̱ biñ nu rña ma.

17’Ñgyoozh uza̱ rcam ya̱ gun shet ica̱ nu gata̱, gun orzeꞌ cush cya̱ nu gyabañaꞌ tuubaꞌ tir. 18Ni tub la mbecy wac cut yu ya̱, benu wazaana̱. Tees ndeꞌ coz nu bruu nañ lardo̱o̱ ub la̱ nu shet ica̱ nu cut mbecy ya̱. Ya̱ ricy cupa̱ rishbeey nu zaana̱ nu cut mbecy ya̱, nunu ricy cupa̱ꞌ rishbeey nu gyabaña̱ tuubaꞌ tir. Ndeꞌ riiñ nu bduꞌ Ñgyoozh uza̱ ya̱a̱ ―na Jesuuz.

19Orzeꞌ byac cyup nac de mbecy Israeel tuubaꞌ tir nu nac de riidz nu mniim zeꞌ. 20Yuꞌ zigy mbecy nu rnii dey:

―Cueꞌ gyicy cuen der yu, gun bicy ni nuras yu. Orzeꞌ guloc yu ―na dey.

21Tees yuꞌ gaꞌ mbecy nu rnii dey:

―Benu tub mbecy gyicy ni nuras yu, rila wac niiy gal nu rnii yu ii. ¿Walab gaal gac gyicy nap tub nuras urlo tub mbecy lo caꞌ? ―na dey.

De mbecy Israeel wangyicy cuen dey Jesuuz

22Na ornu pshuub tiem nu bri nu rag, orzeꞌ guꞌ dey tub saꞌ Jerusaleeng par nu gyicy dey nu gyezaꞌ lagy mbecy tiem nu bzu chu dey yuꞌ par nu griib zily dey Ñgyoozh. 23Orzeꞌ rded Jesuuz tub lugaar ni yuꞌ zeꞌ nu la coredoor ni Salomoong. 24Orzeꞌ de mbecy Israeel bri loꞌ la dey mi. Orzeꞌ na dey rab yum:

―Zeꞌ ¿la be ruꞌ tiem gyicy ru nu wad lagy de̱? Naal la mnii lo̱ de̱ tub tir ziꞌl benu ru nac ru Mesías, biñ nu ca lo cuen nu co mbañ de̱ ya̱ ―na dey.

25Orzeꞌ na Jesuuz rab mi dey:

―Ya̱ bi mne̱e̱ lo der, tees wancheña lagy der. De coz nu mnii Ñgyoozh nu ricya̱, ndeꞌ rlyuuñ nu naca̱ Mesías. 26Tees de ru wacheña lagy der de coz nu rne̱e̱, gun a̱ꞌ nac der shily ne̱. 27De shily ne̱ ryuꞌ lo ma ti̱ꞌ ornu rne̱e̱. Nunu ya̱ yuꞌ lo̱ de ma ne̱. Nunu de ma zeꞌ ryiid ca ma icha̱. 28Gyicya̱ nu cui mbañ de ma tub la, nunu rila wanit lo de ma. Nunu se cyu la gac co za de ma ya̱a̱. 29Ñgyoozh uza̱, biñ nu briic de ma ne̱, mi zeꞌ zily zir nac mi par deꞌ zir mbecy. Nunu ni tub la mbecy wac co dey ma yaam. 30Ya̱ nu Ñgyoozh uza̱ tub ziꞌl nu nac de̱ ―nam.

31Orzeꞌ de mbecy zeꞌ pteꞌ gaꞌ dey gyitaꞌ nu shet dey nim. 32Orzeꞌ nam rab mi dey:

―Bicya̱ zañ de coz nap nu bruu lo Ñgyoozh lo rgüii la der. ¿A nu nac ca na de coz zeꞌ rgoow gyitaꞌ der ya̱? ―nam.

33Orzeꞌ na gaꞌ de mbecy rab yum:

―Walab nu rgoow gyitaꞌ de̱ ru nu nac ca na tub coz nap nu ricy ru, sinu rgoow gyitaꞌ de̱ ru nu nac nu mnii zir ni Ñgyoozh, gun ru mbecy ziꞌl nac ru, tees ricy ru nu nac ru Ñgyoozh ―na dey.

34Orzeꞌ na Jesuuz rab mi dey:

―Lat de riidz nu bzeeñ Ñgyoozh ni der, Ñgyoozh nam rab mi de mbecy: “De ru nac der de ñgyoozh”, nam. 35Rad lagy den de coz nu rnii riidz ni Ñgyoozh, nu rila wagruu fals ñi. Ñgyoozh bloo lam de mbecy “De ñgyoozh”: de yu nu bri riidz nim lo. 36Zeꞌ Ñgyoozh bzum ya̱, nunu bzuu nez mi ya̱ yapa̱ gyishlombecy ii. Benu ni, ¿lagu rnii der nu ya̱ rne̱e̱ zi̱ ni Ñgyoozh nu nac nu mne̱e̱ nu naca̱ iꞌñ mi? 37Benu wagyicya̱ de coz nu bruu lo Ñgyoozh, uza̱, orzeꞌ cueꞌ cheña lagy der de coz nu rne̱e̱. 38Tees benu ricya̱ de coz zeꞌ, mas wacheña lagy der ne̱, tees guña lagy der ni de coz nu ricya̱, gun tub tir ziꞌl gad lagy der nu ya̱ tub ziꞌl naca̱ du̱ Ñgyoozh, uza̱, nunu Ñgyoozh, uza̱, tub ziꞌl nac mi nu ya̱ ―nam.

39Orzeꞌ tub tiraꞌ ngulagy dey nguꞌ yaay mi nu ñgya nu dey mi pres. Tees blam yaa dey zam.

40Orzeꞌ Jesuuz bish cyam za gaꞌm tub laꞌ gaꞌ ruꞌ gyoow Jordaang. Orzeꞌ pcyiiñ mi zeꞌ. Zeꞌ lugaar nu gusa Waa briib nis yu mbecy anzir. 41Zigy mbecy bdeꞌ dey lom. Orzeꞌ na dey:

―Waa wangyicy yu ni tub la nusuriidz, tees dela coz nu mniiy nu nac mbecy ii, ndeꞌ coz rishli ―na dey.

42Orzeꞌ zañ mbecy bicy cup dey consuel lo Jesuuz lugaar zeꞌ.

Actualmente seleccionado:

San Juan 10: zpz

Destacar

Copiar